Tərəvəzçilik Elmi Tədqiqat İnstitutu publik hüquqi şəxsə çevrilir — FƏRMAN

Tərəvəzçilik Elmi Tədqiqat İnstitutu publik hüquqi şəxsə çevrilir
19:00
20.06.2019
3438
Siyasət
A
Prezident İlham Əliyev Azərbaycan Respublikası Kənd Təsərrüfatı Nazirliyinin tabeliyindəki Tərəvəzçilik Elmi Tədqiqat İnstitutunun fəaliyyətinin təkmilləşdirilməsi barədə fərman imzalayıb.

"Ölkə.Az"ın məlumatına görə, fərmanla Azərbaycan Respublikası Kənd Təsərrüfatı Nazirliyinin tabeliyində olan Tərəvəzçilik Elmi Tədqiqat İnstitutu Azərbaycan Respublikası Kənd Təsərrüfatı Nazirliyinin tabeliyində publik hüquqi şəxs statusu olan Tərəvəzçilik Elmi Tədqiqat İnstitutuna çevrilmə yolu ilə yenidən təşkil edilir.

2. Bu Fərmanın 1-ci hissəsində nəzərdə tutulmuş publik hüquqi şəxsin fəaliyyətə başlaması və nizamnamə fondunun formalaşdırılması üçün Azərbaycan Respublikasının 2019-cu il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikası Kənd Təsərrüfatı Nazirliyinə 1 (bir) milyon manat ayrılsın.

3. Azərbaycan Respublikasının Nazirlər Kabineti:

3.1. Azərbaycan Respublikası Prezidentinin aktlarının bu Fərmana uyğunlaşdırılması ilə bağlı təkliflərini üç ay müddətində hazırlayıb Azərbaycan Respublikasının Prezidentinə təqdim etsin;

3.2. Azərbaycan Respublikası Nazirlər Kabinetinin normativ hüquqi aktlarının bu Fərmana uyğunlaşdırılmasını üç ay müddətində təmin edib Azərbaycan Respublikasının Prezidentinə məlumat versin;

3.3. mərkəzi icra hakimiyyəti orqanlarının normativ hüquqi aktlarının bu Fərmana uyğunlaşdırılmasını nəzarətdə saxlasın və bunun icrası barədə beş ay müddətində Azərbaycan Respublikasının Prezidentinə məlumat versin;

3.4. bu Fərmandan irəli gələn digər məsələləri həll etsin.

4. Azərbaycan Respublikasının Kənd Təsərrüfatı Nazirliyi bu Fərmanın 1-ci hissəsində nəzərdə tutulmuş publik hüquqi şəxsin:

4.1. təsisçisinin “Publik hüquqi şəxslər haqqında” Azərbaycan Respublikası Qanununun 8.2-ci maddəsində qeyd edilən səlahiyyətlərini həyata keçirsin;

4.2. nizamnaməsini, optimallaşdırma həyata keçirilməklə strukturunu, işçilərinin say həddini iki ay müddətində təsdiq etsin;

4.3. dövlət qeydiyyatına alınması üçün onun nizamnaməsi təsdiq edildikdən sonra üç gün müddətində “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanunu ilə müəyyən edilmiş qaydada Azərbaycan Respublikasının Vergilər Nazirliyinə müraciət etsin.

5. Azərbaycan Respublikasının Maliyyə Nazirliyi:

5.1. bu Fərmanın 2-ci hissəsində göstərilən məbləğdə maliyyələşməni müəyyən olunmuş qaydada təmin etsin;

5.2. “Azərbaycan Respublikasının 2019-cu il dövlət büdcəsi haqqında” Azərbaycan Respublikası Qanununun tətbiqi ilə bağlı bir sıra məsələlər barədə” Azərbaycan Respublikası Prezidentinin 2018-ci il 22 dekabr tarixli 431 nömrəli Fərmanının 1.1.3.9-cu yarımbəndi üzrə Tərəvəzçilik Elmi Tədqiqat İnstitutuna nəzərdə tutulmuş vəsaitin qalığının müvafiq olaraq bu Fərmanın 1-ci hissəsində göstərilmiş publik hüquqi şəxsin hesabına köçürülməsi ilə bağlı tədbirlər görsün və həmin publik hüquqi şəxsin saxlanılması üçün tələb olunan vəsaiti növbəti illərdə dövlət büdcəsinin layihəsində nəzərdə tutsun.

6. Azərbaycan Respublikasının Əmlak Məsələləri Dövlət Komitəsi Tərəvəzçilik Elmi Tədqiqat İnstitutunun istifadəsində olan dövlət əmlakının bu Fərmanın 1-ci hissəsində nəzərdə tutulmuş publik hüquqi şəxsin balansına verilməsi ilə bağlı tədbirlər görsün.

7. Bu Fərmanın 1-ci hissəsində nəzərdə tutulmuş publik hüquqi şəxs “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanunu ilə müəyyən edilmiş qaydada dövlət qeydiyyatına alındığı günədək Tərəvəzçilik Elmi Tədqiqat İnstitutu öz fəaliyyətini davam etdirsin.

