Tibb bacısı işdə 7 yaşlı oğlunun cəsədi ilə qarşılaşdı — Azərbaycanda tükürpədici olay, FOTO

Tibb bacısı işdə 7 yaşlı oğlunun cəsədi ilə qarşılaşdı
22:13
19.10.2017
640
Hadisə
A
Ötən gün Salyanda dövlət nömrə nişanı məlum olmayan VAZ 2107 markalı avtomobil yüksək sürətlə hərəkətdə olarkən 7 yaşlı uşağı vurub.

“Ölkə.Az”ın “virtualaz.org”a  istinadən məlumatına görə, Ayxan adlı azyaşlı aldığı xəsarətdən xəstəxanaya aparılarkən yolda ölüb, onun qatili isə avtomobillə sürətlə hadisə yerindən uzaqlaşıb. Bu hadisə Azərbaycan yollarında qeyri-peşəkar, yaxud azğın sürücülər üzündən hər gün ölümlə nəticələnən  qətliam kimi qəzaların baş verdiyi bir vaxtda heç kimin diqqətini xüsusi cəlb etməyə bilərdi. Amma nə vaxta qədər? Günahsız insanlar, azyaşlılar nə vaxta qədər bu yol terrorunun qurbanı olacaqlar?

Salyanda baş vermiş bu faciənin dramatik, tükürpədici  tərəfi həm də bundadır ki, avtomobillə vurulan azyaşlının anası Aytəkin Təxirəsalınmaz Tibbi Yardımın Salyan Regional Mərkəzinin tibb bacısıdır. O, həmin gün iki azyaşlı uşağını evdə nənəsinin yanında qoyub növbəyə gedibmiş. Və uşaqlar Bakıdan qonaq getmiş qohumları ilə yaxınlıqdakı ərzaq mağazasına gediblər, bu vaxt sürətlə hərəkət edən avtomobil uşaqlardan birini vurub. Sürücü qaçıb, yaxınlıqdakılar uşağı təcili yardıma çatdırıblar və artıq keçinmiş Ayxanın cansız bədənini baş verənlərdən xəbərsiz olan anası qarşılayıb...

Bu gün Ayxanın Salyanın  “Plastik” massivində, həyətlərində  yas çadırı qurulub. Hadisənin baş verməsinə dair təfərrüatlar da sübut edir ki, bu, ehtiyatsızlıqdan baş vermiş adi qəza, ölüm deyil. Həmin küçədə çoxsaylı mağazaların olduğu, piyadaların sağa-sola keçdiyi ərazidə avtomobilin yüksək sürətlə idarə edilməsi məhz bilərəkdən ölümə səbəb olma kimi qiymətləndirilməlidir.

Ayxanın atası Sabir Əhmədovun  31 yaşı var, işsizdir. Deyir hadisə baş verən gün həyat yoldaşı tibb bacısı  işlədiyi Təxirəsalınmaz Tibbi Yardım Stansiyasının Salyan Regional Mərkəzində iş növbəsində olduğundan Ayxan və 4-cü sinif şagirdi olan qardaşı İlkin qonşuluqda yaşayan nənəsinin yanında idilər.

“Bir-iki saatdan sonra həyat yoldaşım işdən çıxaraq uşaqları götürüb evə dönməli idi...Amma hadisədən bir qədər əvvəl bacımın nişanlısı Cavid Abdullayev bizə gəlib. O, uşaqlarla görüşüb, onlarla birlikdə yaxınlıqdakı mağazaya gedib ki, nəsə alsınlar. Və...”-qəhərdən boğulan ata sözlərinə davam edə bilmir.

Uşağın vurulmasının şahidi olan 20 yaşlı Cavid isə deyir ki, gələn ayın 23-də nişanlısı ilə toyu olacaqdı. Və Cavidlə yaxınları cehizləri aparmaq üçün Salyana gəliblərmiş. Bu zaman Cavid qərara alır ki, yaxınlıqda yerləşən “Ay İşığı” mağazasından evə bir-iki ərzaq alsın. Amma Ayxan və İlkin təkid edirlər ki, onları da özü ilə mağazaya aparsın.

“Uşaqları həm də gəzdirmək fikri ilə əllərindən tutaraq mağazaya apardım. Elə mağazanın qarşısındakı yolu keçirdik  ki, birdən ağ rəngli VAZ-2107-nin yüksək sürətlə bizə tərəf şığıdığını gördüm.Tez sağ əlimlə tutduğum İlkini yolun kənarına atdım, Ayxanı isə xilas etməyə macal tapmadım.Maşın Ayxanı vuraraq 5-6 metr kənara tulladı, mənim də ayağımı əzdi”- həmsöhbətimiz danışır.

