Sürgün edilmiş «Qarabağ» Çempionlar Liqasını silkələdi — Ceyhun Osmanlıdan «EUTODAY»da möhtəşəm YAZI

Sürgün edilmiş «Qarabağ» Çempionlar Liqasını silkələdi
10:00
14.11.2017
1346
Ölkə
A

Ceyhun Osmanlı Avropada məşhur olan «Eutoday.net» portalında məqalə ilə çıxış edib. 

«Ölkə.Az» xəbər verir ki, «Bombalardan kuboklara: Sürgün edilmiş Qarabağ komandası Çempionlar Liqasını silkələdi» başlıqlı yazıda «Qarabağ» klubunun uğuru ilə yanaşı Azərbaycan həqiqətlərinə də geniş yer verilib.

Həmin məqaləni təqdim edirik:

1991-1994-cü illərdə Azərbaycan və Ermənistan arasındakı ölümcül müharibədə hər tərəfdən bombalar yağarkən heç kim təsəvvür edə bilməzdi ki, Dağlıq Qarabağa bitişik Ağdam rayonunun sürgün edilmiş komandası bir gün Çempionlar Liqasında oynaya bilər. 

Dr.Ceyhun Osmanlı yazır: «Bəli, hər kəsə təəccüblüdür ki, Azərbaycanın sürgün edilmiş komandası «Qarabağ» futbol klubu UEFA Çempionlar Liqasında «Kophenagen»i məğlub etdikdən sonra qrup mərhələsinə adlayaraq «Atletiko Madrid», «Roma» və «Çelsi» kimi dünya nəhənglərinə layiqli rəqib olmağı bacardı».

Klubumuz «Atletiko Madrid»ə qarşı 0-0 (18 oktyabr 2017) və 1-1 (1 noyabr 2017) hesabı olmaqla iki dəfə diqqətə layiq oyun göstərdi. Bundan öncə isə «Qarabağ» 1-2 hesabı ilə «Roma» klubuna məğlub oldu.  Lakin onlar klassik janrın Deyvid və Qoliafı üz-üzə gələndə çətin sınaq ilə qarşılaşdılar.

Maraqlı bir məqamı qeyd etsək, «Qarabağ» və «Çelsi» komandaları 1066-cı ildə İngiltərə və Norveç ordularının döyüşdüyü «Stamford» körpüsü yaxınlığında qarşılaşırdılar. «Qarabağ» FK-nın futbolçuları isə 30 min itki vermiş və bir milyondan çox qaçqın və məcburi köçkünə səbəb olan müharibənin canlı təmsilçiləridir. 

Onların Vətəni - Qafqazın Hiroşiması adlanan Ağdam rayonu 6000 sakini öldürülərək bu müharibədə məhv olmaq imtahanı ilə üzləşmişdi. 25 ildir ki, onların ev oyunları üçün nəzərdə tutulan «İmarət» stadionu erməni snayperlərinin nəzarəti altındadır.

Məhz bu müharibənin nəticəsində «Qarabağ» FK öz stadionunda ev oyunlarını oynaya bilmir. 22 noyabr tarixində «Çelsi» ilə nəzərdə tutulan ev oyunu da Ağdamda yox, oradan 440 kilometr uzaqlıqdakı «Bakı Olimpiya Stadionu»nda baş tutacaq.

Çempionlar Liqasında oynamaq hüququ əldə edən «Qarabağ» FK-nın bəzi futbolçuları erməni işğalı səbəbi ilə Azərbaycanın 875 fərqli yerində köçkün həyatı yaşamağa məcbur qalmış 128 min Ağdam sakinindən yalnız bir neçəsidir.

Komanda bağlanma riski ilə qarşılaşdı və çox çətin anlar yaşadı, pərən-pərən düşmüş azarkeşlərini yenidən təşkil etmək məcburiyyətində qaldı. «Qarabağ» ikinci baharını küllərindən yaranmış bir feniks kimi yenidən yaşamağa başladı.