8. Azərbaycan Respublikasının Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların bu Fərmana uyğunlaşdırılmasını təmin edib Azərbaycan Respublikasının Nazirlər Kabinetinə məlumat versin.

ŞƏRH YAZ
0

"Bu ilin 6 ayında ölkə iqtisadiyyatına 6 milyard dollardan çox sərmayə qoyulub" — Deputat

16:35
Bu gün
6
Siyasət
A
"2019-cu ilin birinci yarısının göstəriciləri onu deməyə əsas verir ki, Azərbaycan Prezidenti İlham Əliyevin ölkə iqtisadiyyatının enerjidən asılılığının azaldılması məqsədi ilə qeyri-neft sektorunun inkişafı istiqamətində həyata keçirdiyi məqsədyönlü islahatlar artıq öz bəhrəsini verməkdədir".

Bunu “Ölkə.Az”a açıqlamasında millət vəkili Rüstəm Xəlilov deyib.

Onun sözlərinə görə, qeyri-neft sektorunun kompleks inkişafı ilə bağlı  genişmiqyaslı proqramlar  nəzərdə tutularaq həyata keçirilməkdədir. “Həyata keçirilən bu islahatlar nəticəsində regionlarda yaradılan biznes mühiti, kənd təsərrüfatı və sənayenin inkişafı üçün infrastruktur artıq öz bəhrəsini verməkdədir və bölgələrdə məşğulluğun təmin olunmasında əsas rol oynayır. Qarşıya qoyulan  hədəflərə nail olunur. Məhz bunun nəticəsidir ki,  cari ilin altı ayında qeyri-neft sektorunda 3,2 faiz artım qeydə alınıb. Qeyri-neft sektorunda sənayeləşməyə verilən diqqət nəticəsində bu sahədə 15,7 faizlik artıqm qeydə alınıb. Sənayenin qeyri-neft sektoru sürtələ inkişaf etməkdədir. Bildiyiniz kimi, son dövrlərdə karbamid zavodu, “SOCAR-Polymer” zavodunun istifadəyə verilməsi bunun bariz nümunəsidir”.

Deputat əlavə edib ki, islahatlar nəticəsində kənd təsərrüfatında da rekord göstəricilərin  əldə edilməsinə nail olunub. “ Kənd təsərrüfatı bu ilin altı ayında 13 faiz artıb. Bu, onu göstərir ki, qoyulan investisiyalar, aparılan islahatlar, verilən subsidiyalar, kənd təsərrüfatına elmi yanaşma öz nəticəsini verməkdədir. Əminəm ki, gələcək illərdə kənd təsərrüfatı dayanıqlı şəkildə inkişaf edəcək və beləliklə, həm məşğulluğun, eyni zamanda, kənd təsərrüfatı ixracının artırılmasına xidmət göstərəcək”.
Deputat deyib ki, həyata keçirilən islahatlar həm xarici, həm də daxili sərmayədarlar üçün cəlbedici mühit yaradıb. “Rəsmi statistikaya nəzər salsaq, o zaman görərik ki, 2019-cu ilin 6 ayında ölkə iqtisadiyyatına 6 milyard dollardan çox sərmayə qoyulub. Bu sərmayənin böyük hissəsi qeyri-neft sektoruna qoyulan sərmayədir. Qeyri-neft sektorunun inkişafı ilə bağlı regionlarda  9 sənaye parkı və məhəllələri yaradılıb. Yaradılan sənaye parkları və məhllələrinə 5,7 milyard manat həcmində sərmayə qoyulub. Bu layihələrin yerinə yetirilməsi nəticəsində 11 mindən çox yeni iş yeri açılıb. Eyni zamanda, bu layihələrin fəaliyyəti nəticəsində artıq 1,5 milyard manatlıq məhsul istehsal olunub ki, onun da 300 milyon manatlıq hissəsi ixraca yönəlib”- deputat bildirib.

İnvestisiyaların təşviqinə gəldikdə deputat qeyd edib ki, bu  sahədə də  görülən işlər regionların inkişafına müsbət təsir göstərir və investisiyaların təşviqi mexanizmi uğurlu nəticələr verir: “Bu günədək 400-ə yaxın layihə təşviq olunub və onların nəticəsində ölkə iqtisadiyyatına 3,4 milyard manat sərmayə qoyulub. Bunların nəticəsində 16 mindən çox yeni iş yerinin açılması artıq reallaşıb”. 

Deputat əlavə edib ki,  biznes mühitinin yaxşılaşdırılması istiqamətində çox ciddi addımlar atılıb. “Bu islahatlar beynəlxalq qurumlar tərəfindən də müsbət dəyərləndirilir. Dünya Bankının “Doing Business” proqramı çərçivəsində Azərbaycan 10 ən islahatçı ölkə kimi tanınır. Ölkəmiz hazırda 25-ci yerdədir. Əlbəttə ki, bu, Azərbaycana investisiyaların cəlb edilməsi üçün müsbət rol oynayır və oynayacaq. Bütün aparıcı beynəlxalq maliyyə qurumları bu sahədəki fəaliyyətimizi yüksək qiymətləndirir”.

