Vitse-spiker: “Ermənilər Azərbaycana müraciət edəcək: Gəlin bizi daşnaklardan xilas edin”
Bunu “Ölkə.Az”a açıqlamasında Milli Məclisin sədr müavini Fəzail İbrahimli deyib.
Vitse-spiker sözlərinə görə, bu günədək Ermənistanın Cənubi Qafqazda bir dövlət kimi mövcudluğunun əsas səbəbi forpost ölkə olması olub.
“Artıq Ermənistan bir forpost kimi də rolunu itirib. Yəni kiminsə aləti olmaq imkanından da məhrum olub” - deputat qeyd edib.
Onun sözlərinə görə, Ermənistanın indi üzləşdiyi faciəvi durumdan fərqli olaraq, daha uğurla çıxmaq imkanı olub, amma bu şanslarını əldən verdilər:
“O zaman Azərbaycan indiki Azərbaycandan tamamilə fərqli bir ölkə idi. Azərbaycan iqtisadiyyatı və ordusu zəif idi. Amma buna baxmayaraq Azərbaycan Ermənistanın əldə etdiyi müvəqqəti uğurlar və qələbələr qarşısında müqavimət göstərib tab gətirdi. Ermənistanın işğalı ilə razılaşmayıb, onların irəli sürdüyü şərtləri qəbul etmədi. Ulu öndər Heydər Əliyev və daha sonra bütün liderlik keyfiyyətlərini özündə cəmləşdirən Prezident İlham Əliyev Azərbaycanın üzləşdiyi problemin həlli istiqamətində səbrlə, ancaq yorulmadan ciddi fəaliyyət göstərdi. İlk olaraq ölkədə siyasi sabitliyə nail olundu. Bununla yanaşı olaraq ölkə iqtisadiyyatı gücləndirildi, ordu müasir standartlara uyğun şəkildə quruldu və gücləndirildi. Eyni zamanda Azərbaycan qarşısına qoyduğu hədəflərə nail olmaq üçün beynəlxalq aləmdəki mövqeyini gücləndirib, nüfuzlu bir ölkəyə çevrildi”.
Vitse-spiker bildirib ki, vəziyyət zaman keçdikcə Ermənistanın ziyanına, Azərbaycanın isə xeyrinə dəyişməyə başladı:
“Ermənistanda Nikol Paşinyanın hakimiyyətə gəlişi ilə vəziyyət tamamilə fərqli bir istiqamətdə inkişaf etdi. Qarabağ kartı üzərində Ermənistanda hakimiyyətə gələn cinayətkar hərbi xunta hakimiyyətinin ömrünü uzatmaq üçün yeni idarəetmə üsulu onun öz sonunu gətirdi. Bir misal var, deyərlər: “Çoxbilmiş quş dimdiyindən ilişər”. Hakimiyyətdə olan Sərkisyan da çoxbilmişlik edib hakimiyyətinin ömrünü uzamaq istədi, lakin çoxbilmiş quşun vəziyyətinə düşdü və öz oyununun qurbanına çevrildi. Nəticədə Sərkisyan hakimiyyətdən getməli oldu və onu Paşinyan əvəzlədi. Onun hakimiyyətindən sonra Ermənistanda proseslər tamamilə fərqli istiqamətdə inkişaf etməyə başladı.