Klubun keçmiş futbolçuları raket atəşli bombardımanın altında və minalı sahələrdə oynamağa məcbur qalmışdılar. Onlardan arasında o zaman könüllü müharibəyə yollanmış komandanın məşqçisi- həmin dövr komandir olmuş ağdamlı Allahverdi Bağırov kimi cəbhə xəttində həyatını itirənlər də var. «Qarabağ»ın kapitanı Rəşad Sadıqov, yarımmüdafiəçi Qara Qarayev, hücumçu Vüqar Nadirov və s. işğal olunmuş ərazilərin sakini, yəni məcburi köçkün həyatı yaşayan futbolçulardır. Futbol dünyasında bəlkə də heç vaxt rastlanmayacaq bir hadisədir ki, bu köçkün komanda ölkə çempionatında 4 ardıcıl çempionluq yaşayıb. Klubun azarkeşlərini gələcəkdə hansı sürprizlərlə təəccübləndirə biləcəyini düşünəndə müsbət həyəcan yaşamamaq əldə deyil.

Çempionlar Liqasının 2017-2018-ci il mövsümündə həm də siyasi gündəm canlıdır. «Qarabağ»ın uğurunu Azərbaycan ərazilərinin 20 faizini uzun müddətdir işğalda saxlaya, BMT, Avropa Parlamenti və Avropa Şurasının müvafiq qətnamələrinə baxmayaraq işğalı sonlandırmayan Ermənistan da izləməkdədir. İşğalçı Ermənistanla yanaşı həm də Rusiya… O Rusiya ki, Ermənistanda təxminən 5 min hərbiçi saxlayır və 2 hərbi bazası var. Yəqin ki, 22 noyabr tarixində Bakıda baş tutacaq «Qarabağ»-«Çelsi» matçını böyük maraq və sualla izləyəcəklər.

Xüsusilə nəzərə almaq lazımdır ki, klubun sahibi Rusiya əsilli milyarder Roman Abramoviçdir. 

İndi yüz minlərlə qaçqın və məcburi köçkün nəfəslərini tutaraq 22 noyabr tarixində Çempionlar Liqası matçında Deyvid və Qoliaf arasında olan mübarizəni ümidlə izləyəcəklər...

Ceyhun Osmanlı

IV Çağırış Azərbaycan Respublikası Milli Məclisinin deputatı

Odlar Yurdu Universitetinin beynəlxalq əlaqələr və innovasiyalar üzrə prorektoru

ŞƏRH YAZ
0

Sabah hava necə olacaq?

Sabah hava necə olacaq?
13:33
Bu gün
74
Ölkə
A
Bakıda və Abşeron yarımadasında yanvarın 17-də hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Cənub küləyi əsəcək, gündüz arabir güclənəcək.

Ekologiya və Təbii Sərvətlər Nazirliyinin Milli Hidrometeorologiya Departamentindən "Ölkə.Az"a verilən məlumata görə, havanın temperaturunun Abşeron yarımadasında gecə 0-3, gündüz 5-7,  Bakıda gecə 1-3, gündüz 5-7 dərəcə isti olacağı gözlənilir.

Atmosfer təzyiqi normadan yüksək 769 mm civə sütunundan 762 mm civə sütununa enəcək, nisbi rütubət gecə 70-80, gündüz 55-60 faiz təşkil edəcək.

Azərbaycanın rayonlarında yanvarın 17-də hava şəraitinin əsasən yağmursuz keçəcəyi, lakin gecə və səhər bəzi dağlıq ərazilərdə yağıntılı olacağı, qar yağacağı ehtimalı var. Ayrı-ayrı yerlərdə duman olacaq. Şərq küləyi əsəcək, arabir güclənəcək.

Havanın temperaturunun gecə 2 dərəcə şaxtadan 3 dərəcəyədək isti, gündüz 5-8 dərəcə isti, dağlarda gecə 7-12, gündüz 0-5 dərəcə şaxta olacağı gözlənilir.

