Azərbaycan-Ermənistan görüşü iki gün davam edəcək - YENİLƏNİB
Almatıda Azərbaycan və Ermənistan xarici işlər nazirləri Ceyhun Bayramov və Ararat Mirzoyan arasında danışıqlar başa çatıb.
Ermənistan və Azərbaycan xarici işlər nazirləri arasında Almatıda danışıqlar iki gün davam edəcək.
Ölkə.Az Sputnik Qazaxıstan-a istinadən xəbər verir ki, bunu Azərbaycan naziri Ceyhun Bayramov Ermənistan və Qazaxıstan XİN rəhbərləri ilə üçtərəfli görüşdə deyib.
O, danışıqların Azərbaycan-Ermənistan münasibətlərinin nizamlanması üçün çox faydalı olacağına əminliyini ifadə edib.
"Əminəm ki, Almatıdakı danışıqlar çox faydalı olacaq və biz qarşıdakı iki gün ərzində mövcud açıq məsələlərin həlli yollarını tapmaq üçün məhsuldar işləyə biləcəyik", - Bayramov bildirib.
O, həmçinin qeyd edib ki, son danışıqların mühüm elementi Azərbaycan-Ermənistan dövlət sərhədinin delimitasiyası prosesinin əsasını qoyan protokolun imzalanmasıdır. Onun sözlərinə görə, Bakıda bu prosesə xüsusi diqqət yetirirlər.
Bayramov əlavə edib ki, hazırda birgə səylərlə müvafiq ərazilər təmizlənib, coğrafi koordinatlar dəqiqləşdirilib. Bu ərazidə sərhəd dirəklərinin quraşdırılması demək olar ki, yekunlaşıb.
Mayın 10-da Qazaxıstan naziri Murat Nurtleunun iştirakı ilə Almatıda Ermənistan və Azərbaycan xarici işlər nazirləri arasında danışıqlar başlayıb. Görüşdən sonra onlar mətbuata açıqlama verəcəklər.
Elvin
***
Almatıda Azərbaycan və Ermənistan xarici işlər nazirləri Ceyhun Bayramov və Ararat Mirzoyan arasında görüş keçirilir.
C.Bayramov və A.Mirzoyan danışıqlar aparmaq üçün Almatıdakı Dostluq Evinə gəliblər.
Azərbaycan və Ermənistan xarici işlər nazirlərini Qazaxıstanın xarici işlər naziri Murat Nurtleu qarşılayıb.
Daha sonra onlar mətbuata bəyanatlarla çıxış edəcəklər.
