Guya iki qardaş dövlət artıq fərqli cinahlarda dayanırlar – Sahib Alıyev
“Antimilli ünsürlər son zamanlar yenə də haylarla çiyin-çiyinə verərək Azərbaycan-Türkiyə əlaqələrinə zərbə vurmağa çalışırlar. Cəmiyyətə aşılayırlar ki, guya iki qardaş dövlət artıq fərqli cinahlarda dayanırlar. Bunun sifarişini verənlərin kimliyi isə heç də sirr deyil. Bu sifarişin arxasında Azərbaycan və Türkiyəni Rusiya ilə toqquşdurmağa çalışanlar durur”.
Ölkə.Az xəbər verir ki, bunu deputat Sahib Alıyev parlamentdə çıxışı zamanı deyib.
Onun sözlərinə görə, İlham Əliyevin Moskvaya dünənki səfəri də göstərdi ki, onların bu cəhdləri əbəsdir.
“Hesab edirəm ki, bu səfər işgüzar xarakterli olsa da, əslində, aramızdakı əməkdaşlığa ağ səhifədən başlanmasının özülünü qoymaqla tarixi önəm daşıyır. Ona görə tarixi önəm daşıyır ki, iki dövlət arasında əlaqələrin dərinləşməsinə maneçilik törədən faktorlar demək olar ki, aradan qalxıb”, - o qeyd edib.
Laçında sərhəd keçid məntəqəsinin yaranmasından ötən ildə baş verənlərə diqqət çəkən deputat bildirib ki, belə bir addım atmaqla Azərbaycan öz torpaqları üzərində suverenliyini tam təmin etməyə qərarlılığını və bunun üçün bütün risklərə hazır olduğunu göstərdi: “Xatırlayırsınızsa regionda “qırmızı xətt” çəkənlərdən tutmuş, onların “şeytan” adlandırdıqlarınadək bütün yırtıcılar ayağa qalxaraq geriyə addım atmamızı istədilər. Amma unudurdular ki, iradə dəmirdirsə, verilən əmrdirsə, o, heç vaxt geriyə oxunmur. Və o dəmir iradəlinin ötən il bu gün verdiyi əmrin nəticəsi idi ki, Rusiya hərbi kontingenti Qarabağı vaxtından əvvəl tərk etdi. Elə Qazaxın dörd kəndinin geri qaytarılmasında da ötən il bu gün atılan addımın rolu az deyil.
Müzəffər Ali Baş Komandanımız sözü gedən dörd kəndimizi, onlardan da qabaq Ağdam, Kəlbəcər və Laçın rayonlarını döyüşsüz geri qaytarmaqla iki dəfə məhz belə bir örnək ortaya qoyub.
Bu, əslində, təkcə Ermənistan yox, həm də beynəlxalq hüququn ancaq özləri istəyəndə işləməsini, digər hallarda BMT-nin bizə bəlli 4 qətnaməsi kimi yerinə yetirilməməsinə göz yumanların üzərində qələbə idi.
Sonda soruşmaq istəyirəm, dörd kəndimizin qaytarılmasını Almatı deklarasiyasına bağlayanlar, maraqlıdır, 30 ildə niyə bircə dəfə belə həmən sənədin adını çəkmirdilər? Üç ildə nə baş verdi ki, Almatı deklarasiyası yadlarına düşdü?”
Mürtəza
Ölkə.Az
