Mətn ölçüsü:
  • 100%

Zərərçəkmişdən sabiq nazir müavininin oğluna qarşı ittiham

Bu gün Bakı Ağır Cinayətlər Məhkəməsində külli miqdarda dələduzluqda təqsirləndirilən Emil Hüseynovun cinayət işi üzrə məhkəmə iclası davam etdirilib.

"Ölkə.Az"ın Report-a istinadən məlumatına görə, hakim Zeynal Ağayevin sədrliyi ilə keçirilən prosesdə zərərçəkmiş qismində Şahin Allahverdiyev ifadə verib.

O, təqsirləndirilən E.Hüseynovla qohum olduğunu və əvvəllər də iş üçün bir-birlərindən pul aldıqlarını söyləyib: "Sonuncu dəfə üçün 82 min manat verdim. Görülən işdən qazancım olacaqdı. Xaricdən dəmiryolunda istifadə üçün material alınırdı. Burada satışdan əldə edilən qazancdan mənə də pay veriləcəkdi. İşləri yaxşı gedirdi. Bu, onun yaşayışından da məlum idi. Bundan başqa, Emilgil Arif Əsgərovun oğlu Elnarla işləyirdi. Elnarın atasını da bütün ölkə tanıyır. Mən onunla işlədikləri üçün bu qədər pulu verdim. Düzdü, Elnarla işləməsəydilər, pulu verməzdim. Bir dəfə də Türkiyəyə getdik, mala birlikdə baxdıq. Amma malın Bakıya gəlib-gəlməməsindən xəbərim olmadı. Həmin 82 min manatı Emilə 4 il əvvəl vermişəm. Lakin bu puldan cəmi 2 min manatı geri ala bilmişəm".

Zərərçəkmiş məhkəmədə təqsirləndirilən şəxsdən şikayətçi olduğunu deyib: "Əvvəl Emilin qardaşı Rahibi tutdular. Mən də həmin vaxt pulumu istəmədim ki, vəziyyətləri yaxşı deyil. Sonra şikayətçi olanların hamısının pulunu verməyə başladılar. Mən istəyəndə, pulumu qaytarmadıqları üçün şikayətçi oldum. İndi də şikayətçiyəm və pulumu tələb eidirəm”.

Daha sonra digər zərərçəkmiş Emil Məmmədov dindirilib. O, ümumilikdə 4 milyon 500 min manat zərər çəkdiyini söyləyib: "Pullarının sadəcə bir hissəsini geri ala bildim".

E.Məmmədov Arif Əsgərovun oğlu Elnar Əsgərovu dostu vasitəsi ilə tanıdığını, sonradan isə E.Hüseynovla münasibətinin yarandığını vurğulayıb: "İdmançı dostum Elnarın şəxsi mühafizəçisi idi. Bu vasitə ilə Elnarı tanımışam. Sonra da Emillə münasibət yaranıb. İş məsələsindən danışanda Emil xaricdən mal gətirdiklərini bildirdi. Bu işin Elnarın olduğunu, onunla xala oğlu olduqlarını dedi. Sonra biz Elnarla da görüşüb, iş barəsində danışdıq. Mənim verdiyim pulla xaricdən mal gətiriləcək, qazancdan mənə də faiz veriləcəkdi".

Zərərçəkmiş ifadəsində bildirib ki, ilk görüşdə Elnar Əsgərov iş üçün 700 min dollar lazım olduğunu söyləyib: "Pulun çox olduğunu deyib, 100 min verdim. İlk ay qazancdan mənə 12 min manat verildi. İkinci ayda isə 8 min manat. Verdiyim pul qalırdı, sadəcə qazancdan faiz verilirdi. Həmin pulun yenidən dövriyyəyə buraxıldığını deyirdilər. Mən işi Elnarla üzbəüz danışdım. O, mənə bu işin özünün olduğunu, cavabdeh də özünün olacağını qeyd etdi. İlk dəfə 2001-ci ildə 100 min, sonra isə bir neçə dəfə pul vermişəm. 2013-cü ilə qədər 4 milyon 500 mini verdim. Bir gün xəbər aldım ki, Emilin qardaşı Rahibi tutublar. Mən də Emilə zəng elədim. O, mənə narahat olmamağımı bildirdi. Sonra Elnarla əlaqə saxladım. Görüşüb danışacağımızı dedi. Həmin vaxt Elnar Əsgərovla görüşüb, pulun bir hissəsini qaytardı. Bir sözlə, Elnar aldıqları puldan mənə 720 min dollar qaytardı. Emil də ümumilikdə 380 min verib. Qalan məbləğ isə hələ də qaytarılmayıb”.

O, E.Hüseynov həbs ediləndən sonra Elnar Əsgərovun ona qarşı münasibətinin dəyişdiyini bildirib: "İstintaq dövründə Elnar işi Emilin, Emil də Elnarın üstünə atdı. Həmin dövrdə Arif Əsgərov sabiq nəqliyyat naziri Ziya Məmmədovun müavini oldu. Mən Elnara mesaj yazıb, atasına görə təbrik etdim, sonra onunla görüşdük. Görüş zamanı Elnar dedi ki, atası artıq nazir müavinidir və arxası güclüdlür. O, mənə verəcək pulunun olmadığını qeyd etdi. Görüşdən ayrılandan sonra Emilə zəng elədim. Telefonu anası açıb dedi ki, "pulumuz yoxdur. Bu işdə Arif Əsgərovun oğlu Elnar da əsas günahkardır".
Daha sonra təqsirləndirilən E.Hüseynov məhkəmə kollegiyasının suallarını cavablandırıb. O, həmin dövrdə heç bir torpaq sahəsi almadığını deyib: "Rayonda torpaq sahələrimiz var. Onlar da pay torpaqlarıdır və atam tərəfindən alınıb. Həmin ərazidə fermer təsərrüfatı ilə məşğul olurlar. Mən həmin ərəfədə sadəcə olaraq ata evimi bir az təmir elətdirmişəm”.

Məhkəmənin növbəti prosesi avqustun 25-nə təyin edilib.

Qeyd edək ki, E.Hüseynov vətəndaş Tural Hüseynovun etibarından sui-istifadə edərək, ondan 382 min dollar, Namiq Mehdiyevdən 80 min manat, Emil Məmmədovdan 2 milyon 500 min dollar və Mərziyyə Rzayevadan isə 19 500 manat pulu dələduzluq yolu ilə ələ keçirib. Həmin şəxslərin hüquq-mühafizə orqanlarına şikayətindən sonra cinayət işi başlanılıb. Cinayət materiallarına əsasən, E.Hüseynov Gürcüstan Respublikasından izolyasiya və digər materiallar gətirmək adı ilə həmin vətəndaşları aldadıb.

O, Cinayət Məcəlləsinin 178.3.2-ci (dələduzluq, külli miqdarda törəldildikdə) maddəsi ilə ittiham olunur.

Barəsində həbs qətimkan tədbiri seçilən E.Hüseynov məhkəməyə müraciət edib. O, həbs qətimkan tədbirinin ev dustaqlığı ilə əvəz edilməsini istəyib. Səbail Rayon Məhkəməsində hakim Azər Tağıyevin sədrliyi ilə keçirilən prosesdə vəsatət təmin edilib, E.Hüseynovun barəsində ev dustaqlığı qətimkan tədbiri seçilib. O, məhkəmə zalından azadlığa buraxılıb.

Xatırladaq ki, E.Hüseynov sabiq nəqliyyat nazirinin müavini Arif Əsgərovun baldızı oğludur.