"Sosial şəbəkələrdə bizi təhqir edənlər neçə-neçə xəstəlik tapdığımı bilmirlər" — Xanım deputatdan Hadi Rəcəbliyə DƏSTƏK

16:22
17.08.2018
19122
Siyasət
A
Milli Məclisin deputatı, Xalq yazıçısı Elmira Axundova sosial şəbəkələrdə Parlamentin Əmək və sosial siyasət komitəsinin sədri Hadi Rəcəblinin sosial şəbəkələrdə təhqir olunması məsələsinə münasibət bildirib.

Deputat "Ölkə.Az"a açıqlamasında deyib ki, bir çox hallarda sosial şəbəkələrdə  Azərbaycanın tanınmış ziyalıları və görkəmli şəxsləri haqqında aşağılayıcı rəylər yazılır:

"Bu cür hallar yolverilməzdir. Ən azı etik normalara uyğun olaraq mən və Hadi Rəcəbli kimi yaşlı insanlarə hörmət edilməlidir. Çünki bizim Azərbaycan dövləti üçün xidmətlərimiz var. Bəzən sosial şəbəkələrdə ağızlarına gələn söyüşləri yazırlar. Əslində, bu cür hərəkətlər həmin adamların mənəviyyatının aşağı olduğunu göstərir. Bu cür hallar məni də narahat edir. Axı biz bu cür yolla hara gedəcəyik? Bəs bizim cavan nəsillər necə tərbiyə olunacaqlar? Sosial şəbəkələrdə olan təhqirlər və söyüşlər Azərbaycan xalqına yaraşmır. Bu yaxınlarda deputat həmkarım Astan Şahverdiyev, repçi Anar Nağılbaz dünyasını dəyişib. Cəmiyyətdə də belə fikirlər var ki, bu şəxslərin vəfat etməsində sosial şəbəkələrin də günahı var. Rus klassiki Qriboyedovun pyesində deyildiyi kimi: "Acı dillər silahdan qorxuludur". Elə insanlar var ki, təhqirə və tənqidə dözümlüdür. Misal üçün mən bu cür təhqirlərə dözümlü yanaşmışam. Vaxilə ermənilər mənim haqqımda nələr yazmırdılar. Ancaq mən mübariz insan olduğum üçün buna dözümlülük nümayiş etdirdim. Ümumiyyətlə, ictimai şəxslər bu cür hallara dözümlü olmalıdır. Ancaq elə insanlar da var ki, təhqirə dözümlü deyillər. Onları bu ağrıdır".

E.Axundova sosial şəbəkə istifadəçilərini təmkinli olmağa çağırıb:

"Hər birimiz təmkinli olmalıyıq, təhqirə yol verməməliyik, bir-birimizə hörmət etməliyik. Necə ki, mən hamıya hörmətlə yanaşıram, heç kəsi təhqir etmirəmsə, hər kəs də bir-birinə qarşı belə olmalıdır. Ola bilsin ki, kiminsə nakamlığı və ya problemi varsa, bunun intiqamını öz fərasəti və ağılı ilə irəli getmək istəyən insandan almamalıdır. Mənim də haqqımda sosial şəbəkələrdə tənqid yazanlar var. Bəzən yazırlar ki, buna bax, xalq yazıçısıdır, deputatdır və sairə. O adamlara sual verirəm ki, axı siz mənim haqqımda nə bilirsiniz? Mən ömrümün 40 ilini yaradıcılığıma həsr etmişəm, neçə-neçə araşdırmalar, elmi məqalələr yazmışam, neçə-neçə xəstəliklər tapmışam. Heç bunu da bilirsiniz? Biz gərək hamının layiqli qiymətini verməyi bacarmalıyıq. Hazırda mənə və Hadi Rəcəbliyə qarşı müxtəlif sözlər deyilir. Bilirsiniz, bizi xalq seçib, mənə bu adı cənab prezident verib, bizim haqqımızda aşağılayıcı fikirlər səsləndirmək cəmiyyətə hörmətsizlikdir. Mən bunu belə hesab edirəm. Məgər mən özüm özümə xalq yazıçısı adı vermişəm? Ona görə də bizim kimi adamları təhqir etmək ilk növbədə insanlarımıza hörmətsizlikdir".

Deputat qeyd edib ki, sosial şəbəkələrə birmənalı yanaşmaq olmaz:

"Sosial şəbəkələrin müsbət və mənfi cəhətləri var. Çünki sosial şəbəkələrdə Bəhram Bağırzadə və digərlərinin çox pozitiv bloqları var. Ancaq sosial şəbəkələrin mənfi cəhətləri daha çoxdur. Mən hələ də bilmirəm ki, biz bu cür bəlalara qarşı necə mübarizə aparacağıq. Sosial şəbəkələri bağlasaq, bu Azərbaycan dövlətinə yaraşmaz. Çünki biz demokratik ölkəyik. Mənə elə gəlir ki, yalnız və yalnız daxili mədəniyyətlə bu cür xoşagəlməz hallara qarşı mübarizə apara bilərik".

