YAP-ın Qurultayı nə zaman olacaq?

Bu barədə “Ölkə.Az”-a açıqlamasında Yeni Azərbaycan Partiyasının (YAP) İcra katibinin müavini, Milli Məclisin İctimai Birliklər və Dini Qurumlar Komitəsinin sədri Siyavuş Novruzov bildirib. 

S.Novruzov deyib ki, bu il keçiriləcək prezident seçkilərinə hazırlıq işləri ilə bağlı Yeni Azərbaycan Partiyasının keçirdiyi konfranslar artıq yekunlaşıb. 

Onun sözlərinə görə, YAP-ın rayon və şəhər təşkilatları tam hazır vəziyyətə gətirilib: 

“Digər məsələlərlə bağlı isə yaxın vaxtlarda YAP İdarə Heyətinin müvafiq qərarı olacaq. Bu qərardan sonra seçkilərə hazırlıq işi üzrə proqramlar tərtib olunacaq”.

Prezidentliyə vahid namizədin müəyyən edilməsi ilə əlaqədar YAP-ın Qurultayının nə zaman çağırılacağı ilə bağlı məsələyə də toxunan S.Novruzov qeyd edib ki, bu səlahiyyət yalnız YAP-ın sədrinə aid olan məsələdir:

“Prezident seçkilərində vahid namizədin müəyyən edilməsi ilə Yeni Azərbaycan Partiyasının Qurultayının nə zaman çağırılacağı isə bizim səlahiyyətimizə aid olmadığı üçün dəqiq tarixi söyləyə bilməyəcəm. Bilirsiniz ki, partiyanın Qurulyatı çağırmaq səlahiyyəti sədrə aiddir. Yeni Azərbaycan Partiyasının sədri də nə zaman məsləhət bilsə, qurultay o zaman çağırılacaq”. 

S.Novruzov həmçinin vurğulayıb ki, bu il Milli Məclis tərəfindən dini sahədə yeni qanun layihələrinin qəbul edilməsi gözlənilir:

“Hazırda bu istiqamətdə müvafiq qurumlarla məsləhətləşmələr aparılır”.

Vasif Həsənli
Ölkə.Az