"Təzə nazir öz komandasını yığacaq"
Keçmiş təhsil nazirinin başqa bir sferaya, yəni vergilər naziri təyin edilməsi sosial şəbəkələrdə müəyyən müzakirələtə səbəb oldu. İctimayətdə belə bir fikir formalaşıb ki, vergilər naziri vəzifəsinə təyin edilən Mikayıl Cabbarov yad sahənin adamıdır. Buna səbəb kimi onun 4 ildir ki, təhsil naziri vəzifəsində çalışması göstərilir.
Mikayıl Cabbarovun vergilər naziri vəzifəsinə təyin edilməsi və ictimaiyyət tərəfindən müzakirə edilən mövzu ilə bağlı iqtisadçı ekspert, Milli Məclisin deputatı Vahid Əhmədov Ölkə.Az-a şərh verib.
Millət vəkili Vahid Əhmədov vergilər nazirliyinin strateji bir sahə olmasını vurğulayaraq bildirib ki, dövlət büdcəsinin təxminən 70%-i vergilər nazirliyi tərəfindən yığılan vergilər hesabına formalaşır:
"Bu nazirlik strateji əhəmiyyətli sahə olduğu üçün prezident İlham Əliyev kadr dəyişikliyi edəndə bunların hamısını götür-qoy edib. Son vaxtlar Fazil Məmmədovun səhətində problemlər var idi. Hesab edirəm ki, bu səbəbdən də o, tutduğu vəzifsindən azad olundu".
Mikayıl Cabbarovun yeni postu ilə bağlı millət vəkili bu fikirləri səsləndirdi:
"Mikayıl Cabbarov təhsil naziri vəzifəsinə təyin edildikdən sonra faktiki olaraq təhsil sahəsində müəyyən islahatara start vermişdi. Bir vaxtlar Mikayıl Cabbarov iqtisadiyyat nazirliyində yüksək vəzifədə çalışıb. Vergilər naziri vəzifəsinə gələn şəxs birinci növbədə islahatlara getməlidir. Orada elə islahatlar həyata keçirilməlidir ki, vergi sistemində, yığımda problem olmasın. Əhali ilə vergi sistemi arasında münasibət üst səviyyəyə gətirilib çıxarılsın. Mikayıl Cabbarov vergilər nazirliyində ciddi islahatlara gedəcəksə heç bir problem olmayacaq. Vergilər nazirliyindəki kadrlara da baxmaq lazımdır. Düzdür, vergilər nazirliyində vergi sistemini bilən kadrlar var. Təzə nazir yəqin ki, öz komandasını yığacaq. O, elə bir komanda formalaşdırmalıdır ki, vergi sistemində normal islahatlar aparılsın, vergidə olan "əyri yollar" ləğv edilsin, şəffaflıq olsun və sahibkarlarla vergi sistemi arasındakı problemlər aradan qaldırılsın".
Səxavət Məmməd
Ölkə.Az
