Tüfənglə həmyerlisini öldürən məhkum Ali Məhkəməyə müraciət etdi
Kürdəmir rayonunda ehtiyatsızlıqdan açılan atəş nəticəsində həmyerlisinin ölümünə səbəb olmaqda təqsirli bilinərək məhkum olunan Saleh Tağıyev Ali Məhkəməyə müraciət edib.
"Ölkə.Az" xəbər verir ki, onun müraciəti ilə bağlı məhkəmə baxış iclası hakim Əli Seyfəliyevin sədrliyi ilə sentyabr ayının 11-də keçiriləcək.
Qeyd edək ki, hadisə Sovla kəndinin otlaq sahəsində baş verib.
Qoyun otaran Saleh Tağıyev ehtiyatsızlıq nəticəsində tüfəngdən açdığı atəşlə Anar Kərimova xəsarət yetirib.
Xəstəxanaya yerləşdirilən Anar Kərimov orada ölüb.
Kürdəmir rayon polis şöbəsi əməkdaşlarının əməliyyat tədbirləri nəticəsində Saleh Tağıyev tutulub, ondan müvafiq sənədləri olmayan “TOZ-16” markalı tüfəng götürülüb.
Saleh Tağıyev cinayət məcəlləsinin 124 (ehtiyatsızlıqdan adam öldürmə) maddəsi ilə ittiham olunub.
Natiq Allahverdiyev
Ölkə.Az
