Taksiləri hədəf seçən şəxslərin məhkəməsi başladı
“Ölkə.Az”ın xəbərinə görə, cinayət məcəlləsinin 181.2.2-ci (quldurluq) maddəsi ilə təqsirləndirilən Rüstəmzadə Kamil Sərraf oğlu və Qarazadə Miqdar Adil oğlunun məhkəmə prosesinə hakim Mirzə Xankişiyev sədrlik edir. Cinayət işində 4 nəfər zərərçəkən taksi sürücüsü var.
Belə ki, Kamil və Miqdar quldurluq əməllərinə ötən ilin sentyabr ayından başlayıblar. Taksidə olan müştərilər digər müştəriyə qarşı quldurluq ediblər. Yaşlı kişini döyən iki dost daha sonra onun bahalı mobil telefon və pulunu götürüblər. Hadisə gecə saatlarında Abşeron rayonunda baş verib. İntiqam Əsədzadə rayon polis idarəsinə məlumat verib ki, toy məclisindən çıxıb evinə gedərkən taksidə olan iki nəfər onu Aşağı Güzdək qəsəbəsində avtomobildən düşürərək döyüb. Zərərçəkmiş həmçinin hadisə zamanı 700 manatlıq mobil telefonun və 300 manat pulunun da aparıldığını qeyd edib.
Dərhal əməliyyata başlayan polis quldurluqda şübhəli bilinən Bakı sakini Kamil Rüstəmzadə və Sabirabad sakini Miqdar Qarazadəni saxlayıb.
Dindirilərkən adı çəkilən şəxslər gecə vaxtı cinayət törətmək məqsədi ilə metronun ''20 yanvar'' stansiyası yaxınlığına gəldiklərini deyiblər.
Ağır cinayət törədən dostlar daha sonra paytaxtın Nəsimi rayon metronun ''Əcəmi'' stansiyası yaxınlığına gələrək mobil telefonu orada satıblar. Quldurluq yolu ilə əldə olunan pulu isə bölüblər. Abşeron Rayon Polis İdarəsindən verilən məlumata görə, Kamil Rüstəmzadə və Miqdar Qarazadə paytaxtın müxtəlif rayonlarında həm quldurluq, həm də oğurluq cinayətləri də törədiblər.