Türk dönəri, gürcü xəngəli, ərəb turistləri və alman sosisləri — Bəs haradadır Azərbaycan?!

Türk dönəri, gürcü xəngəli, ərəb turistləri və alman sosisləri
10:00
06.10.2016
18941
Analitika
A

Qədim tarixi və zəngin mədəniyyəti olan bir ölkədə, insanlıq tarixinin bir çox əlamətdar hadisələrinin baş verdiyi, sivilizasiyaların beşiyi olmuş bir coğrafiyada yaşayırıq.

Bütün dünyaya qədim mədəniyyətimizdən, musiqimizdən, incəsənətimizdən və zəngin milli mətbəximizdən danışırıq. Ümumiyyətlə, bütün qədim mədəniyyətlərin nümayəndəsi olan xalqlar kimi biz azərbaycanlılar da sahib olduğumuz dəyərlərlə fəxr edir, hətta öyünürük. Öyünməyi çox sevirik. Ölkəmizin qədimliyi ilə və dünya mədəniyyətinə, ədəbiyyatına, xüsusən də musiqisi və mətbəxinə verdiyimiz töhfələrə görə bəzən təkəbbürlücəsinə qürrələnirik də...

Uzun illərdən, onilliklərdən sonra müstəqilliyinə çox böyük çətinliklərlə qovuşmuş ölkəmizin dünyada tanıdılması, daha doğrusu müstəmləkə illərində dünyanın yaddaşından silinmiş Azərbaycanı yenidən dünyaya təqdim etmək, dünya xalqlarının qarşısına öz mədəni irsimizlə çıxmalıyıq. Xalçaçılıqdan əl sənətinə, nəqqaşlıqdan dülgərliyə, misgərliyə və papaqçılığa qədər yaşadığımız ölkənin heç olmasa ən görməli guşələrində də olsa belə qədim mədəniyyətimizi müasir dövrümüzdə də yaşatmalı, ölkəmizə gələn qonaqlarda mədəni irsimiz haqqında təsəvvür formalaşdırmalıyıq.

Tarixən ipəkçiliyin, xalçaçılığın mərkəzi hesab olunan Azərbaycanda bu gün hər iki sahə ölmüş vəziyyətdədir. Dünyaya bahalı xalça və ən kefiyyətli ipək satan Azərbaycana bu gün xalça və ipək xaricdən gətirilir. Şəhərimizin ən mərkəzi hissələrində xarici geyim brendlərinin mağazaları, mobil telefon dükanları və dönərxanalardan başqa milli mədəniyyətimizi özündə əks etdirən heç bir ticarət nöqtəsi, ticarət köşkü yoxdur. Bir vaxtlar bütün şəhərdə bir neçə papaq ustasından biri olan papaqçı Mustafa dünyasını dəyişəndən, onun Səməd Vurğun küçəsi ilə Mirzağa Əliyev küçələrinin kəsişməsindəki emalatxanasının yerləşdiyi binanın və bütövlükdə o məhəllənin sökülməsindən sonra artıq şəhərin mərkəzi hissəsində papaq dükanı belə yoxdur. Hər tərəf türk və Avropa geyimlərinin işıqlı reklamı, içərisində isə Çin sintetik tekstilinin satıldığı, şəhərimizin milli görünüşünü kobudcasına pozan mağazalarla doludur.

Son illər ölkəmizdə keçirilən beynəlxalq əhəmiyyətli mötəbər idman yarışları, beynəlxalq siyasi-iqtisadi forumlar, konfranslar və digər tədbirlərdən sonra əcnəbilərin diqqəti Azərbaycana yönəlib. Əsas hissəsi İran və ərəb ölkələrindən olan minlərlə turist ölkəmizə axın etməyə başlayıb. Bakı başda olmaqla Azərbaycanın Gəncə, Şəki, Qəbələ, Zaqatala, Şamaxı kimi şəhərləri turistlərin görünməmiş axınına məruz qalıb. İndi gəlin görək biz bu qədər əcnəbi qonağa Azərbaycan mədəniyyətini necə tanıtdırırıq. Yuxarıda qeyd etdiyim kimi hər tərəf "çin geydirməsi" türk və Avropa adı altında satılan geyim əşyaları, üstündə əti qaralmış dönər aparatları, gigiyena qaydalarına diqqət yetirilməyərək cızhacızla qızardılan kartof peraşkiləri və qarın qutabları...

