Polkovnikdən qəza ilə bağlı şübhələrə cavab

“Helikopterin qəzaya uğraması ilə əlaqədar olaraq  DSX rəsmi məlumat versə də, sosial şəbəkələrdə geniş müzakirlər aparılır və bu da başa düşüləndir. Bu onu göstərir ki, cəmiyyət biganə deyil, nigarandır və hadisə ilə maraqlanır. Odur ki məsələ ilə bağlı hərə öz subyektiv fikrini yazır. Lakin bunların hamısı mütəxəssis rəyindən uzaqdır”.

Bunu “Ölkə.Az”a açıqlamasında hərbi ekspert Şair Ramaldanov deyib.

Onun sözlərinə görə, bu fikirləri helikopterin uçmazdan öncə hansı texniki baxışdan keçməsi, onun texniki imkanlarından məlumatsız olanların fikri kimi dəyərləndirmək olar. 

“Ona görə də onlar sosial şəbəkələrdə hərə reallıqdan uzaq mülahizəsini ifadə edirlər və bunu da anlamaq olar. Ancaq belə ciddi məsələdə mütəxəssis rəyini gözləmək lazımdır. Bu da ancaq “qara qutu” deşifrə olunduqdan sonra bəlli olacaq”- ekspert qeyd edib.

Hərbi texnikiların köhnə və yararsız olması ilə bağlı səslənən fikirlərə mövqeyini açıqlayan Ramaldanov bildirib ki, bir hərbi ekspert kimi bu fikirlə tamamilə razı deyiləm: “Birincisi, bu minik manşını deyil ki, istənilən şəxs oturub sürsün. Hərbi texnikanın, xüsusən də helikopter, təyyarə uçmazdan öncə uçuşa hazırlıq mərhələsi var. Helikopter və ya təyyarə uçmazdan öncə ona texniki baxış keçirilir. Uçuşa hazır olmadıqda onun uçuşuna icazə verilmir. Bu ciddi bir prosesdir.

Digər tərəfdən bu texnikalara davamlı olaraq baxışlar keçirilir. İtismar müddəti bitən və ya xarab olanlar dəyişdirilir. Odur ki helikopter köhnə olduğuna görə qəzaya uğrayıb fikri tamamilə yanlışdır.  Köhnə də, təzə də qəzaya uğraya bilər. Qəzanın yaradan səbəblər və qaranlıq məqamlar var. Hazırda bunun səbəbləri araşdırılır”.

Helikopterdə uçan heyətin zabit heyətinin olması ilə bağlı səslənən iddialara gəldikdə Ramaldanov deyib ki, burada qeyri-adi heç nə yoxdur: “Həmin zabit heyəti çöl şəraitində keçiriləcək təlimlər üçün təlim bazasına gedirmiş. Onlar hansısa  təlim tapşırıqlarını həyata keçirmək üçün uçublar. Ola bilsin ki, zabit heyəti ərazidə vizual baxış keçirib. Odur ki helikopterdə zabit heyətinin uçması, tam normal haldır. Özü də helikopterdə onun texniki göstəricisinə uyğun sayda insan olub. Burada nəsə başqa məqam axtarmaq yanlış fikirdir. 

Qəzanın başvermə səbəbləri hamıya maraqlıdır, ilk növbədə DSX-ya… Baş verən hadisə ilə bağlı cinayət işi açılıb və aparılır. Qəza cənab Prezidentin nəzarətindədir. Məlumat olduqca  ictimaiyyət məlumatlandırılacaq”.

Mürtəza
Ölkə.Az