"Təhminə və Zaur"un rejissorundan yazıçı Anara cavab — Hətta qonorar tələbi olarsa...

15:15
16.10.2018
8623
Mədəniyyət
A
"Təhminə və Zaur" serialının rejissoru Sain Qəhrəman Xalq yazıçısı Anarın "Serialı “Təhminə və Zaur” yox, “Tahir və Zöhrə” adlandırardılar" iradına cavab verib.

 Rejissor "Ölkə.Az"-ın əməkdaşıyla söhbətində bildirib ki, sözgedən ekran işi öncədən yazıçıyla razılaşdırılıb:

"Anar müəlim böyük sənətkarımızdır, hamımızın hörməti var. Biz onun povestinin motivləri əsasında serial çəkirik. Serialdan anlayışı olan şəxs bilir ki, bu necə çəkilir, necə yazılır. Türklər də, dünyanın digər ölkələrinin rejissoru da serialı belə çəkirlər. Sözün açığı, onun əsərlərinə qoyulan tamaşalardan da xoşu gəlmir". 

Əməkdaşımızın ""Təhminə və Zaur" serialın populyarlıq qazanması naminə seçilmiş addırmı" sualına rejissor belə cavab verib:

"Populyarlıq boş şeydir. İndi filan adla reytinq qazanacağam, populyarlıq əldə edəcəyəm kimi şey yoxdur. Sabah yerindən duran hansısa ssenarist elə bir şey yazar ki, bütün əsərləri əzib keçər. Serial gündəlik tələbatdır, insanların baxa biləcəyi bir şeydir. Ssenari müəlliflərinin təklifiylə ortaq qərara gəlib, bu adı seçmişik. Mənim də iştirakımla Anar müəllimlə görüşümüz oldu, tretmantı ona göstərdik, xeyir-dua verdi. Ona hörmətsizlik etməmişik və etmərik də. Qarşıda iki yüz bölüm var. Təbii ki, iki yüz bölüm davam etməsi üçün orada nəsə baş verməlidir. Onun yazdığı isə cəmi bir bölümlükdür. Özünə də demişdik ki, hadisələri genişləndirəcəyik. Serialda Təhminə və Zaur problemiylə yanaşı, bir neçə problem də qoymuşuq. Biz əgər serialda Anar bəyin yazdıqlarının motivlərini çəkib, adını "Tahir və Zöhrə" qoysaydıq, bu, hörmətsizlik olardı. Görüşümüzdə də qonorar söhbəti olmayıb. Hətta qonorar tələbi olarsa, bu işlə mən məşğul olmuram. Mənim işim seriala quruluş verməkdir". 

Qeyd edək ki, Xalq yazıçısı Anar "525-ci qəzet"ə açıqlamasında müəllifi olduğu "Beşmərtəbəli evin altıncı mərtəbəsi" əsəri əsasında lentə alınan ekran işini tənqid edib. O bildirib ki, serialın ssenarisi ona göstərilməyib: 

"Ssenarini (əgər o doğrudan da vardırsa) mənə göstərmədilər. Bir müddət sonra eşitdim ki, hazır filmi TV kanalı nümayiş etdirir. Bir seriyasına baxdım və bu mənə bəs elədi. Tam məsuliyyətlə bəyan edirəm ki, bu serialın mənə, mənim əsərimə heç bir dəxli yoxdur. Serialın adı, dediyim kimi, pyesimdən alınıbdırsa da, personajlar romanın qəhrəmanlarının adlarını daşıyırlarsa da, bu serialda tamamilə başqa hadisələr cərəyan edir, tamam başqa süjet qurulub (əgər buna süjet demək olarsa), xarakterlər bambaşqadır, mənim obrazlarıma qardaş-bacılar, qohum-əqraba uydurublar, bir sözlə, təlqin olunan fikirlər, ideya, məzmun, davranış və danışıq tərzi mənim mətnlərimdən yer-göy qədər fərqlidirlər. Odur ki, bir daha təkrar etməyə məcburam, “Təhminə və Zaur” adıyla teleekrana çıxarılanların çırpışdırılmış adlardan başqa mənim əsərimə heç bir aidiyyatı yoxdur. Bu əsəri, məsələn, “Tahir və Zöhrə” də adlandırmaq olardı. Bəzi tanışlarım məsləhət görürdülər ki, müəllifləri bu pirat hərəkətlərinə görə məkəməyə verim. Razı olmadım, bunu etsəydim, dolayı yolla bu əsərin nə şəkildəsə mənə aid olduğunu etiraf etmiş olardım. Filmin bədii səviyyəsinə gəlincə, yalnız bir seriyasına baxmaqla özgələrin işinə qiymət vermək istəmirəm. Serialın başqa bölümlərinə baxmamışam və baxmağa da nə niyyətim, nə həvəsim var".

