Trampın qərarı dünyada çox şeyi dəyişə bilər

Tramp “Twitter” səhifəsində yazıb:  "Hillari Klinton (Bill Klintonla birlikdə) dövlət katibi olduğu dövrdə Şimali Koreyaya nüvə silahı yaratmağa imkan verib. İndi isə məni tənqid edir".

Bu açıqlama dünya siyasətçilərilə yanaşı, azərbaycanlı politoloqlar tərəfindən də dəstəklənməyib. Mütəxəssislər hesab edirlər ki, Trampın ittihamları əsassızdır.

Politoloq Zərdüşt Əlizadə “Ölkə.Az”a açıqlamasında bildirib ki, Tramp əsaslı-əsassız ağzına gələni danışır. Onun sözlərinə görə, Hillari Klintonu dövlət katibi olanda ABŞ dövləti Şimali Koreyaya kəskin etirazlar edirdi.

“Həmin dövrdə Amerika dövlətinin etdiyi etirazların kəskinliyi indiki Tramp hökumətinin etirazlarından daha güclü idi”, - deyə politoloq bildirib.

Z.Əlizadə deyir ki, hazırda Amerika seçim qarşısındadır: "Birinci yolda, ABŞ Şimali Koreya ilə danışıqlara gedib, onu tam hüquqlu dövlət kimi qəbul etməli və onun təhlükəsizliyinə təminat verməlidir. Onlara qarşı sanksiyaları ləğv etməlidir. Bəlkə bu zaman Şimali Koreya lideri nüvə proqramını saxlamağa razılıq verdi. İkinci yol isə, Amerika məcbur olub Şimali Koreya ilə müharibəyə başlamalıdır. İndi Trampın qarşısında seçim var. Əgər Tramp müharibəyə başlasa, 1 milyondan çox insan qırılacaq. Şimali Koreya, Cənubi Koreya və Yaponiyada böyük təlafatlar olacaq. Amerika bir vaxtlar buna bənzər hadisə yaşamışdı. O zaman Veytnamla müharibə aparmışdılar və onda Amerika dərsini almışdı”.

Ziya Səccad
Ölkə.Az