\"Yerli partiyaların istinad etdikləri ideoloji dəyərlərin ciddi bir əhəmiyyəti yoxdur\"

Gələn il Azərbaycanda prezident seçkiləri keçiriləcək. Hakim partiya və müxalif düşərgə artıq üzümüzə gələn sentyabr ayından fəallaşmağa başlayacaq. Azərbaycanda keçiriləcək prezident seçkiləri ölkə daxili ilə yanaşı bölgədə və Azərbaycanda maraqları olan güclər üçün də diqqət mərkəzində olacaq.

Azərbaycanda iqtidar və müxalifətin hazırki vəziyyəti, seçkilərə hazırlıq və maraqlı güclərin Azərbaycana münasibəti barədə politoloq Elşən Manafov "Ölkə.Az"-a danışıb:

"Seçkilər bu və ya digər ölkənin siyasi sisteminə təsirsiz ötüşmür. Azərbaycanda da prezident seçkiləri ərəfəsində Azərbaycan hakimiyyətinə müxalif mövqedə duran ayrı-ayrı siyasi partiyaların fəaliyyətində müəyyən məqamlar təbii ki, özünü büruzə verəcək. Ən azı siyasi partiyalar öz reytinqlərini yüksəltmək, elektral bazalarını artırmaq və hakimiyyətə münasibətdə ciddi müxalif imkanlarına malik olmalarını gücləndirmək üçün müəyyən addımlar atacaqlar".

Gələn ilki seçkilərlə bağlı danışan politoloq qeyd etdi ki, bütövlükdə gələn ilki seçkilər ərəfəsində müxalifətin güclü bir komanda olaraq seçkilərə qatılmaları indiki geosiyasi və ölkə daxli konteksində hələ də ciddi təsir bağışlamır:

"Azərbaycan hakimiyyətinin mövqeləri kifayət qədər güclüdür. Bu ilk növbədə hakimiyyətin seçkilərə nəzarət etmək və təsir etmək imkanları, hakimiyətin həyata keçirdiyi sosial iqtisadi kurs və hakimiyyətin əlində olan ciddi media resusları ilə bağlıdır. Dünyada və bölgədə geosiyasi dəyişikliklərin baş verməyəcəyi təqdirdə Azərbaycanda da hakimiyyətin gələcək müqəddəratı ilə bağlı məsələlərdə hər hansısa bir dəyişikliklərin olacağını istisna edərdim. Digər tərəfdən Azərbaycan hakimiyyətinin balanslaşdırılmış xarici siyasət kursu da regionda maraqları toqquşan geosiyasi güc mərkəzləri arasında manevr etmək, zamanı gələndə bu güc mərkəzləri ilə münasibətləri həm hakimiyyətin özünün konyiktur maraqları, həm də özünün milli təhlükəsizlik konteksində qurmağa imkan verir.

Azərbaycan müxalifəti isə hər halda Azərbaycan hakimiyyəti ilə müqayisədə kifayət qədər yekdil deyil. Ən maraqlı məqam ondan ibarətdir ki, müxalifətin hakimiyyətə münasibətdə vahid cəbhədə, vahid komanda ilə çıxış edə bilməməsinin səbələri heç də müxalif cəbhədə təmsil olunan siyasi partiyaların istinad etdikləri hansısa ideoloji dəyərlərlə bağlı deyil. Ümumiyyətlə, Azərbaycan hakimiyyətinə münasibətdə, Azərbaycanda hakimiyyət uğrunda mübarizədə çox təəssüflər olsun ki, partiyaların istinad etdikləri ideoloji dəyərlərin ciddi bir əhəmiyyəti yoxdur. Bu tendensiya özünü bütün dünyada da göstərir. Azərbaycanda hakimiyyət uğrunda mübarizədə ideoloji dəyərlərin yoxluğunu müşahidə etməklə yanaşı, elekteral bazanın, cəmiyyətin seçkilərə münasibətdə passiv seyirci mövqeyini görürük. Bu seyirci mövqeyini dəyişmək üçün müxalifətin nə ciddi maliyyə resursları var, nə də müxalifətin hakimiyyətlə mübarizədə ciddi düşünülmüş proqramı belə yoxdur. Hakimiyyəti tənqid edən və radikal mövqedə dayanan müxalif partiyalar köhnə ənənələrdən, mitinq taktikasından demək olar ki, uzağa gedə bilməyiblər. Bu mənada uzun illərdir ki, onlar hakimiyyətin legitimliyinə don geyindirmiş olurlar".

"Hakimiyyətin həyata keçirdiyi siyasət ölkənin bütün seçiciləri tərəfindən birmənalı olaraq müsbət qarşılanmır"- deyən Elşən Manafov bildirdi ki, xüsusilə son bir neçə ildə manatın iki dəfə devalivasiyası, ölkədə sahibkarlığın problemləri, orta təbəqənin hələ də ciddi formalaşmaması, korrupsiyaya qarşı mübarizənin davam etdiyi vaxtda hələ də korrupsiyanın olması elekteral bazada müəyyən təəssüflər və narazılıqlar doğurur:

"Bu narazılıqlardan ölkə müxalifəti istifadə edə bilmir. Çünki düşünülmüş aydın, ciddi mübarizə proqramı, maliyyə və ciddi media resursları yoxdur.

Düşünürəm ki, gələn il hakimiyyətin irəli sürdüyü islahatlar kursu ölkə seçkiləri tərəfindən öz sözünü deməlidir. Hakimiyyət müəyyən islahatlara getmək istəyir, hələ ki bu islahatların görüntüsü mövcuddur. Müxalifətdə isə bu istiqamətdə konkret addımların atıldığını, layihələrin ortalığa qoyulduğunu görmürük.

Gələn il "Şahdəniz 2" yatağının istismara verilməsi prezident seçkiləri ilində hakimiyyətin əlini çox möhkəmləndirəcək. Bu yatağın istismara verilməsi ilə Azərbaycan dövlətinin gəlirləri əhəmiyyətli dərəcədə artacaq. Eyni zamanda ümumdaxil məhsulun da 1,5% artacağı ilə bağlı proqnozlar var. Yatağın istismara verilməsi Azərbaycan hakimiyyəti üçün geosiyasi baxımdan da əhəmiyyətli olacaq. Hərçənd düşünürəm ki, bu faktor Rusiya ilə münasibətlərə təsirsiz ötüşməyəcək. Ən azı Rusiya Azərbaycanı Avropa bazarında - xüsusən balkanlarda alternativ tərəf kimi görmək istəmir".

Gələn ilki seçkilərin regional siyasətçilərin diqqətindən yayınmayacağını deyən politoloq əlavə etdi ki, ölkə müxalifəti geosiyasi maraqları nəzərə alır və geosiyasi maraqların bölgədə və Azərbaycanda doğurmuş olduğu nəticələrdən istifadə etmək istəyir:

"Bu da ondan irəli gəlir ki, ölkədə orta təbəqə demək olar ki, yoxdur. Orta təbəqə isə stabilliyin qarantıdır".

Səxavət Məmməd
Ölkə.Az