Türkiyədə qadın alveri ilə məşğul olan “çiçəkçi”yə hökm oxundu

Türkiyədə qadın alveri ilə məşğul olan “çiçəkçi”yə hökm oxundu
14:47
16.05.2018
752
Hadisə
A
Həyat tərzinə rənglər qatmağa çalışan "çiçəkçi” qadın əslində reallığın iki rəngdən - ağ və qaradan ibarət olduğunu sonda anlayıb. Çalışdığı istirahət mərkəzində azərbaycanlı qadınlara müştəri tapmaqda vasitəçi olub, indi məhkəmə qarşısında etdiklərinin hesabatını verir. Ancaq Aynur Məmmədova çox yüngül cəza ilə hesabatını verə bildi.

Bakı Ağır Cinayətlər Məhkəməsində insan alverində ittiham olunan 41 yaşlı Aynur Məmmədovanın cinayət işi üzrə məhkəmə prosesi başa çatıb.

“Ölkə.Az”ın xəbərinə görə, hakim Fikrət Qəribovun sədrliyi ilə keçirilən iclasda hökm oxunub.

Məhkəmənin hökmü ilə A.Məmmədovaya şərti cəza verilib.

 Aynur Məmmədova 2016-2017-ci illər ərzində Azərbaycandan Türkiyəyə istirahətə yollanan Nərminə Qasımovanı, Adilə Zeynalovanı, onun bacısı Xatirə Zeynalovanı, Arzu Məmmədovanı, Gülnarə Qasımovanı (müəyyən səbəblərdən zərərçəkmiş şəxslərin ad və soyadları dəyişdirilib) İğdır şəhərində yerləşən "Göy qurşağı” istirahət mərkəzində müxtəlif kişi müştəriləri ilə görüşdürərək fahişəliyə cəlb edib.

Törətdiyi cinayət əməlinə görə A.Məmmədovaya Cinayət Məcəlləsinin 144-1.2.1-ci (insan alveri) və 243-cü (fahişəliyə cəlb etmə) maddələri üzrə ittiham irəli sürülüb. Barəsində başqa yerə getməmək haqqında iltizam qətimkan tədbiri seçilib.

Təqsirləndirilən şəxs qismində dindirilən Aynur Məmmədova ifadəsində yüngül həyat tərzi sürən qadınlarla əlaqə saxlamadığını, maddi ehtiyaclarını ödəmək üçün Türkiyənin İğdır şəhərində yerləşən "Göy qurşağı” istirahət mərkəzində qabyuyan işlədiyini göstərib:

"Bir müddət həmin istirahət mərkəzində özüm də fahişəliklə məşğul olmuşam. Nərminə Qasımovanı "Göy qurşağı”ndan tanımışam. Yüngül həyat sürən qadınların hamısı bir hoteldə qalırdılar, mən fahişəliyə cəlb etməmişəm. Adilə də Nərminə kimi bu hotelə eyni məqsədlə gəlmişdi. Həmçinin, Adilənin bacısını da əxlaqsızlıq etməyə məcbur etməmişəm. Onlar hamısı bir müddət gəlib fahişəliklə məşğul olur, sonra çıxıb gedirdilər. İğdırda hamı mənə "Səma” deyə müraciət edirdi”.

"Məni İğdırdakı tanışlarının əlinə verəcəyi ilə qorxutdu”

Sevgilisinin Türkiyədə yaşadığını, mütəmadi olaraq onun yanına gedib-gəldiyini söyləyən Nərminə Qasımova Aynurla "Göy qurşağı”nda tanış olub. Hətta adıçəkilən məkanda yarım ay sevgilisi ilə başbaşa qalıb, onu yola saldıqdan sonra nədənsə Aynurun evinə köçüb:

"Mənə inzibatçı işlədiyini demişdi. Onun yaxşı qadın olduğunu düşünürdüm. Aynur isə "ya qalıb fahişəlik edəcəksən, ya da səni çölə atacağam, başqa çıxış yolun yoxdur” dedi. Telefonu götürüb Kadıra zəng vurmaq istədim, əlimdən aldı. Məni İğdırdakı tanışlarının əlinə verəcəyi ilə qorxutdu, məcbur olub razılaşdım. Üç-dörd gün birtəhər dözsəm də, nəhayət, Aynurdan xəbərsiz 2016-cı ilin oktyabr ayında evdən qaçdım”.

"Əgər kiməsə bir söz danışsan, səni Bakıda tapıb başına oyun açacağam”

Paytaxtın "28 May” metro stansiyasının yaxınlığındakı massaj salonlarının birində işləyən Adilə Zeynalovanın Türkiyəyə səfəri isə keçmiş iş yoldaşının vasitəsilə baş tutub. Rəfiqəsi ona Kayseridə Günəş adlı qadının yanında işlədiyini deyib. Bir neçə gün sonra isə Adiləyə "WhatsApp”dan mesaj gəlib:

"Mesaj yazan özünü Günəş kimi təqdim etdi. Ona bir neçə şəklimi yolladım. Dedi ki, səninlə işləmək çox asan olacaq. Sonra mənə bank vasitəsilə 100 dollar göndərdi. Həmin pulla bilet alıb Türkiyəyə yolda düşdüm”.

Kayseri şəhərinə gələn Adiləni rəfiqəsi ilə birgə Günəş qarşılayıb. Ertəsi gün qadının ona "bir azdan müştəri gələcək” deməsi Adiləni çaş-baş salıb. Günəşə nə demək istədiyini başa düşmədiyini bildirdikdə isə "özünü axmaq yerinə qoyma, guya bilmirsən?” cavabını eşidib.