Xatırladaq ki, quruluşçu rejissoru  Sain Qəhrəman olan serialda  Təhminə obrazını Natavan Ələkbərova, Zaur rolunu Cövdət Şükürov, Spartakı isə Cavidan Novruz oynayır.

İntiqam VALEHOĞLU
Ölkə.Az

ŞƏRH YAZ
0

“Ulduz” filminin “Nazik”i vəfat etdi

“Ulduz” filminin “Nazik”i vəfat etdi
15:43
Bu gün
450
Mədəniyyət
A
Aktrisa Məleykə Ağazadə aprelin 24-də 90 yaşında dünyasını dəyişib.

"Ölkə.Az" xəbər verir ki, bu barədə news24.az-a aktrisanın oğlu Zeynal Ağazadə məlumat verib.

O bildirib ki, anası son illər yüksək qan təzyiqindən əziyyət çəkirdi. 

Mərhum aktrisa Bakıda dəfn edilib. Bu gün aktrisanın Təzə Pir məscidində üç mərasimi keçirilir.

Qeyd edək ki, Məleykə Ağazadə 3 sentyabr 1929-cu ildə Bakıda anadan olub. 13 yaşında istedadı və çıxışlarına görə “Qafqazın müdafiəsinə görə” medalı ilə təltif olunub. O, 1956-cı ildən 1963-cü ilə qədər Musiqili Komediya Teatrında 40-a yaxın tamaşada oynayıb.

1972-ci ilə qədər filmlərə çəkilib. Məleykə Ağazadənin ən məşhur rolu “Ulduz” filmində yaratdığı “Nazik” obrazıdır.

Ölkə.Az

ŞƏRH YAZ
0

"Bacım və ailəsi evimizi əlimizdən alır" — XANIM BƏSTƏKARLA QALMAQALLI MÜSAHİBƏ

15:38
24.04.2019
7218
Mədəniyyət
A
Təxminən 10-12 il öncə ölkənin populyar ifaçıları onun mahnılarını oxuyurdular. Amma son illər sanki yaradıcılığında durğunluq hökm sürür. Daha doğrusu, "UZİ Gülər" kimi tanınan həkim bacısı Gülər İbrahimovanın ailəsiylə aralarındakı qalmaqal belə demək mümkünsə, Sədaqət Arifqızının yaradıcılığını ikinci plana keçirib. Əslində, elə ilk sualım da yaradıcılıqla bağlı oldu, amma görünür iki bacı arasındakı mülk qalmaqalı hələ də bitməyib.

- Sədaqət xanım, yaradıcılığınızda hansı yeniliklər var, hansı müğənnilərlə işləyirsiniz?

- Yaradıcılıq bir yana, hətta atamın adı da az qala yadımdan çıxıb. Bunlar məni o qədər bezdiriblər ki, iki ildir ümumiyyətlə yaradıcılıqla məşğul ola bilmirəm. 

- Kimlər?

- Bacım və bacımın oğlu.

- Mətbuatda bu barədə oxumuşdum. Amma istərdim ki, özünüzdən ətraflı eşidək.