Tibbi-meteoroloji proqnoza əsasən, yanvarın 17-19-da Abşeron yarımadasında qış fəsli üçün səciyyəvi olan hava şəraiti müsbət amil olsa da, atmosfer təzyiqinin enməsi fonunda arabir güclənən gilavar küləyi bəzi meteohəssas insanlarda narahatlıq yarada bilər.

ŞƏRH YAZ
0

Baş Dövlət Yol Polisi İdarəsinin keçmiş əməkdaşı məhkəmə qarşısında

Baş Dövlət Yol Polisi İdarəsinin keçmiş əməkdaşı məhkəmə qarşısında
13:07
Bu gün
418
Ölkə
A
Bu gün Bakı Ağır Cinayətlər Məhkəməsidə Baş Dövlət Yol Polisi İdarəsinin keçmiş əməkdaşı Fərid Azayev, qardaşı Faiq Azayev və ataları İsif Azayevin cinayət işi üzrə məhkəmə prosesi başlayıb.

“Ölkə.Az”-ın xəbərinə görə, hakim Eldar İsmayılovun sədrliyi ilə keçirilən hazırlıq iclasında təqsirləndirilən şəxslərin anket məlumatları dəqiqləşdirilib.

Təqsirləndirilən şəxslər dövlət tərəfindən təyin edilən vəkillərdən  imtina ediblər və öz vəkillərinin iştirak etmələrini istəyiblər. Hakim bunu nəzərə alaraq hazırlıq iclasını yanvarın 23-nə təxirə salıb.

Qeyd edək ki, 2014-cü il dekabrın 22-nə keçən gecə saat 03:00 radələrində Fərid Azayev bir qrup şəxslə cinayət işi üzrə zərərçəkmiş kimi tanınan Sevinc Məmmədovanı və Şəfəq Beydullayevanı oğurlayaraq onlara qarşı seksual xarakterli zorakılıq hərəkətləri etməkdə ittiham olunur. Fərid Azayevə və onun qardaşı Faiq Azayevə qarşı Cinayət Məcəlləsinin (CM) 144.2.1 (iki və ya daha çox adam barəsində törədilən adam oğurluğu), 144.2.3 (bir qrup şəxs, qabaqcadan əlbir olan bir qrup şəxs və ya mütəşəkkil dəstə və ya cinayətkar birlik tərəfindən törədilən adam oğurluğu) və 150.2.1-ci (bir qrup şəxs, qabaqcadan əlbir olan bir qrup şəxs və ya mütəşəkkil dəstə tərəfindən törədilən seksual xarakterli zorakılıq hərəkətləri) maddələri ilə ittiham irəli sürülüb.

Səbail Rayon Məhkəməsinin 16 yanvar 2015-ci il tarixli qərarı ilə Fərid Azayev barəsində 4 ay müddətində həbs qətimkan tədbiri seçilib. Faiq Azayev barəsində isə polisin nəzarəti altına verilmə qətimkan tədbiri seçilib.

Bakı Ağır Cinayətlər Məhkəməsinin hökmü ilə Fərid Azayev 10 il 6 ay və Vüsal Babayev 9 il müddətinə azadlıqdan məhrum edilib. Faiq Azayev 5 il 6 ay müddətinə azadlıqdan məhrum edilib və onun barəsində polisin nəzarətinə verilmə qətimkan tədbiri həbs qətimkan tədbiri ilə əvəz olunub və o, məhkəmə zalında həbs olunub. Sona Kərimova barəsində isə 2700 manatlıq cərimə cəzası kəsilib.

Daha sonra Azayev qardaşlarının atası İsif Azayev də həbs edilib. O və oğulları CM-nin 177-ci (oğurluq) və 182-ci (hədə-qorxu ilə tələb etmə) maddəsi ilə ittiham edilib.
 

ŞƏRH YAZ
0
BAĞLA