Xalq artistinin 100 illik yubileyi qeyd edildi — FOTOLAR

Xalq artistinin 100 illik yubileyi qeyd edildi
19:33
09.06.2018
14799
Mədəniyyət
A
Akademik Milli Dram Teatrında xalq artisti, görkəmli teatr və kino xadimi Sofa Bəsirzadənin 100 illik yubileyi münasibəti ilə anım tədbiri keçirilib.

Teatrın mətbuat xidmətindən "Ölkə.Az"a verilən məlumata görə, anım mərasimi Mədəniyyət Nazirliyinin, Azərbaycan Teatr Xadimləri İttifaqının, Akademik Milli Dram Teatrının və Dövlət Teatr Muzeyinin birgə təşkilatçılığı keçirilib.

Tədbirdə Sofa Bəsirzadənin milli teatr və kino sənətinin inkişafındakı xidmətlərindən danışılıb, onun rol aldığı səhnə və ekran əsərlərindən fotosərgi nümayiş olunub. Azərbaycan Teatr Xadimləri İttifaqının sədri, Akademik Milli Dram Teatrının bədii rəhbər-direktoru, xalq artisti Azər Paşa Nemətov Sofa Bəsirzadə ilə bağlı xatirələrini bölüşüb, onun Azərbaycan teatrı və kinosunun inkişafındakı xidmətlərindən danışıb.

Azər Paşa Nemətov qeyd edib ki, Sofa Bəsirzadə 1918-ci ildə Kazanda doğulub. İki yaşında olanda ailəsi Bakıya köçüb. 1936-cı ildə Mirzə Fətəli Axundzadə adına Bakı Teatr Məktəbinə daxil olub: “Teatr məktəbində onun çox gözəl müəllimləri olub. O vaxtlar Teatr məktəbində Cəfər Cabbarlı, Hüseyn Cavid, Hacıağa Abbasov kimi böyük insanlar dərs deyib. Sofa xanım bütün janrlarda çıxış etməyi bacaran sənətkar olub. Mən onun bir sıra rollarını görmüşəm, bizim çox gözəl münasibətimiz olub. Sofa xanım təkcə aktrisa kimi yox, insan kimi də yüksək mənəvi keyfiyyətlərə malik olub. Sofa xanım 40-dan çox filmlərə çəkilib, yüzdən çox tamaşada rol alıb”.

Xalq artistləri Hacı İsmayılov, Səidə Quliyeva və İlham Namiq Kamal Sofa Bəsirzadə haqqında geniş çıxış edib, onunla bağlı xatirələrini bölüşüblər. Xalq artistləri Sofa Bəsirzadənin sənətkar kimi böyüklüyündən, insani keyfiyyətlərində danışıb, onun xatirəsinin sənətsevərlərin qəlbində əbədi yaşayacağını deyiblər. Sofa Bəsirzadənin ailəsi adından çıxış edən Camal Vəzirov və İradə Vəzirova tədbirin təşkilinə görə Mədəniyyət Nazirliyi, Akademik Milli Dram Teatrı və Dövlət Teatr Muzeyinin kollektivinə təşəkkürünü bildirib. Daha sonra xalq artisti Sofa Bəsirzadənin xatirəsinə həsr olunan “Müfəttiş” tamaşası nümayiş olunub. Qeyd edək ki, Sofa Bəsirzadə 1974-cü ildə xalq artisti fəxri adına layiq görülüb. O, 4 yanvar 2000-ci ildə Bakıda vəfat edib.

ŞƏRH YAZ
0

"Mənə deyirdilər ki, sən internatda böyümüsən..." — Xalq artistindən KÖVRƏK sözlər

23:30
16.11.2018
859
Mədəniyyət
A
"Ölkə.Az" xalq artisti Arif Quliyevin milli.az-a müsahibəsini təqdim edir:

- Arif bəy, hazırda filmlərə çəkilirsiniz?

- Xeyr, hələ ki, heç bir filmdə çəkilmirəm. Gənc rejissorların bir neçə filmində çəkilmişəm, deyilənə görə yaxşı da alınıb.

- Gününüz necə keçir?

- Günümü nəvələrimlə keçirirəm, onlarla deyib-gülürəm. Xoşbəxt insanam.

- Özünüzü neçə yaşda hiss edirsiniz?

- Gözəl qocalmağın özü də fəxrdir. Onda çalışırsan ağır görünəsən, sanballı söz deyəsən. Amma özümü cavan hiss edirəm.

- Gənclik illərinizi necə xatırlayırsınız?

- Mən dünənki Arifi insanların üzündə gülüş yaradan səmimi və sadə bir insan kimi xatırlayıram. Həqiqətən də, məni gülüş yaşadır. Məqsədinə çatmaq üçün əziyyətlərdən keçməlisən. Ən böyük uğur əziyyətlə qazanılan uğurdur. Əsas odur ki, getdiyin yolda büdrəyib yıxılmayasan.

- Sevgi sizin üçün nə deməkdir?

- Sevgi böyük məvhumdur. Bu, həm valideynə, həm yoldaşına, həm də övladına ola bilər.

