Vidadi Zeynalovun apellyasiya şikayəti üzrə məhkəmə başladı

"Ölkə.Az"ın lent.az-a istinadən verdiyi məlumata görə, Bakı Apellyasiya Məhkəməsində hakim Qədim Babayevin sədrliyi ilə keçirilən prosesdə hakim  bildirib ki, iş üzrə təqsirləndirilənlərdən Məhəmməd Məmmədov və Bayram Vəliyev iştirak  etmir.
 
Daha sonra hakim elan edib ki, təqsirləndirilən V.Zeynalovun ailəsi də apellyasiya şikayəti veriblər. Onlar V.Zeynalovun üzərinə həbs qoyulmuş əmlakları ilə bağlı məhkəməyə müraciət ediblər.
 
Vəkil Ceyhun Yusifov qeyd edib ki, maraqlı şəxslərin məhkəmədə iştirakı bərpa olunsun. Hakimlər kollegiyası bunu təmin edib.
 
Proses oktyabrın 24-dək təxirə salınıb.

***

Bakı Apellyasiya Məhkəməsində "Rabitə işi” üzrə təqsirləndirilən şəxslərin apellyasiya şikayəti əsasında məhkəmənin baxış iclası başlayıb.

"Ölkə.Az"ın APA-ya istinadən verdiyi məlumata görə, prosesə hakim Qədim Babayev sədrlik edir.
 
Təqsirləndirilən şəxslər apellyasiya şikayətlərində barələrində bəraət hökmü çıxarılmasını istəyiblər.
 
Təqsirləndirilən şəxslərdən Qəmbər Bəybalayev apellyasiya şikayəti verməyib.
 
Qeyd edək ki, Bakı Ağır Cinayətlər Məhkəməsinin hökmünə əsasən, Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov 13 il, Bakı Telefon Rabitəsi İstehsalat Birliyinin baş direktoru Beytulla Hüseynov 13 il, “Ortik Rabitə, Tikinti və Quraşdırma” MMC-nin direktoru Namazalı Məmmədov 11 il, Emin Məmmədov 10 il, Anar Mustafayev 5 il, Qəmbər Bəybalayev 3 il müddətinə azadlıqdan məhrum edilib.
 
Məhkəmə Məhəmməd Məmmədov, Oktay Rüstəmov, Səhlab Hümbətov, Cəlil Cəfərov, Bayram Vəliyev barəsində 2 il sınaq müddəti təyin etməklə şərti cəza seçib, onlar məhkəmə zalından azadlığa buraxılıblar.
 
Təqsirləndirilən şəxslərin hamısından 119 milyon 468 min pulun müştərək qaydada alınaraq, Rabitə və Yüksək Texnologiyalar Nazirliyinin balansına keçirilməsi haqqında qərar qəbul edilib.