Vasif Həsənli
Ölkə.Az

ŞƏRH YAZ
0

Prezident Azərbaycan xalqını təbrik etdi

Prezident Azərbaycan xalqını təbrik etdi
18:52
18.03.2019
1696
Siyasət
A
Prezident İlham Əliyev Novruz bayramı münasibətilə Azərbaycan xalqına təbrik məktubu ünvanlayıb.

"Ölkə.Az"ın məlumatına görə, təbrik mətnində deyilir: 

"Hörmətli həmvətənlər!

Sizi Novruz bayramı münasibətilə ürəkdən təbrik edir, bu əziz bayram günlərində hamınıza bahar əhval-ruhiyyəsi, cansağlığı və səadət arzulayıram.

Qədim dövrlərdən bəri mənəvi həyatımızın ən dərin qatlarına nüfuz etmiş və milli-mədəni dəyərlərimizin təşəkkülündə müstəsna yer tutmuş Novruz bayramı əcdadımızın indiki nəsillərə misilsiz yadigarıdır. Təbiətlə insanın vəhdətinə dair təsəvvürləri yaşadan rəngarəng Novruz mərasimlərində xalqımızın dolğun həyat fəlsəfəsi və zəngin düşüncə dünyası parlaq təcəssümünü tapmışdır.

Azərbaycan torpağında Novruz bayramı daim yad təsirlərdən uzaq tutulmuş və heç bir qüvvəyə onu insanlarımızın qəlbindən çıxarmaq imkanı verilməmişdir. Biz onun böyük mənəvi gücü sayəsində keçmişimizin mürəkkəb dövrlərində belə nikbinliyimizi və gələcəyə inamımızı qoruyub saxlamağı bacarmışıq. Yaz bayramının bu gün əsl ümumxalq bayramı mahiyyəti qazanması dövlət müstəqilliyimizin nailiyyətlərindəndir.

Baharın yurdumuza hər gəlişi əsrlərin yaddaşında iz qoymuş mərasimlərimizə uyğun, yüksək təntənə ilə qeyd olunur. Qloballaşma dalğasının geniş vüsət aldığı və ənənəvi dəyərlərin sürəkli dəyişikliklərə məruz qaldığı bir zamanda Novruz bayramı tarixi-mədəni irsə bağlılığımızın ifadəsinə çevrilmişdir. Özündə insanlığa xas ali dəyərləri cəmləşdirmiş bu bayramın UNESCO tərəfindən ümumbəşəri irsin şah əsərləri sırasına daxil edilməsi hər birimiz üçün iftixar mənbəyidir.

Dayanıqlı inkişaf yolunda ciddi uğurlara nail olmuş Azərbaycanın islahatların növbəti mərhələsinə qədəm qoyması yaz fəslinin yeniləşdirici ovqatı ilə həmahəng səsləşərək qurub-yaratmaq əzmimizi artırır. Həyatımızın ayrı-ayrı sahələrindəki davamlı müasirləşmə meyilləri ilə vahid axarda gerçəkləşdirilən müxtəlif layihələr ölkə vətəndaşlarının rifahının daha da yaxşılaşdırılmasına yönəlmişdir. Qoy bu bayram hər evə xoş ovqat gətirsin və hər ocağa bol sevinc, ruzi-bərəkət bəxş eləsin.

Novruz bayramınız mübarək olsun!"

ŞƏRH YAZ
0

Səhiyyə Nazirliyinə 6,8 milyon manat ayrıldı

Səhiyyə Nazirliyinə 6,8 milyon manat ayrıldı
17:46
18.03.2019
547
Siyasət
A
Prezident İlham Əliyev “Maştağa qəsəbəsində 7 nömrəli Birləşmiş Şəhər Xəstəxanasının ərazisində yeni korpusun tikintisi ilə bağlı əlavə tədbirlər haqqında” sərəncam imzalayıb.

“Ölkə.Az” xəbər verir ki, sərəncamla Maştağa qəsəbəsində 7 nömrəli Birləşmiş Şəhər Xəstəxanasının ərazisində yeni korpusun tikintisinin başa çatdırılması məqsədilə Azərbaycan Respublikası Prezidentinin 2019-cu il 15 yanvar tarixli 890 nömrəli sərəncamı ilə təsdiq edilmiş “Azərbaycan Respublikasının 2019-cu il dövlət büdcəsində digər layihələr üzrə dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.19.12-ci yarımbəndində göstərilən vəsaitin 6 807 400 (altı milyon səkkiz yüz yeddi min dörd yüz) manatı Səhiyyə Nazirliyinə ayrılıb.

Maliyyə Nazirliyinə bu sərəncamda göstərilən məbləğdə maliyyələşməni təmin etmək, Nazirlər Kabinetinə bu sərəncamdan irəli gələn məsələləri həll etmək tapşırılıb.

Ölkə.Az

ŞƏRH YAZ
0
BAĞLA