Yazar Samir İmanovun \"Özünlə fəxr et\" kitabının təqdimat mərasimi keçirilib

"Ölkə.Az" xəbər verir ki, kitabın təqdimatında deputat Adil Əliyev, jurnalistlər, ictimaiyyət nümayəndələri və müəllifin yaxın dostları iştirak ediblər.

Kitabın müəllifi haqqında:

Samir İmanov 27 avqust 1981-ci ildə Sumqayıtda anadan olub. Samir İmanov uşaq yaşlarından serebrial iflic və hemofiliya xəstəliyindən əziyyət çəkir. Ağır xəstəliklərə sinə gələn Samir bədii yaradıcılıqla məşğul olur. Onun artıq 3 - “Hədəfdəki insan”, “Mənim hədəfim” və  “Özünlə fəxr et” kitabları işıq üzü görüb.

Kitab haqqında danışan Samir İmanov bildirdi ki, “Özünlə fəxr et” adlı kitabı əlilliyi olan insanlardan bəhs edir. Kitab əlillik məsələsinin müxtəlif sahələrini əhatə edən məqalələrdən ibarətdir. Samir qeyd etdi ki, kitabı yazmaqda əsas məqsədi əlillərə ruh yüksəkliyi vermək və əlillərin problemlərini qabardaraq cəmiyyətə çatdırmaqdır.

Deputat Adil Əliyev sözü gedən kitab təqdimatı haqqında danışmazdan öncə kitab oxumağın vacibliyini vurğuladı və əlavə olaraq dedi ki, gənclərimiz artıq kitablara maraq göstərməlidir:

"Yaxşı vətəndaş olmaq üçün oxumaq vacibdir. Artıq gənclərimiz çayxanalardan, internet klublardan çıxıb kitabxanalara üz tutmalıdırlar".

Daha sonra millət vəkili təqdimata toplaşan insanlara təşəkkür edərək bildirdi ki, əlillərə dəstək vermək hər birimizin borcudur.

Sonda Samir İmanov Adil Əliyevə təşəkkürlərini çatdırdı və qeyd etdi ki, millət vəkilinin dəstəyi sayəsində kitabının təqdimatı və satışı gözlədiyindən də yaxşı keçdi.

Səxavət Məmməd
Fotolar: Elmar Məliksoy
Ölkə.Az