"Xatirə nə siyasətçidir, nə iqtisadçı, amma efirə çıxıb iqtisadiyyatdan danışır"

Tanınmış psixoloqdan maraqlı açıqlamalar: "Xatirə nə siyasətçidir, nə iqtisadçı, amma efirə çıxıb iqtisadiyyatdan danışır"

Son zamanlar sənət aləmində qalmaqalların sayı xeyli artıb. Hətta bir sıra məşhurlarımızın yolu polis bölməsindən də keçib. Məsələn, xalq artisti Aygün Kazımovanın "bir yerimə" qalmaqalından əvvəl Xatirə İslam sosial şəbəkədə ona şərh yazanları təhqir etmiş, onları qaraçı adlandırmaqdan belə çəkinməmişdi. Ardınca xanəndə Elnarə Abdullayeva ilə vokal ifaçısı Ülvi Qılıc arasındakı gərginlik Abşeron Polis İdarəsinə kimi gedib çıxdı. Bu gün isə tanınmış aktrisa, əməkdar artist Mehriban Xanlarova Nəsimi rayonu 19-cu polis bölməsində ifadə verib. İddiaya əsasən o bir vətəndaşı təhqir edib. Maraqlıdır, sənət adamları cəmiyyətə yaxşı mənada nümunə olmalı olduqları halda, niyə bunun əksini edirlər?

Məsələni Ölkə.az-a tanınmış psixoloq Dəyanət Rzayev şərh edir.

Psixoloq hesab edir ki, bu kimi hallarda son zamanlar nisbətən təcrübəli sənətçilər arasında baş verir:

"Məşhurlar özləri də adi bir insandır və onlar da səhv edə bilərlər. Lakin burda bir neçə faktor var. Misal olaraq, müğənnilər get-gedə yaşlanır, yaddan çıxır və ya yeni müğənnilər çoxalır. Bu ona səbəb olur ki, köhnə məşhurlar ikinci plana keçir və unudulmağa başlayırlar. Bunun qarşısını almaq üçün də süni yolla "təxribat" edirlər".

Bununla yanaşı Dəyanət Rzayev hesab edir ki, belə məsələlərdə sənət adamlarının ümumi şəxsi keyfiyyətləri də əhəmiyyət daşıyır:

"Sənət adamlarının emosional, həssas insan olmalarını da qeyd etmək lazımdır. Bu cür insanlar daha çox diqqət mərkəzində olmaq istəyirlər və aralarında toylara və məşhurluğa görə çox ciddi mübarizə gedir. Bu bir az da daxili mədəniyyətlə əlaqəlidir. Xatirə nə siyasətçidir, nə iqtisadçıdır. Amma efirə çıxıb iqtisadiyyatdan danışır. Yaxşı oxuyursansa, yaxşı səsin varsa, daha çox konsert verməyə, istedadını nümayiş etdirməyə çalış. Ola bilər ki, Xatirə yaxşı insandır və ya savadlıdır. O, gözəl səsi olan keyfiyyətli müğənni də ola bilər. Ancaq siyasi bəyanət verməyinin yeri yoxdur. Mən düşünmürəm ki, buna görə Xatirəni həbs etmək lazımdır. Lakin savadlı insan belə söz heç vaxt danışmazdı. Təbii ki, bunda devalvasiyanın da rolu var. Məsələn, sən dünən gedib on manata bir kiloqram ət ala bilirdin. Səhər açılır, sən gedib həmin məbləğə yarım kilo ət alırsan. İstənilən halda bu durumun sənət adamlarına da təsiri var".

Məhbubə Gülməmmədova
Ölkə.az