Valideynlərini itirən gənclər işlə təmin edilib

Valideynlərini itirən gənclər işlə təmin edilib
20:00
12.10.2017
326
Ölkə
A

Dövlət uşaq müəssisələrinin məzunu olan, hər iki valideynini itirmiş və valideyn himayəsindən məhrum gənclər Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun “Məzun evi” Sosial Müəssisəsində (Abşeron rayonu, Masazır kəndi) yeni mənzillərə köçürüldükdən sonra ilk növbədə onların məşğulluğunun təminatı yönündə müvafiq işlər aparılır.

Əmək və Əhalinin Sosial Müdafiəsi Nazirliyindən "Ölkə.Az"a verilən xəbərə görə, ölkəmizdə dövlət uşaq müəssisələrinin məzunu olan, hər iki valideynini itirmiş və valideyn himayəsindən məhrum gənclərin mənzillə təmin olunması Azərbaycan Prezidenti cənab İlham Əliyevin bu təbəqədən olan gənclərə xüsusi qayğısının, Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın humanist təşəbbüsünün nəticəsidir. Bu məqsədlə Abşeron rayonunun, Masazır kəndində bu təbəqədən olan gənclər üçün hər biri 120 mənzilli iki yaşayış binası inşa edilərək onların istifadəsinə verilib. Hazırda burada eyni məqsədlə daha bir 120 mənzilli yaşayış binasının tikintisi aparılmaqla, qarşıdakı dövrdə də bu prosesin davam etdirilməsi nəzərdə tutulur.

Mövcud qanunvericiliyə uyğun olaraq Azərbaycan Respublikası Təhsil Nazirliyi tərəfindən təqdim olunan siyahıda adları göstərilən gənclər müəssisədə müasir tələblərə uyğun yaşayış şəraitinə malik mənzillərlə təmin edildikdən sonra onların əmək bazarına çıxış imkanlarının dəstəklənməsi və daimi iş yerlərində məşğulluğunun təmin olunması məsələsi diqqətdə saxlanılıb. Gənclərdən 20 nəfərinin elə yaşadıqları “Məzun evi”ndəki ştat vahidlərində, habelə ictimai-iaşə xidməti sahələrində daimi iş yerləri ilə təminatı həyata keçirilib. “Məzun evi”nin digər gənc sakinlərinin əməyindən istifadə olunması üçün sosial dialoq çərçivəsində işəgötürənlərlə mütəmadi əlaqələr yaradılıb. Ötən dövrdə görülən tədbirlər nəticəsində 30 nəfər gəncin yaşıllaşdırma müəssisəsində, 25 nəfər gəncin “Məzun evi” üçün tikilən yeni yaşayış binasının, 6 nəfər gəncin yaxın ərazidəki “Yeni Bakı” yaşayış kompleksınin və 11 nəfərin məcburi köçkünlər üçün inşa olunan yaşayış kompleksinin tikintisi işlərində, 6 nəfərin karton fabrikində, 3 nəfərin Dövlət Neft Şirkəti (SOCAR) sistemində, 3 nəfər gəncin beton istehsal edən zavodda, 2 nəfər gəncin şəxsi klinikalarda və s. daimi iş yerləri ilə təminatı həyata keçirilib. 

Müvafiq sahədə aparılan işlərin davamı olaraq, burada xalça və tikiş sexləri də yaradılıb və hər iki sexdə “Məzun evi”nin ümumilikdə 28 nəfər sakininin məşğulluğu təmin edilib. Bundan əvvəl isə həmin gənclər üçün xalçaçılıq və tikişçilik peşələri üzrə peşə hazırlığı kursları təşkil olunub və onlar yerinə yetirəcəkləri peşəni öyrəniblər. Eyni zamanda, “Məzun evi”nin digər ayrı-ayrı sakinləri hazırda fərdi qaydada Bakı və Abşeron rayonu ərazisindəki müxtəlif ictimai-iaşə xidməti müəssisələrində işləyirlər. Beləliklə, “Məzun evi”ndə yaşayan gənclərin artıq əksər hissəsi daimi iş yerləri ilə təmin ediliblər. Gənclərdən 7 nəfəri isə tələbədir ki, onlardan 2 nəfəri Moskva, 5 nəfəri Bakı şəhərindəki ali təhsil müəssisələrində ali təhsil alırlar. Ali məktəbləri bitirdikdən sonra onların ixtisaslı mütəxəssislər kimi əmək bazarına çıxış imkanlarına malik olmaları da təmin ediləcək.

