Qələbəmiz bəzi güclərin boğazında kal armud kimi ilişib qalıb - Fəzail İbrahimli
Azərbaycan Prezidenti cənab İlham Əliyev AzTV-yə müsahibəsində dünya ictimiayyətinə mesaj verdi ki, nə Dağlıq Qarabaq adlı bir inzibati ərazi, nə də status var.
Bunu “Ölkə.Az”a müsahibəsində Milli Məclis sədrinin müavini Fəzail İbrahimli deyib.
Onun sözlərinə görə, son dövrlərdə biz bəzi ölkələrin rəsmiləri tərəfindən hələ də “Dağlıq Qarabağ”, “status” sözünü eşitməkdəyik.
”Təbii ki, Azərbaycanın 44 günlük Vətən müharibəsində əldə etdiyi parlaq qələbə hələ də bəzi dövlətlərin və güclərin boğazında kal armud kimi ilişib qalıb və bu qələbəni həzm edə bilmirlər. Biz bunun Azərbaycanda akkreditasiya olunan xarici ölkələrin diplomatik korpuslarının nümayəndələrinin işğaldan azad olunmuş Şuşaya və Qarabağa səfəri zamanı da şahidi olduq. Belə ki, xüsusən də ATƏT MQ həmsədri olan 3 ölkənin diplomatlarının Şuşaya getməmələri onların bütün niyyətlərinin fəlsəfəsini tam çılpaqlığı ilə ortaya qoydu. Baxmayaraq ki, bu dövlətlərin bəziləri özlərini dost kimi qələmə verib sözdə əldə etdiyimiz nailiyyətləri dəstəklədiklərini bəyan edirlər. Amma arxada əməlləri başqadır. Bunlar hər vəchlə ölmüş Minsk qrupunu yenidən diriltməyə çalışırlar. Ona görə də “Dağlıq Qarabağ”, “status” sözlərini işlədirlər. Ancaq cənab Prezident bir daha qətiyyətlə əmin etdi ki, artıq belə bir problem mövcud deyil və həll olunub”, - vitse-spiker qeyd edib.
Milli Məclis Sədrinin müavini əlavə edib ki, cənab Prezident arqument və faktlarla açıq formada yüz minlərlə erməninin yaşadığını Fransa, ABŞ və digər ölkələrdə ermənilərə status verilməsi təklifi ilə çıxış etdi: “Bildirdi ki, Fransada 500 min, ABŞ-da 1 milyondan artıq etrməni yaşayır. Əgər istəyirsinizsə, öz ərazinizdə onlara status verin. Niyə status verilmir?! Azərbaycanda çox kiçik bir qrup halında yaşayan erməniyə necə status vermək olar.
Azərbaycanın artıq belə bir problemi yoxdur. Düzdür, artıq bu fikri ortaya atanlar da yaxşı bilir ki, qatar gedib. Lakin bu yolla Azərbaycana təzyiq edib, maraqlarını təmin etməyə çalışırlar. Bu da mümkün olan şey deyil. Çünki Azərbaycan Prezidenti milli maraqları hər şeydən üstün tutub müstəqil siyasət yürüdən qətiyyətli bir liderdir”.
O əlavə edib ki, 44 günlük müharibə nəticəsində Azərbaycan bölgədə yeni bir reallıq yaradıb və dünya ictimaiyyəti bu reallığı qəbul etməkdədir: “Azərbaycan Prezidenti yeni reallığa uyğun olaraq real addımlar ataraq mövqelərini möhkəmləndirməkdədir.
Mən bir məqama diqqət çəkmək istəyirəm 7 iyul 1923-cü ildə Moskvanın qərarı Dağlıq Qarabağ Muxtar Vilayəti yaradılır və ondan 98 il sonra 7 iyul 2021-ci ildə Azərbaycan Prezidenti cənab İlham Əliyevin sərəncamı ilə Qarabağ və Şərqi Zəngəzur iqtisadi rayonu yaradılır. Bax, budur qətiyyətli, uzaqgörən bir dövlət başçısının yürütdüyü siyasətin mahiyyəti... Əgər 7 iyul 1923-cü ilə Azərbaycan tarixinə qara hərflərlə yazılıbsa, 7 iyul 2021-ci ildə Qarabağ və Şərqi Zəngəzur iqtisadi rayonun yaradılması, qırmızı hərflərlə yazılacaq və qeyd ediləcək. Bununla da Azərbaycan Prezidenti Dağlıq Qarabağ ifadəsini siyasi leksikondan birdəfəlik silib atdı. Odur ki cənab Prezidentin müsahibəsinin səciyyəvi cəhətləri bundan ibarətdir; Birincisi, 44 günlük müharibədən öncə qarşıya qoyulan hədəflərə nail olunub və kimsə bizi bu hədəflərdən yayındıra bilməz. İkincisi, cənab Prezident sözünü heç kimdən çəkinmədən dünya birliyinə açıq və səmimi formada çatdırdı. Üçüncüsü, dediyimiz sözün ağasıyıq, demişiksə edəcəyik”.
Mürtəza
Ölkə.Az
