\"Təbliğat aparılsa, yüzlərlə insan ərizə yazar\"

"20 oktyabr 2020-ci il tarixdə Milli Məclis tərəfindən “İnsan orqan və toxumalarının donorluğu və transplantasiyası haqqında" Azərbaycan Respublikasının Qanunu qəbul edilib. Bu qanun ona görə vacibdir ki, orqanlara ehtiyacı olan insanlara həyat bəxş edək. Müraciətlərdən bilirəm ki, yüzlərlə insanın orqan plantasiyasına ehiyacı var. Hətta orqan plantasiyasını onilliklərlə gözləyən vətəndaş var ki, Allah hələ də yaşamasına imkan verir". 

"Ölkə.Az" xəbər verir ki, bunu deputat Razi Nurullayev parlamentdə çıxışı zamanı deyib.

Onun sözlərinə görə, qanun qəbul olunandan bəri xeyli orqan bazası toplanmalı və ehtiyacı olanlara verilməli idi.

"Amma, görünən budur ki, deyəsən, məsələnin həll olunmasında ciddi çətinlik var. Bu çətinliyin mahiyyəti barədə məlumat verilməsini istərdim. Avtoqəzaya düşənlər var, könüllü orqan vermək istəyənlər, vəsiyyət edənlər və sairə da var. Ola bilsin ki, maarifləndirmə sarıdan çətinlik var. Elə bilirəm ki, əgər sosial şəbəklər və televiziyalar üzərindən təbliğat və maarifləndirmə aparılsa, ay ərzində yüzlərlə insan könüllü orqan bağışlamaq barədə ərizə yazar", - o bildirib. 

O bu məsələni çox vacib hesab edir və aydın şəkildə bir izahat olsa, növbəti addımlar haqqında düşünə bilər və təkliflərlə çıxış edər: "Bir insana orqan bağışlamaq elə öz həyatını bu dünyada sürdürməyə bərabərdir".

Mürtəza
Ölkə.Az