Hazırda “Məzun evi” üçün tikilən növbəti yaşayış binasında onlar üçün uşaq bağçasının fəaliyyət göstərməsi, binanın ətrafında məzunlar üçün idman kompleksinin olması, yaxınlıqda məktəbin inşası da nəzərdə tutulub. Bununla əlaqədar həmin ərazidə yaranacaq yeni iş yerləri üzrə aidiyyəti əmək sahələrində də ilk növbədə müəssisədəki gənclərin məşğulluğunun təminatı həyata keçiriləcək. Qeyd olunanlarla yanaşı, Əmək və Əhalinin Sosial Müdafiəsi Nazirliyi tərəfindən “Məzun evi”nin elə özündə əmək bazarının tələblərinə uyğun bir sıra peşələr üzrə peşə hazırlığı kurslarının təşkilinə hazırlıq işlərinə də başlanılıb.

ŞƏRH YAZ
0

Әdliyyә nazirinin iştirakı ilә zona müşavirәsi keçirilib

Әdliyyә nazirinin iştirakı ilә zona müşavirәsi keçirilib
20:58
24.09.2018
2386
Ölkə
A
Ədliyyə naziri, Məhkəmə-Hüquq Şurasının sədri Fikrət Məmmədovun Ağstafa rayonuna səfəri çərçivəsində Gəncə Apellyasiya Məhkəməsinin və onun yurisdiksiyasına daxil olan bölgənin birinci instansiya məhkəmələri sədrlərinin və hakimlərinin, habelə Ədliyyə Nazirliyinin və Məhkəmə-Hüquq Şurasının aidiyyəti məsul işçilərinin iştirakı ilə geniş zona müşavirəsi keçirilib.

"Ölkә.Az" xәbәr verir ki, nazirlikdən report-a verilən məlumata görə, Azərbaycan Prezidenti İlham Әliyevin rəhbərliyi ilə məhkəmə sistemində məqsədyönlü islahatlar aparılaraq bu sahədə qanunvericilik təkmilləşib, hakimlərin şəffaf seçim qaydası müəyyən olunaraq hakim korpusu 60 faiz təzələnib, insanların müraciət imkanlarının asanlaşdırılması məqsədilə yeni məhkəmələr yaradılıb, "Elektron məhkəmə" informasiya sisteminin tətbiqi və məhkəmə infrastrukturunun müasirləşməsi üzrə əməli işlər həyata keçirilib.

Ölkəmizin sürətli sosial-iqtisadi inkişafı və mülki dövriyyənin kəskin artması nəticəsində məhkəmələrin iş həcminin dəfələrlə çoxalması nəzərə alınaraq, bu sahədə zəruri addımlar atılır, o cümlədən mübahisələrin məhkəmədən kənar alternativ həllində mühüm rol oynayan mediasiya institutunun tətbiqi üzrə tədbirlər görülür.

Müşavirədə məhkəmə fəaliyyətində yol verilən nöqsanlar, daxil olan şikayətlər və onları doğuran səbəblər, bununla əlaqədar qarşıda duran vəzifələr müzakirə olunub.

Tədbirdə Prezident İlham Əliyevin qəti siyasi iradəsi ilə respublikamızda korrupsiyaya qarşı sərt mübarizənin aparıldığını vurğulayan Fikrət Məmmədov məhkəmə fəaliyyətində korrupsiyaya şərait yaradan halların yolverilməzliyini diqqətə çatdırıb. Vətəndaşların əsassız get-gələ salınması, işlərə baxılmamasının süründürülməsi, habelə bəzi hakimlərin qeyri-etik davranışı qeyd olunaraq belə halların insanları narazı saldığı, şikayətlər doğurduğu bildirilib.

Bununla bağlı hakim adına və nüfuzuna xələl gətirən hərəkətlərin yolverilməzliyi, lazımi nəticə çıxarmayan və işində dönüş yaratmayan hakimlərə məhkəmə sistemində yer olmadığı qeyd edilib. Bildirilib ki, hazırda 80-dək hakimin fəaliyyətinin prinsipial qiymətləndirilməsi aparılır, habelə yeni qaydalar əsasında şəffaf prosedurlarla seçilmiş 100-dən çox hakimliyə namizədin təyinatı nəzərdə tutulur.

