“Trampın İlham Əliyevə məktubu həm beynəlxalq aləmə mesaj, həm də erməni lobbisinə tutarlı cavabdır”
Bunu “Ölkə.Az”a açıqlamasında millət vəkili Rüstəm Xəlilov ABŞ Prezidenti Donald Trampın Azərbaycan Prezidenti İlham ƏIliyevə ünvanladığı məktubu şərh edərkən deyib.
Onun sözlərinə görə, Trampın məktubu bünövrəsi Ulu Öndər Heydər Əliyev tərəfindən qoyulan və hazırda Prezidenti İlham Əliyev tərəfindən yürüdülən strateji inkişaf strategiyasının nə qədər düzgün müəyyənləşdirilməsinin bariz nümunəsidir.
“Ölkə başçısı tərəfindən yürüdülən siyasət Azərbaycanın milli marqlarına tam cavab verməklə yanaşı, dünyanın təhlükəsizlik sisteminə verdiyi rol bu gün dünyanın aparıcı ölkələri tərəfindən yüksək dəyərləndirilməsi təbii ki, qürurverici haldır. Çünki bu fəaliyyətlər, dünyanın təhlükəsizlik sisteminə verdiyi töhfələr, o cümlədən Avropanın enerji təhlükəsizliyinin təmin olunmasındakı xidmətləri, dünyanın alternativ enerji mənbəyi ilə təmin edən Cənub Qaz Dəhlizi məhz Azərbaycan Prezidenti İlham Əliyevin düzgün, uzaqgörən siyasəti nəticəsində mümkün olub. Tramp bir məsələni tamamilə doğru vurğulayıb ki, Cənub Qaz Dəhlisi məhz Azərbaycan Prezidenti İlham Əliyevin təşəbbüsü ilə reallaşması dünyada baş verən çox mürəkkəb geosiyasi proseslər fonunda reallaşıb.Bu ancaq cənab İlham Əliyevin siyasi iradəsi, cəsarəti nəticəsində mümkün olub. Dövlət başçısı belə bir layihələri reallaşdırmaqla Azərbaycanın suverenliyini, təhlükəsizliyini təmin etməklə yanaşı, Avropanın enerji təhlükəsizliyinin təmin olunması və möhkəmlənməsinə xidmət etmiş olub. Ona görə də Trampın bu məktubunu Azərbaycan Prezidenti İlham Əliyevin dünyanın təhlükəsizlik sisteminə verdiyi töhfələrinin dəyəri kimi qiymətləndirmək lazımdır”- deputat bildirib.
Trampın Azərbaycanda həyata keçirilən islahatları yüksək dəyərləndirməsi ilə bağlı fikirlərini şərh edən R.Xəlilov bildirib ki, ölkə başçısının islahatların dərinləşdirilməsi istiqamətində atdığı cəsarətli addımların təkcə ölkə daxilində deyil, beynəlxalq aləm tərəfindən dəstəklənməsini göstərir. “Azərbaycan Prezidenti dəfələrlə, islahatların alternativinin olmadığını bəyan edib. Azərbaycan Prezidenti mövcud çatışmazlıqları, qarşıda duran məqsədlərə nail olmaq üçün idarəetmənin optimallaşdırılması, eyni zamanda müxtəlif sahələrdə islahatların dərinləşdirməsi ilə nail olumağı hədəf seçib. Bu yol doğru yoldur. Düzgün siyasət olduğundan da ABŞ kimi ölkə tərəfindən böyük rəğbətlə qarşılanmaqla bərabər bu proseslərə dəstək verilməsi məsələsi əksini tapıb. Ona görə də bu məktubu mən təkcə Azərbaycan cəmiyyəti üçün, ümumiyyətlə beynəlxalq aləm üçün ciddi mesaj hesab edirəm. Bu məktubu eyni zamanda ölkəmizə qarşı qarayaxma kampaniyası həyata keçirən anti-Azərbaycan və erməni lobbisinə qarşı tutarlı cavab kimi dəyərləndirirəm. Bu məktub həmin qüvvələrin məkrli planlarının əks effekt verərək, sabun köpüyü kimi puça çıxdığını ortaya qoydu”- R.Xəlilov bildirib.
Mürtəza
Ölkə.Az