Adilənin ifadəsinə görə, 15 gün Günəşin yanında cinsi istismara məruz qaldıqdan sonra oradan qaçmağı planlaşdırıb. Bu məqsədlə taksiyə əyləşərək avtovağzala gəlib. Pulu olmadığından İğdırdakı restoranlardan birində iş axtarıb. Bu dəfə isə onu "Göy qurşağı”nda Aynur qarşılayıb. Adilə sözün əsl mənasında yağışdan çıxıb yağmura düşüb. Aynur onu istirahət mərkəzində yerləşdirib, qalmağa ayrıca otaq verib. Amma sonradan Adiləyə qarşı münasibəti dəyişib:

"Aynurun yanında çoxlu qadınlar vardı. Həmin qadınlar ondan qorxurdular. Onların hamısını fahişəliyə cəlb etmişdi. Mənə də başqa yolum olmadığını dedi. Müştərilərlə hoteldə yaxınlıq edirdik. Türkiyədə qalma müddətim bitirdi deyə Azərbaycana getməli olduğumu Aynura dedim. "Əgər baş verənlər haqda kiməsə nəsə danışsan, Bakıda səni tapıb başına oyun açacağam” deyərək hədələdi”.

Ən maraqlısı odur ki, Aynurun əlindən qaçıb canını qurtarmağa çalışan Adilə Azərbaycana gəlsə də, bir neçə gün sonra təkrar İğdıra dönüb. Bu dəfə isə tək deyil, bacısı Xatirə də ona yoldaşlıq edib:

"Aynur zəng vurub bilet almağımı və geri qayıtmağımı tələb edirdi. Ötən il mayın 15-də yenidən onun yanına gəldim. İki gün sonra bacım Xatirə də təsadüfən oraya gəlib çıxdı. Aynur bizi döydürəcəyi ilə hədələyirdi. Bacımsa qəsdən problemlər yaradırdı, müştəriləri narazı salırdı. Ona görə də, Aynur Xatirəni qovdu. Ötən il iyunun 17-də Azərbaycana qayıtdım”.

"Çiçəkçi”nin azərbaycanlı "çiçəkləri”

Ara-sıra qonşu ölkəyə "işləməyə” yollanan Arzu Məmmədova sonuncu dəfə ötən il aprelin 18-də rəfiqəsi Aysellə birgə İğdıra üz tutub. Taksi sürücülərindən "Göy qurşağı” istirahət mərkəzində "Səma” adlı qadının "çiçəkçilik”lə (fahişəliyi nəzərdə tutub) məşğul olduğunu öyrəndikdən sonra isə birbaş onun yanına yollanıblar:

"Aynur bizi qarşıladı, ayrıca otaq verdi. Aynurun yanında 10-13 nəfər qadın vardı. Qadınları bir-biri ilə əlaqə saxlamağa qoymurdu, hamıya nəzarət edirdi. Bir ay orada qaldıqdan sonra Aynurun yaxşı adam olmadığını görüb Azərbaycana qayıtdım”.

ŞƏRH YAZ
0

Siyəzəndə yük furqonu aşıb, 3 nəfər yaralanıb

Siyəzəndə yük furqonu aşıb, 3 nəfər yaralanıb
01:04
Bu gün
101
Hadisə
A
Siyəzən rayonunda 3 nəfərin xəsarət alması ilə nəticələnən yol-nəqliyyat hadisəsi baş verib.

"Ölkə.Az" Report-a istinadən xəbər verir ki, 1988-ci il təvəllüdlü Babayev Rəsul Ağaşah oğlunun Siyəzən şəhəri ərazisində sükanı arxasında olduğu "90-CL-983" dövlət qeydiyyat nişanlı "Ford Transit" markalı yük furqonu idarəetmədən çıxaraq aşıb.

Nəticədə sürücü və Xaçmaz rayonunun Çiləgir kəndindən olan sərnişinlər - 1982-ci il təvəllüdlü Nağdıyev Rafiq Ağamalı oğlu və 1979-cu il təvəllüdlü Səlimov Elnur Nəcib oğlu müxtəlif bədən xəsarətləri alaraq Siyəzən Regional Diaqnostika Mərkəzinə yerləşdiriliblər.

Onlardan sürücünün vəziyyəti qənaətbəxşdir, digər yaralıların vəziyyəti isə ağırdır.

Faktla bağlı Siyəzən rayon Polis şöbəsində araşdırma aparılır.

Ölkə.Az

ŞƏRH YAZ
0

Ağdaşda yanğın — Xəsarət alan var

Ağdaşda yanğın
22:45
16.08.2018
295
Hadisə
A
Ağdaşda yanğın qeydə alınıb.

FHN-dən "Ölkə.Az"a verilən məlumata görə, rayonun beşmərtəbəli yaşayış binasının 3-cü mərtəbəsində ümumi sahəsi 63 m² olan 3 otaqlı mənzilin eyvanının yanar konstruksiyaları 6 m² sahədə yanıb. Yanğın zamanı 1 nəfər yüngül yanıq xəsarəti alıb, 3 nəfər bina sakini yanğınsöndürənlər tərəfindən təhlükəsiz əraziyə təxliyə olunub.

Mənzilin qalan hissəsi yanğından mühafizə olunub. Yanğın yanğın bölmələri tərəfindən söndürülüb.

Ölkə.Az

ŞƏRH YAZ
0
BAĞLA