Müşavirədə apellyasiya məhkəmələrindən prinsipiallığın artırılması, qanun pozuntularına ciddi reaksiya verilməsi, neqativ hallara qarşı barışmaz münasibət göstərilməsinin vacibliyi vurğulanıb.

Həmçinin məhkəmə sistemində şəffaflığın artırılması üzrə əlavə tədbirlərin görülməsi, antikorrupsiya mədəniyyətinin yüksəldilməsi, qeyri-prosessual münasibətlərin qarşısının alınması, etik davranış qaydalarına dürüst əməl edilməsi üzrə qarşıda duran vəzifələr diqqətə çatdırılıb.

Ölkә.Az

ŞƏRH YAZ
0

"Ötən gün palçıq vulkanının püskürdüyü əraziyə heç kim buraxılmır" — Nazirlik

20:43
24.09.2018
2157
Ölkə
A
Senytabrın 23-də səhər saatlarında Qaradağ rayonu ərazisində püskürən Otman-Bozdağ palçıq vulkanı tam sönüb.

"Ölkә.Az" xәbәr verir ki, bu barədə trend-ə açıqlamasında Ekologiya və Təbii Sərvətlər Nazirliyinin “Bakı və Abşeron yarımadasının palçıq vulkanları qrupu Dövlət Təbiət Qoruğu”nun direktoru Ceyhun Paşayev deyib.

C.Paşayevin sözlərinə görə, palçıq vulkanı axşam saatlarında tam sönüb və hazırda ərazidə heç bir təhlükə yoxdur:

"Artıq vulkanda heç bir aktivlik qeydə alınmır. Cənub-şərq istiqamətində uzanmış həmin vulkanda püskürmə məhsullarının hərəkəti də tam dayanıb. Proses tamamilə sönüb".

Direktor qeyd edib ki, hazırda ərazidə təhlükəsizlik tədbirləri gücləndirilib:

"Vulkan çox güclü püskürüb, ərazinin əvvəlki görünüşündən əsər-əlamət qalmayıb. Ərazidə dərin çatlar yaranıb. Amma Ekologiya və Təbii Sərvətlər Nazirliyi burada tam təhlükəsizlik tədbirləri həyata keçirir. Əraziyə heç kim buraxılmır. Təhlükəsizlik baxımından biz hələ ərazidə ölçmə işlərini də dayandırmışıq, vulkanın həcmi və sahəsini ölçmürük. Hadisədən sonra çatlarda dağılmalar baş verir. Ona görə də gözləyirik ki, proses tam dayanandan sonra ölçmə işlərini aparaq".

Qurum rəhbəri bildirib ki, vulkan "Ümid" yaşayış məntəqəsindən təxminən 7-8 kilometr aralıdadır, ona görə də yaşayış məntəqəsinə heç bir ziyan dəyməyib:

"Palçıq vulkanının püskürməsi nəticəsində yaxınlıqda olan 1 elektrik dirəyi əyilmişdi, "Azərişıq" ASC-nin əməkdaşları dərhal hadisə yerinə gələrək problemi aradan qaldırdılar".

Xatırladaq ki, sentyabrın 23-də saat 08:53 radələrində Bakı şəhəri Qaradağ rayonu ərazisində yerləşən, “Bakı və Abşeron yarımadasının palçıq vulkanları qrupu Dövlət Təbiət Qoruğu”na daxil olan Otman-Bozdağ palçıq vulkanında püskürmə baş verib. İkinci püskürmə saat 09:58 radələrində qeydə alınıb.

Vulkan püskürməsi zamanı alovun hündürlüyü 200-300 metr olub. Ərazidə çoxlu sayda dərinliyi 40 metrə çatan çatlar yaranıb.

Xatırdaq ki, dünyanın ikinci böyük palçıq vulkanı olan Otman-Bozdağ vulkanında son püskürmə 2017-ci il fevral ayının 6-da baş verib.

Ölkә.Az

ŞƏRH YAZ
0
BAĞLA