Deputat deyib ki, ölkədə sahibkarlığın inkişafı, biznes mühitinin yaxşılaşdırılması istiqamətində ciddi addımlar atılmaqdadır: “Cari ilin altı ayında sahibkarlara 50 milyon manatadək güzəştli kredit ayrılıb. İlin ikinci yarısında 120 milyon manat həcmində güzəştli kredit veriləcək”. 

R.Xəlilov bildirib ki, ümumiyyətlə, qeyri-neft sektorunun bütün sahələrinin inkişafı istiqamətində xüsusi proqramlar hazırlanıb həyata keçirilməkdədir və bu öz bəhrəsini verir.  “Ölkə başçısının turizm sektorunun inkişafı ilə bağlı həyata keçirdiyi islahatlar, atdığı addımlar  göz önündədir. Görülən işlərin nəticəsidir ki, ölkədə turizm sektorunda canlanma müşahidə olunmaqdadır. Ölkəyə gələn turistlərin sayı ilbəil artmaqdadır. Bütün bunlar Azərbaycanın  dayanıqlı inkişafını təmin edən amillərdir. Azərbaycan Prezidenti cənab İlham Əliyevin yürütdüyü siyasətin əsas qayəsi də respublikanın dayanıqlı inkişafına nail olmaqla, ölkə əhalisinin  rifah halını  və layilqi həyat şəratini təmin etməkdir. Və biz də  həyata keçirilən bu siyasətin nəticələrini görməkdəyik.  Yaxın gələcəkdə bu siyasətin tam reallaşdığının şahidi olacağıq”- deputat bildirib.

Mürtəza
Ölkə.Az

 

ŞƏRH YAZ
0

"Biz belə insanlara mühacir deyə bilmərik” — Fəzail Ağamalı

14:25
Bu gün
487
Siyasət
A
"Araşdırmalar təsdiq edir ki, bu gün Avropada məskunlaşaraq Azərbaycan əleyhinə fəaliyyət göstərənlər siyasi mühacirlər deyil".

Bunu “Ölkə.Az”a  açıqlamasında millət vəkili Fəzail Ağamalı deyib.

Onun sözlərinə görə, bu şəxslər Azərbaycandan hər hansı siyasi təqibə görə getməyiblər.

“Bu gün Azərbaycanda yetərincə müxalifət var və onlardan daha radikal formada fəaliyyət göstərərək, ölkədəki proseslərlə bağlı ən kəskin mövqe sərgiləyirlər. Belə sərt və radikal mövqe  sərgiləmələrinə baxmayaraq, öz fəaliyyətlərini Azərbaycan daxilində davam etdirirlər. Onların fəaliyyətinə isə hər hansı formada məhdudiyyət qoyulmur. Bu, faktdır və kimsə bunu inkar edə bilməz. Bunu inkar etmək günəşin  inkar edilməsinə bənzəyər”- deputat qeyd edib.

Deputat onu da bildirib ki, bununla yanaşı, bu gün  Avropada  Azərbaycanın maraqlarını müdafiə edən və dövlətimizin başını uca edən yetərincə azərbaycanlı mühacirlər də  var. “Lakin buradan  saxta sənədlərlə, fırıldaqçı yollarla gedərək, Avropada məskunlaşan anti-Azərbaycan qüvvələrin, qrupların təsiri altına düşərək, ölkəmizə, onun tanınmış simalarına qarşı ədəbsiz, tərbiyəsiz, təhqiramiz, heç bir mənəvi dəyərlərə sığmayan fəaliyyət göstərirlər və bu, qəbuledilən deyil. Biz belə insanlara mühacir deyə bilmərik”- F.Ağamalı bildirib.

F.Ağamalı əlavə edib ki, bu gün Avropada məskunlaşan həmin mühacir dəstəsinə  mənəvi dəstək verən, onları yönləndirən, informasiya ilə təmin edib, təlimatlandıran müxalif qüvvələr də mövcuddur. “Ölkə daxilində  Avropaya mühacir etmək istəyənlərə saxta  sənəd verib, yola salan şəbəkə mövcuddur. Onların bəziləri hüquq-mühafizə orqanları tərəfindən ifşa olunub. Hesab edirəm ki, hüquq-mühafizə orqanları  belə şəxsləri ifşa etdirmək istiqamətində fəaliyyətini davam etdirməlidir. Bununla bərabər,  saxta, fırıldaq yolla gedib anti-Azərbaycan əleyhinə  fəaliyyət göstərən mühacirlərin  deportasiya olunması üçün Avropa ölkələrinin hüquq-mühafizə orqanlarına, miqrasiya  qurumlarına və digər səlahiyyətli  orqanlarına həmin şəxslərin siyasi mühacir olmaması, saxta sənədlərlə həmin ölkələrdə yerləşməsi barədə sənədlər təqdim etməlidir”- deputat deyib.

Deputat hesab edir ki,  bu məsələdə ictimai qınaq da müstəsna rola malikdir və ona görə də cəmiyyət belə insanları qınaq obyektinə çevirməlidir.

Mürtəza
Ölkə.Az

ŞƏRH YAZ
0
BAĞLA