Türkiyə və İraq ordusu iki ölkə sərhədində hərəkətə keçdi

İraq və Türkiyə hərbçiləri iki ölkə sərhədində cəmləniblər.

“Ölkə.Az” xəbər verir ki, hərbçilər sərhəddə birgə təlimlərə başlayıblar. Bu barədə İraq Ordusundan bildirilib. İraq Ordusunun Baş Qərargahından bildirilib ki, irimiqyaslı təlimlər iki ölkənin təhlükəsizliyini qorumaq üçün başlanıb. 

“İraq-Suriya sərhədində iki ölkə hərbçilərinin iştirakı ilə irimiqyaslı təlimlərə start verilir. Təlimlərin əsas məqsədi Türkiyə və İraq dövlətlərinin təhlükəsizliyini təmin etmək məqsədi daşıyır”, - deyə məlumatda bildirilib.

Türkiyə Silahlı Qüvvələrində də hərbi təlimlərin keçirilməsi faktı təsdiqlənib: “Sərhədin 3 kilometrliyində çox sayda hərbi texnikalarımız, zirehli maşınlarımız təlimlərə qatılıb. Təlimlər sərhədin təhlükəsizliyinin təmin edilməsi məqsədi daşıyır”. 

Qeyd edək ki, bu gün Şimali İraq Kürd Muxtariyyatının müstəqillik referendumu keçirilib. İraq hökuməti referendumun qanunsuz olduğunu bəyan edib. Türkiyə dövləti referendumu birmənalı olaraq pisləyib.

Ziya Səccad
Ölkə.Az