- Hansı sevginin həsrətini çəkmisiz?

- Mən həmişə sənət sevgisinin həsrətini çəkmişəm. Özümü dərk edəndən hiss etdim ki, içimdə teatra qarşı böyük sevgi var. Mənə deyirdilər ki, sən internatda böyümüsən, elə bir sənət sahibi ol ki, orda yaxşı qazanc əldə edə biləsən. Amma mən bu sənəti seçdim.

- Özünüz gülüş həsrətində olmusuz deyə insanlara gülüş bəxş etmək istədiniz?

- Mənim həyatım nisgilli olub. Qərara gəldim ki, elə bir sənəti seçim ki, insanları bir anlıq da olsa dərddən, qəmdən uzaqlaşdırım. Bu, mənim taleyimdir, taleyimə etiraz edə bilmərəm.

- Düşdüyünüz bu vəziyyətə görə valideynlərinizi günahlandırmısız?

- Xeyr, onlar məni dünyaya gətirib. Ata-ana insanı dünyaya gətiribsə, həyatda olmasalar da ona minnətdar olmalısan. Bu günlərdə qocalar evinə getmişdim. Orda qoca bir xanım mənə yaxınlaşıb dedi ki, sən ananı axtarırsan, amma anası, atası olan insanlar bizi gətirib bura qoyub. Sən axtarırsan, onlar itirir. Siz bilirsiniz ki, mən həm də toylara aparıcı kimi gedirəm. Bir dəfə bir oğlan mənə yaxınlaşıb, ana muğamı sifariş etməyimi xahiş etdi. Onun üçün musiqiçilərdən ana muğaml sifariş etdim. Gördüm ki, oğlan ağlayır. Onu foyeyə çıxarıb, ağlamağının səbəbini soruşdum. Dedi ki, 39 yaşım var, 9 ildir ki, anamı itirmişəm. Ona dedim ki, sən xoşbəxtsən heç olmasa onu 30 ildir ki, görmürsən, mən yazıq onu heç görməmişəm (ağlayır).

- Çox axtardınız, amma tapmadınız... Hətta efirlərə də müraciət etmişdiniz.

- Bəli, çox axtardım, amma tapmadım. Biri var imkan olmur, aparıb səni uşaq evinə qoyurlar, ara-sıra gəlib dəyirlər. Mən balaca uşaq idim, bir çarşablı yaşlı qadın gətirib məni uşaq evinə qoydu. Təxminən 2 yaşım var idi. Həmin yer mənim yaddaşıma o qədər hopmuşdu ki, Mərdəkanda oxuyanda gəlib həmin yeri tapdım. Mənim, sadəcə, adım yazılaraq kağıza qoyulub, nə "metirkam" olub, nə də dəqiq yaşım. Hələ də dəqiq bilmirəm ki, neçə yaşım var.

- Valideynlərinizi görsəniz, onlara nə deyərsiniz?

- Mən onlara heç nə deyə bilmərəm. Heç vaxt heç kəsi qınamaq olmaz. Yəqin ki, şərait elə gətirib ki, məcbur olub məni uşaq evinə qoyublar.

- Özünüz ata olanda nə hisslər keçirdiniz?

- İnsan ata olandan sonra hər şeyi bir az unudur. Meylini uşaqlarına salır. Çalışırdım ki, onlar ehtiyac görməsinlər, çətin gün görməsinlər. Birini anam çağırırdım, birini atam.

- Yaşamağa dəyər?

- Mənim həyat eşqim insanlara qarşı olan məhəbbətdir. Məncə, yaşamağa dəyər. Sən nəsə yaradırsan, insanların xoşuna gəlir. O, sənə stimul verir, səni yaşadır. Səni məcbur edir ki, daha da yaxşı işlər görəsən.

Ölkə.Az

ŞƏRH YAZ
0

"Söz"ün Yavuzu "Emmi" mükafatı üçün ABŞ-a gedir — FOTO

22:50
16.11.2018
837
Mədəniyyət
A
Tanınmış türkiyəli aktyor Tolqa Sarıtaş "Söz" serialındakı roluna görə "ən yaxşı kişi aktyor" nominasiyasında namizəd göstərildiyi 46-cı Beynəlxalq Emmi Mükafatları üçün ABŞ-a uçub.

"Ölkə.Az" xəbər verir ki, "Söz" serialında rolunu yüksək səviyyədə oynayaraq Türkiyədə müxtəlif mükafatlar alan tanınmış aktyor bu dəfə ölkəsini beynəlxalq arenada təmsil edəcək. Sarıtaş "Emmi"nin Nyu Yorkda baş tutacaq final mərasimində iştirak edəcək.

20 ölkədən 11 fərqli kateqoriyasnın yer aldığı tədbirdə Tolqa Sarıtaş "Ən yaxşı kişi aktyor" nominasiyasında braziliyalı Julio Andrade, kanadalı Billi Kampbel və danimarkalı Lars Mikkelsenlə mübarizə aparacaq. Final mərasimi noyabrın 19-da Hilton oteldə keçiriləcək.

Ölkə.Az

ŞƏRH YAZ
0
BAĞLA