Suriyada döyüşən azərbaycanlı bəraət istəyir
Ali Məhkəmədən "Ölkə.Az"a verilən məlumata görə, Rövşən Qədirov kasasiya şikayətində Bakı Apelyasiya Məhkəməsinin qərarının ləğv edilməsini, barəsində bəraət hökmünün çıxarılmasını istəyib.
Rövşən Qədirovun şikayəti hakim Gülzar Rzayevanın icraatına verilib.
İlkin baxış iclası martın 6-na təyin edilib.
İttihama görə, Quba rayonunun sakini Rövşən Qədirov qazanc üçün Türkiyəyə gedib. Orada İbrahim adlı Türkiyə vətəndaşı ilə tanış olub.
İbrahım adlı tanışı Rövşən Qədirova Pakistandakı proseslər, silahlı islamçı qrupların şəriətin müdafiəsi uğrunda fəaliyyəti və onların “müsəlmanlara zülm edənlərə” qarşı mübarizələri haqqında məlumat verib.
İbrahimin təsiri altında Rövşən Qədirov 2009-cu ildə cihad üçün Pakistana gedib və “Yunus” ləqəbli komandirin rəhbərlik etdiyi “Türk camaatı”na qoşulub.
Amma sonradan onun digər mücahidlərlə fikir ayrılıqları yaranıb və 2010-cu ilin martında Türkiyəyə qayıdıb.
2011-ci ilin sentyabrında Rövşən Qədirov yenidən cihadda iştirak etməyə qərar verib. O, bu dəfə Suriyaya yola düşüb.
Amma 2012-ci ilin yanvarında yaralandıqdan sonra Rövşən Qədirov Türkiyəyə qayıdıb.
O, ötən ilin aprelin 17-də Azərbaycana gəlib və bir müddət sonra həbs olunub.
Rövşən Qədirov ittihamları qəbul etməyib, ümumiyyətlə, Pakistanda olmadığını, Suriyaya isə humanitar yardım aparmaq üçün getdiyini bildirib.
Bakı Ağır Cinayətlər Məhkəməsinin hökmü ilə Rövşən Qədirov 10 il müddətinə azadlıqdan məhrum edilib. Hökmdən narazı qalan məhkum apellyasiya şikayəti verib.
Bakı Apellyasiya Məhkəməsinin qərarı ilə onun şikayəti təmin edilməyib.
