Suriyada terrorçuların əvəzinə dinc əhalini kimlər qırır?

Azad Suriya Ordusunu və ABŞ-ın rəhbərliyi altında olan beynəlxalq koalisiya Bəşər Əsədi dinc əhalini qırmaqda ittiham edirlər. Bəşər Əsəd və onuhn tərəfdarları da həm Azad Suriya Ordusunu, həm də beynəlxalq koalisiya qüvvələrini insanların ölümündə günahlandırırlar. Eyni zamanda Rusiya ABŞ-ı, Amerika da rusları dinc əhalinin təlafatında ittiham edir.

Əslində isə günah kimindir?

Azərbaycanlı siyasətçilər məsələyə birmənalı yanaşmır. Politoloq Zərdüşt Əlizadə “Ölkə.Az”a açıqlamasında bildirib ki, hərbi əməliyyatlar zamanı istənilən halda insan təlafatı qaçılmazdır. Onun sözlərinə görə, burada söhbət terrorla mübarizə, insan həyatı deyil, qüvvələrin öz gücünü nümayiş etdirməkdən gedir.

“Sözün düzü onların heç birinə mütləq həqiqət kimi inanmıram. Düşünürəm ki, dinc əhalinin məskunlaşdığı ərazilərdə hərbi əməliyyatlar aparan hər bir qüvvə təlafata səbəb olacaq. Yəni ki, istənilər halda dinc əhalinin ölümü labüddür. Lakin hansı qüvvənin keçirdiyi əməliyyatlarda çox, yaxud az insan təlafatı olub, bu onların məharətindən asılıdır. Şəhərlərdə əməliyyatlara başlayanda hamı bilməlidir ki, dinc əhali qırılacaq. Terorçular hücumlardan müdafiə olunarkən dinc əhalidən canlı sipər kimi istifadə edirlər. Bu onların taktikasıdır”, - deyə politoloq bildirib.

Z. Əlizadə Suriya kimi abad dövlətin xaraba qalmasında təəssüfləndiyini deyir:

“Suriya kimi abad dövləti Qərb ölkələrinin fəal iştirakı ilə dağıdırlar. Bunların da əsas günahı Bəşər Əsəd rejimindədir. Gərək Əsəd işi elə quraydı, xalqla hökumət vəhdətdə olaydı ki, kimsə gedib xarici qüvvələrdən kömək istəməyəydi. Ölkə başçısı o idi və məsuliyyət onun boynuna düşürdü”.

Bununla belə, siyasətçi Suriyada dinc əhalinin qırılmasında əsas günahı ABŞ və Qərb ölkələrində görür: “Müstəqil bir dövlətin ərazisinə soxulub, hökumətin rəsmi icazəsi olmadan, orada hərbi əməliyyatlar aparmaq olmaz. Özlərini beynəlxalq hüququn təminedicisi elan edən dövlətlərin isə burada böyük günahı var. Suriyada dinc əhalinin kütləvi qırılmasında ABŞ, Fransa və başqa Qərb dövltlərinin böyük günahı var”.

Z. Əlizadə deyir ki, Rusiya, Hizbulla və İran Suriya hökumətinin çağırışı ilə ora gediblər: “Onların Suriyada keçirdiyi hərbi əməliyyatlar qanuni sayılır. Qalan dövlətlərin orada hərbi əməliyyatı qanunsuzdur. Əslində terrorla mübarizə apararkən, onu yaradan kökləri aradan qaldırmaq lazımdır. Terrorun kökləri isə dünyanı başına alan ədalətsizlikdir. Bunu da yaradan ABŞ və Qərb dövlətləridir”.

Ziya Səccad
Ölkə.Az