Yaşar Nuriyə sui-qəsd edilib? — Həyat yoldaşı ölüm səbəbini AÇIQLADI

Yaşar Nuriyə sui-qəsd edilib?
14:35
14.09.2018
17854
Mədəniyyət
A
Mərhum Xalq artisti Yaşar Nuri barəsində Elgiz Əkbərovun aparıcısı olduğu "Səhər-səhər" verilişində səsləndirilən fikirlər birmənalı qarşılanmayıb.

"Ölkə.Az"ın məlumatına görə, sosial şəbəkələrdə verilişin Yaşar Nurinin ölümüylə bağlı müzakirələr gedən hissəsi paylaşılıb. Bəziləri sosial şəbəkə istifadəçiləri isə sənətkarın qəsdən öldürüldüyünü iddia ediblər. Əməkdaşımız səsləndirilən iddialarla bağlı sənətkarın həyat yoldaşı Rəhimə Cəbrayılova ilə əlaqə saxlayıb. O, xalq artistinin ölüm səbəbini belə açıqlayıb:

 "Hər bir insan xəstələnə bilər. Ölümündən beş-altı il əvvəl qaraciyərində problem yaranmışdı. İstanbulda əməliyyat edildi, sonradan özünü çox yaxşı hiss edirdi. Həkim ona demişdi ki, siqaret çəkmə, amma gündə əlli qram konyakı limonadla, yaxud meyvə şirəsiylə qarışdırıb içə bilərsən. Demişdi ki, siqaret çəksən ağciyərə də ziyan vuracaq. Mən də onun siqaret çəkməməsi üçün əlimdən gələni edirdim. Hətta bəzən barmaqlarını iyləyirdim ki, görüm siqaret çəkirmi? Düzdür, çox çəkməsə də, siqaret çəkirdi. Həkim dedi ki, sənin orqanizmin çox güclüdür. Çünki komaya düşmüsən, əməliyyat keçirmisən, amma yenə də dözürsən. Yaşarın ölümü qaraciyərlə bağlı olmayıb. Ağciyərdə nəfəs çatışmazlığından vəfat edib".

Qeyd edək ki, Yaşar Nuri 2012-ci ildə 61 yaşında vəfat edib. 

İntiqam VALEHOĞLU
Ölkə.Az

ŞƏRH YAZ
0

İsveçrəli məktəblilərə Azərbaycan rəqsləri öyrədilir

İsveçrəli məktəblilərə Azərbaycan rəqsləri öyrədilir
22:10
Bu gün
266
Mədəniyyət
A
İsveçrədə yaşayan soydaşlarımız bu ölkənin ictimai və mədəni həyatında həyata keçirilən inteqrasiya səciyyəli tədbir və layihələrdə fəal iştirak etməyə çalışırlar. Bu layihələrdən biri də miqrantların mədəniyyətinin təbliğ olunması ilə bağlıdır.

“Ölkə.Az” Diasporla İş üzrə Dövlət Komitəsinə istinadən xəbər verir ki, artıq 3 ildir Aargau bölgəsinin Miqrasiya və İnteqrasiya Departamentinin maliyyə dəstəyi ilə həyata keçirilən layihə məktəblərdə təqdim olunur.

Layihənin rəhbəri İsveçrədəki Azərbaycan Mədəniyyət Mərkəzinin rəhbəri Qasım Nəsirovdur.

Q.Nəsirov bildirib ki, əsas məqsəd məktəbliləri ölkədəki miqrantların mədəniyyətləri ilə tanış etmək, onlara inteqrasiya barədə məlumat verməkdir. Layihə çərçivəsində məktəblilərə Azərbaycan rəqsləri də öyrədilir. Bunun üçün “Qarabağ” Azərbaycan məktəbinin müəllimi Gülnarə Axundova layihədə iştirak etməyə dəvət edilib. Üç ildir ki, G.Axundova isveçrəli uşaqlara milli rəqslərimizi öyrədir.

