Sürücülər 110 km/saatlıq yolda aşağı sürətlə radara düşdülər
Buna görə də onlara protokol göndərilib. Maraqlı maqam ondadır ki, protokolda radar olan ərazi magistral yolun 209 km-i göstərilib. Ancaq radar yolun 211-ci km-də yerləşir.
"Ölkə.Az"ın Xezerxeber.az-a istinadən məlumatına görə, sürücülərdən biri 101, o biri 104, digəri isə 105 km/saatla radara düşüblər. Həmin yolda sürət həddi isə 110 km/saatdır.
Sürücülərin iddia etdiyi yol Bakı-Qazax yolunun 211-ci km-liyi Ucar rayon ərazisidir. Ucar rayon Şilyan kənd sakinləri Kamil Əhmədov, Şamo Həsənov və Rusif Əliyev Ucardan Bakı istiqamətində hərəkətdə olarkən radara düşüblər.
Yol hərəkəti üzrə ekspert Ərşad Hüseynovun sözlərinə görə, bu texniki səhvdən əlavə sürət həddinin göstəriləndən aşağı olması səbəbindən də baş verə bilər. Ona görə də həmin sürücülər dyp.gov.az saytının şikayətlər bölməsinə yazmalıdır. Məsələ araşdırıldıqdan sonra onlara cavab məktubu göndəriləcək. Protokol hansısa bir texniki səhv ucbatından göndərilibsə, ləğv olunacaq.