Cavid tez yerdə uzanmış uşağa çataraq onu qucağına götürür, ancaq son nəfəsi olduğunu görür. Hadisəni törədən və  üzərinə taksi işarəsi bərkidilmiş “07” isə 50-60 metr gedərək yanacaq doldurma məntəqəsinin yaxınlığında tormozlayır, ancaq bir-iki saniyədən sonra sürətlə uzaqlaşır.

Cavid deyir ki, artıq həyatını itirmiş Ayxan xəstəxanaya çatarkən onları ilk qarşılayanlardan biri təsadüfən uşağın anası Aytəkin olur...Aytəkin gördüklərindən sarsılaraq huşunu itirir. Amma artıq gec idi...

Onu da qeyd edək ki, Ayxan Salyan şəhər 1 saylı orta məktəbin 1-ci sinifinin rus bölməsində təhsil alırmış, dərslərini də yaxşı oxuyurmuş.Amma onun arzuları yarımçıq qırıldı. O bu gün cinayətə səbəb olmuş sürücü məsuliyyətsizliyi ucbatından  “Stansiya” qəbristanlığında torpağa tapşırıldı.

Hüquq-mühafizə orqanları 7 yaşlı  məktəblini vurub öldürərək hadisə yerindən qaşmış sürücünün  axtarışlarını davam etdirilər.

Ölkə.Az

ŞƏRH YAZ
0

Bakıda orta məktəbin zirzəmisində yüzlərlə partlamamış hərbi sursat tapıldı — FOTO

Bakıda orta məktəbin zirzəmisində yüzlərlə partlamamış hərbi sursat tapıldı
01:04
Bu gün
2517
Hadisə
A
Oktyabrın 22-də Daxili İşlər Nazirliyinin "102" Xidməti-Zəng mərkəzi sistemindən və saat 12:09-da Fövqəladə Hallar Nazirliyinin Böhran Vəziyyətlərində İdarəetmə mərkəzindən Azərbaycan Respublikası Ərazilərinin Minalardan Təmizlənməsi üzrə Milli Agentliyə (ANAMA) Bakı şəhəri, Yasamal rayonu, İnşaatçılar prospekti 7 ünvanında partlamamış hərbi sursatın tapılması barədə məlumatlar daxil olub.

ANAMA-dan "Ölkə.Az"a verilən xəbərə görə, məlumatlara əsasən agentliyin xüsusi mobil çevik əməliyyat qrupu, Bakı şəhəri, Yasamal rayon Polis İdarəsinin və Fövqəladə Hallar Nazirliyinin Xüsusi Riskli Xilasetmə xidmətinin əməkdaşları dərhal həmin əraziyə göndərilib.

Agentliyin mütəxəssisləri Daxili İşlər Nazirliyinin Bakı şəhəri, Yasamal rayon Polis İdarəsinin və Fövqəladə Hallar Nazirliyinin Xüsusi Riskli Xilasetmə xidmətinin əməkdaşları tərəfindən birlikdə ərazidə 175 saylı tam orta məktəbin zirzəmisinə baxış keçirilib. Aparılan təcili təxirəsalınmaz operativ əməliyyat-axtarış tədbirləri nəticəsində agentliyin mütəxəssisləri tərəfindən 352 ədəd müxtəlif növ təlim məqsədli partlamamış hərbi sursat aşkar olunub, zərərsizləşdirilməsi üçün götürülərək agentliyin mərkəzi məhvetmə ərazisinə daşınıb.

Partlamamış hərbi sursatların tapıldığı yerin ətrafında 400 kv.m əraziyə yerüstü baxış keçirilib, əlavə təhlükəli əşya və qurğu aşkarlanmayıb.

Ölkə.Az

ŞƏRH YAZ
0

Tovuzda 60 yaşlı kişi naməlum şəraitdə xəsarət aldı, döş qəfəsi və qabırğaları qırıldı

Tovuzda 60 yaşlı kişi naməlum şəraitdə xəsarət aldı, döş qəfəsi və qabırğaları qırıldı
00:08
Bu gün
1062
Hadisə
A
Tovuz sakini naməlum şəraitdə ağır xəsarət alıb.

"Ölkə.Az" trend-ə istinadl məlumat verir ki, hadisə rayonun Düz Cırdaxan kəndində baş verib.

Kənd sakini, 1958-ci il təvəllüdlü Allahyarov Rəfail Qara oğlu sol döş qəfəsi və qabırğaların sınığı ilə Tovuz rayon Mərkəzi Xəstəxanasına yerləşdirilib.

Yaralı yaşadığı evdə yıxılaraq xəsarət aldığını deyib.

Faktla bağlı araşdırma aparılır.

Ölkə.Az

ŞƏRH YAZ
0
BAĞLA