Dövlətçilik anlayışı olmayan Paşinyan Azərbaycana qarşı ən müxtəlif təxribatlara əl atmağa başladı. Onun bu təxribatları Azərbaycana beynəlxalq hüquq normalarına uyğun şəkildə adekvat addım atmaq şəraiti yaratdı. Azərbaycan isə öz növbəsində üzləşdiyi problemin həlli üçün məqam gözləyirdi və buna hazır idi. Çünki bu müddət ərzində cənab Prezident İlham Əliyev ölkəni yalnız iqtisadi və ordu cəhətdən gücləndirib, bölgənin lider ölkəsinə çevriməmişdi, eyni zamanda xalqın birliyinə və həmrəyliyinə nail olmuşdu. Xalq onun ətrafında bir yumruq kimi sıx birləşmişdi. Zamanını səbr və təmkinlə gözləyən Azərbaycan üçün vaxt yetişdi. 2020-ci ilin payızında Azərbaycan Ermənistanın təxribatlarına cavab olaraq əks-hücum əməliyyatına başlayıb 44 günlük müharibə nəticəsində işğala son verdi. 44 günlük müharibə nəticəsində Azərbaycan təkcə öz ərazi bütövlüyünü təmin etmədi, eyni zamanda 200 ildən artıq davam edən problemlərimizin həllinə imkan yarandı. Bu qələbə eyni zamanda “böyük Ermənistan” ideologiyasını darmadağın edib, erməni faşizminə son verdi. Ermənilərin uydurduğu miflər puça çıxdı. Bununla da Azərbaycan həm Ermənistan cəmiyyətinin, həm də dünya ermənilərinin gözləntilərini xəyal qırıqlığına uğratdı. Qələbədən sonra ağır travmatik vəziyyətə düşən Ermənistan cəmiyyətində və dünya ermənilərində gələcəyə olan inamı günbəgün azaldı. Bu proses erməni diaspor təşkilatlarında da açıq formada biruzə verməyə başladı. Artıq erməni diaspor təşkilatları əvvəlki kimi proseslərə həssaslıqla deyil, laqeyd yanaşırlar. Bu da öz növbəsində Ermənistanın siyasi həyatına ciddi sirayət etməkdədir. Ermənistanda böhran hərtərfli formada dərinləşməkdədir və bundan çıxış yolu yoxdur. Səbəb isə uzun illər boyu əsiri olduqları saxta ideologiyalardan hələ də əl çəkə bilməmələridir. Bu isə onları daha pis böhrana və faciələrə sürükləyir. Baxın, Ermənistan prezidenti Armen Sərkisyanın da vəzifəsindən istefa verib xaricə getməyinin kökündə bu dayanır. Halbuki, hazırda Ermənistanda prezidentin istefası üçün elə bir ciddi siyasi zəmin və ya həyatına təhlükə yox idi. Bəs, o zaman niyə belə bir addım atıb?! Axı, prezident sıradan olan vəzifə deyil ki, onu istədiyin vaxt heç kimə demədən tərk edəsən. Sərkisyanın istefasının arxasında məhz Ermənistanın gələcəyinə olan ümidsizlik və üzləşdiyi vəziyyətdən çıxış yolunun olmaması dayanır. O, Ermənistanın üzləşdiyi böhrandan çıxış yolunu görə bilmədiyi üçün istefa verib. O, istər mövcud hakimiyyətin, istərsə də, hakimiyyətə iddialı digər qüvvələrin Ermənistanı üzləşdiyi durumdan çıxarmaq qabliyyətinə malik olmadıqlarını yaxşı bildiyi üçün ölkəni tərk edərək, istefa verib. Onun istefası Ermənistan cəmiyyəti üçün nonsens olduğu kimi həm də ciddi bir mesajdir”.
Bununla belə vitse-spiker əlavə edib ki, Ermənistanın üzləşdiyi böhrandan çıxış yolları mövcuddur: “Ermənistanın üzləşdiyi böhrandan xilası, ancaq və ancaq yürütdüyü siyasətdə kordinal dəyişiklik edib, Azərbaycan və Türkiyə ilə mehriban qonşuluq münasibətləri qurmasından keçir. Ermənistan və dünya erməniləri nə qədər ki, bunu anlamayıblar, onları gələcəkdə daha dəhşətli faciələr gözləyir. Bunun üçün isə ilk növbədə Ermənistan Azərbaycan və Türkiyəyə qarşı ərazi iddiasından əl çəkib, hər iki ölkənin ərazi bütövlüyünü tanımalı, Azərbaycanla sərhədləri müəyyənləşdirib, sülh sazişi imzalamalı və normal qonşuluq münasibətəri qurmalıdır. Bir sözlə Azərbaycanın şərtlərinə əməl edib qısa zamanda icra etməlidir. Bunun əksi isə Ermənistan cəmiyyətini yeni bir formada iflasa uğradacaq. İnsanlar Ermənistanı kütləvi surətdə tərk edəcək, acında ölən öləcək, qalanlar isə nəticədə Azərbaycana müraciət edərək “gəlin bizi daşnakların əlindən xilas edin” deyəcəklər”.
Mürtəza
Ölkə.Az