Mətbəx bu günümüzdə ən mühüm mədəniyyət təbliğatı vasitəsidir. Ağıllı və vətənpərvər iş adamları sərmayə qoyduqları ölkələrdə öz millətlərinin mətbəxini xaricilərə təqdim edən restoran və yeməkxanalar açırlar. Bu gün dünyanın inkişaf etmiş qitələri olan Avropa və Amerikada qədim Asiyadan bu qitələrə axın edən asiyalıların mədəniyyətinin izlərini görürük. Çin, Hindistan, Yaponiya, Türkiyə və digər Asiya ölkələrinin xalqlarının milli mətbəxini, özlərinə xas olan memarlıq üslubunda tikilmiş minlərlə yeməkxana, suşi-bar, kababxana və digər yerləri görmək olar. Qədim ölkəmizin milli mətbəxinin ləziz təamlarını isə biz öz ölkəmizin paytaxtında əcnəbi qonaqlara, turistlərə təqdim edə bilmirik. Təqdim etmək istəmirik sadəcə. Niyəsini deyə bilməyəcəm, amma şəhərimizin küçələrini gəzərkən ətrafda heç nəyin Azərbaycana məxsus olmadığının şahidi olursan və gözünün önündə bu səhnə canlanır:

Türk dönəri, gürcü xəngəli, qamburqer, lahmacun, "Çudo Peçka", çizburqer və son zamanlar dəbə minmiş ALMAN SOSİSLƏRİ. Hər gün yolumun üstündəki qədim binanın qarşısındakı bu köşkü görəndə daxilən utanc hissləri keçirirəm. 1926-cı ildə tikilmiş, yerli əhəmiyyətli memarlıq abidəsi olan Bakı Dəmir Yol vağzalının möhtəşəm binasının qarşısındakı donuz ətindən hazırlanmış ƏSL ALMAN SOSİSLƏRİNİN satıldığı köşkü görəndə yadıma "dağılan" "əhalisi acından ölən" Almaniya düşür. Bakı vağzalının qədim binasının içərisində isə məşhur amerikan "fast-food"u KFC-nin toyuq qamburqerlərinin satıldığı restoran yerləşir. Binanın tikildiyi tarixi göstərən lövhənin üzərində də əvvəllər 500 metr uzaqdan belə oxunan iri hərflərlə yazılmış KFC yazısını görmək olardı. Sonradan o yazını oradan sökdülər. Yəqin vicdan əzabı çəkiblər. Neynək, bu özü də böyük irəliləyişdir...

P.S. Doğrudanmı qədim mədəniyyətimiz, incəsənətimiz, zəngin mətbəximiz elə bundan, bunlardan ibarətdir? Bəs haradadır Azərbaycan?!

Məsul redaktordan
Ölkə.Az

ŞƏRH YAZ
0

Polisin bu səlahiyyəti “ASAN Xidmət”ə verilə bilər

Polisin bu səlahiyyəti “ASAN Xidmət”ə verilə bilər
12:45
02.07.2018
4730
Analitika
A
Azərbaycan Sığortaçılar Assosiasiyası (ASA) İctimai Birliyinin təşəbbüsü ilə qurumun, Vətəndaşlara Xidmət və Sosial İnnovasiyalar üzrə Dövlət Agentliyinin (“ASAN Xidmət”) və İcbari Sığorta Bürosunun (İSB) üçtərəfli görüşü keçirilib.

"Ölkə.Az"ın “Report”a istinadən məlumatına görə, görüşdə ASA-nın sədri Mustafa Abbasbəyli, “ASAN Xidmət” sədrinin müşaviri, Elektron Hökümət və Rəqəmsal İnnovasiyalar şöbəsinin müdiri Ceyhun Salmanov və İSB-nin icraçı direktoru Rəşad Əhmədov iştirak ediblər.

Tərəflər əsasən avtonəqliyyat hadisələri zamanı yol polisinin verdiyi 4 saylı arayışın “ASAN Xidmət”də verilməsini müzakirə edib. ASA-nın sədri bildirib ki, yol-nəqliyyat hadisəsi zamanı 4 saylı arayışın verilməsinin gecikdirilməsi, bilavasitə, sığorta ödənişlərinin gecikməsinə səbəb olur. Bu isə sığortalıların sığortaya və sığorta şirkətlərinə olan inam və etimadın zəifləməsinə gətirib çıxarır. Məsələnin sosial əhəmiyyətliliyini vurğulayan M.Abbasbəyli 4 saylı arayışın "ASAN Xidmət"də təqdim edilməsi sığorta hadisələri hesab olunan hallar üzrə operativ qaydada sığorta ödənişlərinin verilməsi ilə nəticələnəcəyini və bununla da, sığorta bazarından məmnun müştərilərin sayını artıracağını qeyd edib. Bu məsələdə İSB-nın mövcud elektron sistem infrastrukturunun faydalı olacağı diqqətə çatdırılıb.