- 2010-ci ildə oğlum Ağası Hüseynov həyat yoldaşı və iki övladıyla birlikdə bir illik Amerikaya getdi. Amerikaya iş qurmaq üçün getmişdi. Elə oldu ki, 12 yaşlı nəvəm ağır xəstələndi və Bakıya dönməli oldular. Nəvəm Nyu-Yorkda əməliyyat olunsa da, heç bir xeyri olmadı və 2011-ci ildə uşağı itirdik. Həmin ərəfədə oğlum yeni tikilən binadan dörd otaqlı mənzil almışdı. O mənzildə oğlum ailəsiylə cəmi səkkiz ay yaşayıb Amerikaya köçmüşdü. Nəvəmin yas məclisini verdik. Təbii ki, oğlum və gəlinim, hamımız çox pis haldaydıq. Oğlum dedi ki, bu mənzildə yaşaya bilmirəm, hər şey mənə uşağı xatırladır, evimi satıram. Oğlum atası ilə birlikdə həmin mənzili satdı. Bacımın oğlu Fuad İbrahimov dedi ki, sənin başın yasa qarışdığından yaxşı mənzil axtarıb tapa bilməyəcksən, sənin üçün yaxşı ev taparam. Fuad  "Lider" telekanalının yaxınlığındakı binalardan birinə köçmüşdü, oğluma da həmin binadan ev tapdı. "Tamam MTK"-ya aid binadakı mənzil isə qohumumuzun idi.  Fuad gəldi ki, pulu ver, aparım alqı-satqını edim. Fuadın anası-bacım Gülər İbrahimova çox vaxt xəstə olub deyə, o uşaqlara da anamla mən baxmışam. Fuadı öz balalarımdan ayırmamışam, qucağımda böyüyüb. Ona görə də oğlum Fuada inandı. Oğluma mənzil təklif etdiyi binanın isə nə kupçası, nə orderi yoxdur, yalnız müqaviləylə alqı-satqı olunur. Halbuki neçə ilin binasıdır. Mənzili də Günel adlı qohumumuza atası Lütfi almışdı, sonradan ərə getdi və atası dedi ki, evi satıram, qızımın mənzilə ehtiyacı yoxdur. Fuadın vasitəsilə alqı-satqı edildi və mənzil oğlumun adına alındı. İki il o mənzildə yaşadıqdan sonra oğlum dedi ki, burada özümə yer tapa bilmirəm, yenidən Amerikaya köçürəm. Çünki Ağası övladının dərdini unuda bilmirdi. İki il sonra bacımın oğlanları Rəşad, Taleh və Fuad İbrahimovlar, bacımın əri, Ağasının atası qonaqlıq edib oğlumu yola saldılar.

- Sədaqət xanım, bir ara kürəkəniniz barədə də mətbuatda məlumatlar yayılırdı...

- Bəli, bundan sonra kürəkənim barədə mətbuatda xoşagəlməz yazılar dərc edilməyə başladı.   Sonra mənim fotolarımı saytlara, səhifələrə qoyub yazdırırdılar ki, ucuz mahnılar müəllifi, əlli manata mahnı yazır. Halbuki heç bir mahnıma görə müğənnidən pul almamışam. Nəvələrimin, qızımın fotosunu paylaşıb xoşagəlməz sözlər yazırlar. Biz də dəli olmuşuq ki, bunları kim yazır, kim yazdırır. Yaxşı adamların sayəsində öyrəndik ki, bu yazıları yazan bacım oğlu Fuadla, bacımın həyat yoldaşıdır. Ondan sonra istər-istəməz aramız dəydi. Əslində, nəvəmin hüzr məclisindən aramız dəymişdi, münasibətlər soyumuşdu. Halbuki o yazılar gedən ərəfədə Ağası Fuada demişdi ki, bu yazıların altından sən çıxsan, məndən incimə. Fuad da dedi ki, sən nə danışırsan, əsla mən deyiləm. 

- Hüzr ərəfəsində bacınızla aranızın dəyməsinə səbəb nə idi?

- Nəvəmin səhhəti pisləşən gün bacım toyda imiş. Onu dəfələrlə yığdım, cavab vermədi. Sonradan öyrəndim ki, bacım zənglərimi görüb deyirmiş ki, yəqin nəvəsinin vəziyyəti pisləşib. Bizim evdəki yasdan bir gün sonra isə ailəlikcə toya getmişdilər. Demişdi ki, sənin dərdindən mənə nə? Bir nəfərdən də eşitdim, deyib ki, Allah kimə nə dərd verdiyini bilir. 

- Bəs bacınız oğlunun sizin oğlunuzu məhkəməyə verməyinə səbəb nə idi?