Qeyd edək ki, bu yaxınlarda Aargauda 16 yaşlı 100 məktəblinin iştirakı ilə təqdim olunan Azərbaycan rəqsləri böyük maraqla qarşılanıb.

Ölkə.Az

ŞƏRH YAZ
0

Dar cığırla hər gün çığırışa-çığırışa məktəbə gedib-gələrdik — Arif Babayevin AĞDAM XATİRƏLƏRİ

Dar cığırla hər gün çığırışa-çığırışa məktəbə gedib-gələrdik
15:40
Bu gün
850
Mədəniyyət
A
“Mən and içmişəm, torpaqlarımız düşmən tapdağından azad olunan gün dizlərimi yerə qoyub, dizin-dizin Qarabağa, qapıma gedəcəyəm”.

Bu sözləri Xalq artisti Arif Babayev “Ölkə.Az”a Ağdam haqqında danışarkən bildirib. 

Xalq artisti deyib ki, geridə qalan 26 il onun üçün çox ağır keçib:

"Həmişə ümid etmişəm ki, Qarabağ qayıdacaq. Millətimiz şad- xürrəm o torpaqlara dönəcək. İnşallah, o ümidlə də yaşayırıq. Qarabağ yaralı yerimizdir. Qarabağ bütün millətin vətənidir. Təkcə mənim, onun deyil, hamının vətənidir. Ağdam mənim üçün də çox əziz yerdir. Böyüyüb başa çatdığım torpaqdı. Onun nisgili mənim hər zaman ürəyimdədir".

Ustad sənətkar artisti münaqişənin tezliklə həllini tapacağına ümid etdiyini dilə gətirib:

"Bizim güclü ordumuz  var, gecə-gündüz çalışan Prezidentimiz, Birinci vitse prezidentimiz - Mehriban xanımımız var. İnanıram ki, onların müdrik siyasəti sayəsində münaqişə tezliklə həllini tapacaq. Biz yenə öz torpaqlarımıza sahib olacağıq.  Əlavə qüvvələr mane olmasa, biz daha da irəli gedəcəyik. Görürsünüz ki, dost dediklərimiz birdə görürsən düşmən çıxır”. 

Əməkdaşımızın “Ağdamlı günlərinizi yada salıb, kövrəlirsiniz?”-sualına xalq artisti kövrələrək cavab verib:

“Vallah elə kövrəlirəm, elə kövrəlirəm, heç təsəvvür edə bilməzsiniz. O torpaqda doğulasan, böyüyəsən –indi gedib görə bilmirəm, o doğma yerlərimə həsrət qalmışam. Tez-tez uşaqlıq illərimi yada salıram, arada cavanlıq illərim gözümün qarşısına gəlir. O üzümlük bağları, bağçamızın ağacları - hamısını xatırlayıram. Xəyallarımda bir-bir ağacları sayıram, deyirəm, bax, orada armud ağacı vardı, hasarın dibindəki heyva agacı görəsən bar verir? Hər gün dar cığırla çığırışa-çığırışa məktəbə gedib-gələrdik. Düşünürəm, görəsən o yerlər necə oldu? Ağdamın hər yeri, nöqtəsinə kimi yadımdadı.  Mən yuxularımda, xəyallarımda hər gün  Ağdama qayıdıram.

Bir dəfə mənə o torpaqların videosunu göstərdilər, iki mərtəbəli evimiz vardı, darmadağın edilmişdi. Evdi, həyətdi bunlar boş şeylərdi mənim üçün, əsas torpaqlarımız qayıtsın. Torpaq hər şeydən əzizdir. Deyirlər “Ana qucağı hər şeydən əzizdir” mən deyırəm ki, torpaq hamısından əzizdir”.

Xatırladaq ki, Ağdam 1992 ci il 23 iyulda ermənilər tərəfindən işğal olunub.

Vüsalə Balayeva
Ölkə.Az

ŞƏRH YAZ
0
BAĞLA