Bununla yanaşı, səfər sığortasının "Asan Visa" vasitəsilə elektron qaydada təmin edilməsi təklif edilib. Ölkəyə səfər sığortası olmadan səyahət edən və ölkədən gedən şəxslərin bu yolla səfər sığortasını asanlıqla əldə edə biləcəyi qeyd edilib. Eyni qaydada, səfər sığortasının səyahətdə olan şəxslərin gözlənilməz hadisələr zamanı onları kompensasiya etməsi, hətta ölüm hallarında belə repatriasiya xərclərini qarşılaması baxımından sosial yönümlü bir məhsul olduğunu nəzərə alınaraq, bu addımın ictimaiyyət üçün təşviqedici xarakter daşıdığı bildirilib.

Görüşün yekununda təklif edilən məsələlər üzrə İşçi qrupunun yaradılması və bu sahədə işlərin görülməsi nəzərdən keçirilib. 

ŞƏRH YAZ
0

“Ya pul verin, ya da hərbi bazalarınızı yığışdırın” — Yerevan Rusiyaya eyham vurur

“Ya pul verin, ya da hərbi bazalarınızı yığışdırın”
22:04
19.06.2018
7862
Analitika
A
Politoloq Stepan Qriqoryana inansaq, Ermənistan Gümrüdə Rusiya hərbi bazasının yerləşdiyi torpaq sahəsinə görə icarə haqqını artırmağa hazırlaşır.

"Ölkə.Az" Virtualaz.org-a istinadən xəbər verir ki, Qriqoryan baş nazir Nikol Paşinyanın həyat yoldaşının baş redaktoru olduğu “Haykakan jamanak” qəzetində dərc etdirdiyi və Ermənistan-Rusiya münasibətlərinə həsr olunmuş məqaləsində hesab edir ki, Rusiya hərbi bazaları üçün təmənnasız və müddətsiz torpaq sahəsi ayrılması ədalətsiz və misli görünməmiş hadisədir. O qeyd edir ki, hətta Rusiyaya heç də az “sadiq” olmayan Belarus, Tacikistan və Qırğızıstan da öz ərazilərində Rusiya hərbi bazalarının yerləşdirilməsinin müqabilində xeyli məbləğdə pul alırlar.

Metsamor AES-in Rusiyanın ixtiyarına verilməsi, bir sıra iri sənaye obyektlərinin və az qala ölkənin bütün energetika sisteminin Rusiyaya “hədiyyə” edilməsi ona gətirib çıxarıb ki, Ermənistan regionda bütün əsas “kozır”larını həmişəlik itirib. Eyni zamanda, Ermənistanda mövqelərini xeyli möhkəmləndirdikdən sonra Rusiya atom yanacağının qiymətlərini kəskin qaldırıb və atom-elektrik stansiyasının bağlanmasından əldə edə biləcəyi bütün üstünlüklərdən istifadə etməyə çalışır.

“Rusiya AES-in bağlanmasına kompensasiya olaraq Aİ-nin Ermənistana təqdim etməyə hazır olduğu maliyyə dəstəyini əlinə keçirməyə hazırlaşır. Müxtəlif dəyərləndirmələrə görə, bu yardım 500 milyon dollar təşkil edə bilər. Bundan sonra, faktiki olaraq, Türkiyənin Metsamor AES-in bağlanması tələbini yerinə yetirdikdən sonra Moskva Ankaradan Rusiya-Türkiyə münasibətlərinin digər sahələrində bir sıra güzəştlərə nail olacaq”, - politoloq bildirir.

Müəllifin əlində olan məlumatlara əsasən, Rusiya erməni maraqlarını hesaba almayaraq, Qarabağ münaqişəsinin tənzimlənməsi məsələsində Azərbaycana kifayət qədər güzəştə getməyə hazırdır. Bir şərtlə ki, Azərbaycan da Moskvaya güzəştə getsin.

“Rusiyanın niyyətləri özünü keçmiş SSRİ ərazisində mövcud olan “tanınmamış dövlətlər”ə münasibətinin analizində də görünür. RF-nin konsulluq xidmətləri Dnestryanının, Abxaziyanın və Cənubi Osetiyanın sakinlərinə tamamilə sərbəst şəkildə Rusiya vətəndaşlıq pasportları paylayır. Bu ərazilərin liderləri Moskvada dövlət səviyyəsində qəbul edilirlər. Bunu Rusiya tərəfindən açıq dəstəkdən məhrum olunmuş Dağlıq Qarabağ Respublikasının rəhbərliyi barədə demək mümkün deyil. Eyni zamanda, Ermənistan hakimiyyəti Rusiyanı özünün yeganə strateji tərəfdaşı hesab etməkdə davam edir”, - C.Qriqoryan hiddətini bildirir.

Ölkə.Az

ŞƏRH YAZ
0
BAĞLA