- Günlərin birində Amerikaya faksla bildiriş göndərilir ki, Ağası Hüseynov, sizi Fuad İbrahimov məhkəməyə verib. Guya o vaxt evi Fuad alıb və bu ev onun adına keçməlidir. Sonradan Fuad belə bir söhbət uydurdu ki, Ağasının mənə borcu var. Fuadın sənə necə borcu ola bilər ki, 17 yaşından işləyib, iki universitet bitirib, gömrük idarəsində qaçaqmalçılığa qarşı mübarizə idarəsində rəis müavini olub, atası da normal yaşayıb. Fuadın sənin puluna ehtiyacı ola bilməz axı. Ağasının qızı vəfat edəndə 32-33 yaşı var idi, imkanı da yaxşı idi. Niyə səndən borc almalıdır ki? Fuad yazır ki, Ağası Amerikaya borca görə qaçıb. Amma Ağasını onların Amerikaya necə təmtəraqla yola salmağının videosu da var. Qaçan adamı o cür təntənə ilə yola salarlarmı? Sadəcə, bilinəndən sonra ki, sən nəslimizdən, qohum-əqrəbadan anonim yazılar yazırsan, aranız dəydi.  Kürəkənimi məhkəməyə verməyə gücü çatmadığı üçün oğlumu məhkəməyə verdi və qaynatası ilə qayınını şahid qoydu. Guya ki Ağası mənzilin pulunu Fuada verməyib. Üç ildir məhkəmə gedir. Əvvəlcə onlar məhkəməni uddular, sonradan biz qalib gəldik. İndi də məhkəmənin qərarı olmaya-olmaya deyirlər ki, mənzili boşaldın. Hazırda o mənzildə oğlumun atası yaşayır. Binanın sahibi də, hüquqşünası da deyir ki, mənzil Fuadındır. Belə şey heç yerdə görülməyib. 

- Maraqlıdır ki, məhkəmə prosesləri gedir və oğlunuzla gəlininiz hələ də Amerikada yaşayırlar.

- Gəlinim hazırda Amerikada universitetdə oxuyur, gec-tez qayıdacaqlar və olan-qalan bir mənzilləri var. Sən niyə mənim oğlumun mənzilinə yiyələnməlisən? Oğlumun antikvar maşınını öz adına keçirdi. Halbuki o məsələdə də saxtakarlığa yol vermişdi. Sadəcə, maşın məsələsində gördü ki, biz bacarmadıq, bunun qolu güclü çıxdı. İndi də oğlumun mənzilinə əl atır. Sənin dörd-beş yerdə mənzilin var, hardan aldığını da soruşan yoxdur. Amma Ağasının dərdi başından aşır, övladını itirib, valideynləri xəstədir. Bunu Elgiz Əkbərin verilişində də demişəm ki, onsuz da bizim həyatımız bundan sonra boz rəngdədir, oğlum yeganə qızını itirib. Amma sən deyirsən ki, hər şeyinizi alacam, sizi dilənçi edəcəm. Sizə göstərə də bilərəm ki, Elgizin verilişindəki çıxışımın altından nə qədər şər-böhtan, təhqir yazdılar.  Yasamal rayonu 29-cu polis bölməsinə verdim, məlum oldu ki, ərəb nömrəsiylə başqa adama yazdırırlar. Qızımın, oğlumun, özümün haqqında ağızlarına gələni yazırlar, yazdırırlar. Nazir müavini olan qohumları var, ona arxayındırlar. Bizim də başqa əlacımız qalmayıb, ölkə rəhbərliyinə müraciət etmişik. Mənzilini aldığımız Güneli məhkəməyə aparıb. Güneldən soruşublar ki, mənzili Fuada satmısan, yoxsa Hüseynov Ağasıya? Günel də deyib ki, Ağasını tanımıram. Bəs sən necə Ağasını tanımırsan ki, ev Ağasının adınadır, kommunal ödənişlər edilir. Günelin atasına zəng vurdum ki, sənin qızına ayıb deyil, axı pulu biz vermişik. Atası da getdi məhkəmədə ifadə verdi ki, mənzili Hüseynov Ağasıya satmışıq, pulumuzu da qəpiyənə qədər almışıq. Fuad isə deyir ki, pulu özümdən vermişəm, Ağası mənə 85 min borcludur. Özündən rəqəmlər kəşf edir. Yoldaşıma da şər atdılar ki, guya Fuadın qayınatasından altmış min borc alıb. Həmin qayınata isə təqaüdlə dolanan kasıb adamdır. Mənim yoldaşım da tanınmış həkimdir, alimdir, uzun müddət 2 nömrəli tibb məktəbinin direktoru müavini işləyib,  bir müddət isə direktor vəzifələrini icra edən şəxs olub.  Sizcə, belə bir adam mənim bacımın su satan qudasından altmış min borc alar? Biz həmin məhkəməni udduq.  Əslində,  bu məsələ barədə danışmaq istəməzdim, amma bıçaq sümüyə dirənib. Oğlumun mənzilini niyə ona verək?  On iki yaşlı məsum nəvəmin qəbrinə and içirəm ki,  bizim bacıma, bacımın ailəsinə, övladlarına borcumuz yoxdur. "Quran"a da əl basaram. 

İntiqam VALEHOĞLU
Ölkə.Az

ŞƏRH YAZ
0
BAĞLA