Türkiyədən İrana çox sərt cavab

“Ölkə.Az” xəbər verir ki, Türkiyə Xarici İşlər Nazirliyinin təmsilçisi Hüseyin Müftüoğlu İranın Xarici İşlər Nazirliyinin sözçüsü Bəhram Qasımini tənqid edib. Onun sözlərinə görə, İran regionda yürütdüyü siyasəti düzgün deyil.

“İran düzgün siyasət yürütmür. Onu tənqid edən ölkələrin məsləhətlərinə qulaq asıb, siyasətindəki səhvləri düzəltmək əvəzinə, qonşu ölkələrə şər atır. İranın bu səhv siyasətdən dönəcəyini və düzgün addımlar atacağını gözləyirik”, - deyə Hüseyin Müftüoğlu bildirb.

Türkiyə rəsmisi bildirib ki, İran terroçulardan qaçaraq onlara sığınan insanları çəkinmədən müharibə meydanına sürükləyir:

“İran barədə BMT-yə, İslam təşkilatlarına çoxlu şikayətlər daxil olub. İran özü regionda gərginlik yaradır, bu azmış kimi başqa ölkələri sabitliyin pozulmasında ittiham edir. Yaxşı olardı ki, İran hökuməti başqalarını qınamaq yerinə siyasətini dəyişsin”, - deyə Hüseyin Müftüoğlu bildirib.

Qeyd edək ki, bir müddət əvvəl İran Xarici İşlər Nazirliyi Türkiyə Xarici İşlər naziri Mövlud Çavuşoğlunun “İran Suriya və İraqı şiə etmək istəyir” sözlərinə sərt reaksiya verib. Nazirliyin sözçüsü Bəhram Qasımi Çavuşoğlunun sözlərinin təhlükəli olduğunu, Türkiyənin və bir neçə başqa ölkənin Orta Şərqdə sabitliyi pozduğunu bildirib:

“Başqa ölkələrin işlərinə qarışan, qeyri-qanuni addımlar atan, terror təşkilatlarını dəstəkləyən, qan tökülməsinə səbəb olan, bölgədə sabitliyin pozulmasına yol açanlar başqalarını günahlandıraraq, öz yanlışlarının məsuliyyətindən qaça bilməzlər. İran hər ölkənin və qonşularının sabitliyini qorumaq üçün siyasət yürüdür”.

Ziya Səccad
Ölkə.Az