Tereza Mey işini ehtiyatlı tutur

"Ölkə.Az" xəbər verir ki, İngiltərə iki il ərzində Avropa İttifaqından ayrılacaq.

Tereza Mey Avropa İttifaqı Şurasının sədri Donald Taska yazılan və İngiltərənin ittifaqdan çıxması üçün Lissabon müqaviləsinin 50-ci maddəsini qüvvəyə mindirən məktubu imzalayıb. Maddə qüvvəyə mindikdən sonra müzakirə prosesi ilə İngiltərə 1973-cü ildən bu yana üzvü olduğu Aİ-dən iki il ərzində ayrılacaq.

Azərbaycanlı siyasətçilər isə İngiltərənin bu addımı çox ehtiyatla atdığını düşünürlər. Politoloq Zərdüşt Əlizadə Ölkə.Az-a açıqlamasında bildirib ki, dövlətlər Avropa Birliyindən çıxanda çalışırlar mümkün qədər özləri üçün güzəştli şərtləri saxlasınlar. Onun sözlərinə görə, İngiltərə rəhbərliyi də, çalışır ki, bu addımı atanda ölkənin iqtisadi və siyasətinə böyük zərbə dəyməsin.

“Bu addım İngiltərə dövlətinə böyük itkilər bahasına başa gəlməsin. Məhz buna görə, 2 illik ayrılma müddətində ciddi danışıqlar aparmağı planlaşdırır. Çalışırlar ki, Avropa ilə Böyük Britaniya arasındakı münasibətlərə ciddi xələl gəlməsin. Əgər aydılma şərtləri Fransanın israrı ilə İngiltərə üçün ağır olsa, bu zaman Böyük Britaniya pis vəziyyətə düşə bilər. Danışılardan asılıdır. Avropa Birliyində bu ayrılmanın mümkün qədər yumuşaq şəkildə keçməsini istəyən dövlətlər də var. Vəziyyəti qəlizləşdirmək və problemlər yaratmaq istəyən qüvvələr də var. Əsasən də Fransa istəyir ki, bu ayrılmada İngiltərə itkilərlə qarşılaşsın”, - deyə Z.Əlizadə bildirib.

Ziya Səccad
Ölkə.Az