Deputat: “Soçi görüşü Azərbaycanın növbəti diplomatik qələbəsidir”
Azərbaycan, Rusiya və Ermənistan liderlərinin Soçidə keçirilən görüşünün yekunları və imzalanan birgə bəyanat Cənubi Qafqazda sülhün, sabitliyin və əməkdaşlığın təmin olunması istiqamətində atılan müsbət addım kimi qiymətləndirilməlidir.
Bunu “Ölkə.Az”a açıqlamasında deputat Məşhur Məmmədov deyib.
Onun sözlərinə görə, görüşün yekunu olaraq imzalanan bəyanat və orada əks olunan müddəalar Azərbaycanın tam maraqlarına cavab verir.
“Belə ki, imzalanan bəyanatda heç bir şərt qoyulmadan Azərbaycan Prezidentinin mövqeyi öz əksini tapıb. Bu, cənab Prezidentin yürütdüyü uğurlu diplomatiyanın nəticəsi və növbəti qələbəsi kimi dəyərləndirilməlidir”, - o qeyd edib.
Deputat əlavə edib ki, sənəddə əksini tapan müəddəalar, xüsusən də kommunikasiyaların, avtomobil və dəmir yollarının açılmasını nəzərdə tutan layihələrə başlanması ilə bağlı qərarların qəbul olunması, sərhədlərin demarkasiyasi, delimitasiyası kimi məsələlər Azərbaycan Prezidenti tərəfindən uzun müddətdir irəli sürülür və buna hazır olduğunu bəyan edir: “Azərbaycan təkcə bunu sözdə yox, əməldə də sübut edir. Azərbaycan bölgədə sıx əməkdaşlıq formatının yaranması üçün nəqliyyat dəhlizlərinin tikintisinə və digər infrastruktur layihələrinin icrasına başlayıb. Lakin Ermənistan tərəfi bu istiqamətdə hələ də destruktiv mövqeyi sərgiləməkdədir. Ermənistan bununla bağlı 10 noyabr 2020-ci il və 11 yanvar 2021-ci ilə bəyanatı zamanı üzərinə öhdəlik götürməsinə baxmayaraq, indiyədək bu istiqamətdə real addım atmayıb və əksinə hər vəchlə bölgədə gərginliyin davam etməsi istiqamətində fəaliyyət göstərib, təxribatçı hərəkətlərə yol verməkdədir. Odur ki Soçidə keçirilən görüşün yekunu olaraq imzalanan sənəddə əksini tapan məsələlər bir daha onu deməyə əsas verir ki, Azərbaycan qarşısına qoyduğu məqsədlərə nail oldu. Çünki Rusiya prezidenti Putin də təxirəsalınmadan ən qısa zaman ərzində Ermənistanın Azərbaycanla sərhədlərin demarkasiyası, delimitasiyası ilə bağlı komissiyanın yaradılmasını, nəqliyyat dəhlizlərinin açılması istiqamətində real addımlar atılmasının tərəfdarı olduğunu bəyan edib. O baxımdan Rusiyanın Cənubi Qafqazda sabitliyin və əməkdaşlığın yaranmasında, xüsusən də Ermənistanla Azərbaycan arasında nəqliyyat dəhlizlərinin açılması, sərhədlərin müəyyənləşməsi istiqamətindəki mövqeyi təqdir olunasıdır. Putinin üçtərəfli görüşdə səsləndirdiyi bir-birinin ərazi bütövlüyünü və suverenliyini tanımaq və gələcəkdə qonşu kimi yaşamağı təşviq etmək üçün Ermənistana sülh razılaşması üzərində işə başlamağı təklif etməsi, bunun bariz göstəricisidir. Bu isə onu deməyə əsas verir ki, 44 günlük Vətən müharibəsindən sonra Azərbaycanın bölgədə yaratdığı yeni reallıq Moskvanın bölgədəki maraqları ilə üst-üstə düşür. Ümid edirəm ki, Ermənistan tərəfi də destruktiv mövqelərinə son verərək bölgədə sülhün, sabitliyin və əməkdaşlığın yaranması istiqamətində real addımlar atacaq. Son olaraq onu qeyd etmək istərdim ki, Soçi görüşü Azərbaycanın növbəti qələbəsi idi”.
Mürtəza
Ölkə.Az
