Tanınmış diplomat: “Qarabağda yenidən müharibə baş verə bilər”

Bu fikirləri “Ölkə.Az”a eksklüziv açıqlamasında Türkiyənin sabiq xarici işlər naziri, tanınmış diplomat Hikmət Çətin bildirib. 

Sabiq nazir deyib ki, SSRİ dağıldıqdan sonra ötən əsrin 90-cı illərində dünyada meydana çıxan münaqişələri Çin, Rusiya, ABŞ və digər böyük dövlətlərin həll edəcəyinə ümid edilirdi: 

“Ancaq dünyadakı problemləri həll etmədilər. Əksinə, daha da alovlandıraraq, idarə etməyə başladılar. Ötən 25 il ərzində hansı problem həll edildi? Gürcüstan, Moldova və Azərbaycandakı problemlər hələ də qalır. Dağlıq Qarabağ münaqişəsi həll edilmədən Cənubi Qafqaz ölkələrində əbədi sülh olmayacaq. Baxmayaraq ki,  son illər Azərbaycan iqtisadiyyatı sürətlə inkişaf edir. Amma Dağlıq Qarabağ problemi həll edilmədən, regionda əbədi əmin-amanlı və təhlükəsizlik olmayacaq. Baxın, 2016-cı ilin aprel hadisələri ilə Dağlıq Qarabağ müharibəsi bir anın içərisində alovlandı. Halbuki, həmin vaxta qədər beynəlxalq güclər dünyanı inandırmağa çalışırdı ki, daha Dağlıq Qarabağ problemi alovlanmayacaq və sairə. Amma müharibə bir anın içərisində baş verdi. Nə qədər insan ölümü oldu. Bütün bunlar bir daha onu göstərir ki, Dağlıq Qarabağ münaqişəsinin tezliklə həlli vacibdir. Əks halda bu problem yeni müharibəyə gətirib çıxara bilər”. 

Son vaxtlar Türkiyə, Rusiya, İran və Azərbaycan dövlətlərinin birliyi ilə formalaşan formatın Dağlıq Qarabağ münaqişəsinin həllinə təsiri məsələsinə də toxunan H.Çətin vurğulayıb ki, bu problemin həllinin başında ABŞ və Rusiya dövlətləri dayanır:

“Başda ABŞ və Rusiya olmaqla, Türkiyə, İran və digər region dövlətləri bir araya gəlib, Qarabağ probleminin sülh yolu ilə həllinə nail olmalıdır. Zaman ötdükcə, problem həll edilmirsə, burada ən böyük itirən tərəf Ermənistandır. Ermənistan həm iqtisadi, həm siyasi, həm də sosial baxımdan daha çox itirir. Çox təəssüf ki, böyük dövlətlər Dağlıq Qarabağ münaqişəsinin həllində maraqlı deyillər. Ona görə də problem 20 ildən çoxdur ki, davam edir. Ancaq Qarabağ münaqişəsi hər an alovlana və dərinləşə bilər. Burada müharibənin də olması istisna deyil. Heç bir dövlət istəyərək, ağılla müharibə etmək istəməz. Müharibə etmək, qan tökmək həll yolu deyil. Ancaq elə vəziyyətlə üzləşər ki, məcbur olub müharibəyə başlaya bilər. Əgər sülh danışıqlar müsbət nəticə verməzsə, hər an müharibə alovlana bilər. Bütün bunların baş verməməsi üçün də Dağlıq Qarabağ münaqişəsi ədalətli şəkildə sülh yolu ilə həll edilməlidir”.   

Ramal Hüseynli
Ölkə.Az