Həmsədrlərdən yeni çağırış: işğal olunmuş Qarabağdakı dinc erməniləri öldürməyin!

ATƏT-in Minsk qrupunun həmsədrləri verdikləri bəyanatlar və səsləndirdikləri fikirlərlə yenə hər kəsi heyrətləndirməkdə davam edirlər.

Bu gün yayılan bir xəbərdə həmsədrlər Azərbaycan və Ermənistanı dinc əhali arasında ölüm hallarının baş verməməsi üçün öhdəlik götürməyə çağırıblar. Həmsədrlər cəbhə xəttində baş verən silahlı insidentlər nəticəsində mülki şəxslərin ölməsi və yaralanmasından "narahat" olduqlarını bildiriblər.

Artıq 21-ci ildir bu münaqişə ocağının hər qarışında monitorinq keçirən, hər iki tərəfdən bütün cəbhəboyu ərazini qarış-qarış gəzən ATƏT-in Minsk qrupununun həmsədrləri görünür hələ də kiçik regionumuzun xəritəsini qavraya və münaqişənin mahiyyətini dərk edə bilməyiblər.

Əvvəla cəbhə xəttinin keçdiyi zolağın əsas hissəsinin Azərbaycanın ermənilər tərəfindən işğal edilmiş əraziləri olduğunu həmsədrlər gözəl bilirlər və ölüm halları da əsasən bu ərazilərdə olur. Əgər cəbhənin Füzuli, Ağdam, Tərtər istiqamətində baş verən silahlı insidentlərdə mülki şəxs ölürsə, onlar yalnız Azərbaycan vətəndaşarı olurlar. Məntiqlə bu ərazilərdə ermənilərin, həm də "dinc erməni sakinlərin" olması qeyri-mümkündür. Amma nədənsə həmsədrlərin "yumşaq məntiqi" ilə belə bir öhdəliyi Azərbaycan da götürməlidir.

Ortaya sual çıxır, əgər bütün cəbhə boyu atəşkəsin pozulması nəticəsində ölən mülki şəxslərin ancaq azərbaycanlılar olduğu danılmaz faktdırsa, onda biz hansı mülki ermənini öldürməməyi öz üzərimizə öhdəlik götürməliyik? Cəbhənin Qazax istiqamətindən tutmuş ta Dağlıq Qarabağın işğal olunmuş rayonlarına qədər ermənilərin nəzarətində olan zolaqda heç bir ermənilərin məskunlaşdığı yaşayış məntəqəsi yoxdur. Qazax rayonun Ermənistanla sərhəddə yerləşən kəndləri də ermənilər tərəfindən işğal olunduğundan bu ərazidə də "dinc erməni" yoxdur. Atəş zolağının bütün hissələrindəki təhlükəli zonalar isə Azərbaycanın dinc əhalisinin yaşadığı kənd və qəsəblərlə doludur. Cəbhəyə yaxın yerləşən kəndlərin əkin sahələri və otlaqları da ermənilərin birbaşa atəş xəttinin altına düşür. Hər il onlarla dinc azərbaycanlı erməni gülləsinə tuş gələrək ölür və yaralanır.

Azərbaycan və Ermənistanın yaydığı rəsmi xronikada belə cəhbhə xəttində ölənlərin dəqiq kimliyi aydın surətdə bildirilir. İşğal altındakı Ağdam, Füzuli rayonları ərazisində əsgərlərimiz tərəfindən öldürülən onlarla Ermənistan vətəndaşı haqqında məlumat əldə etmək üçün erməni KİV-lərinin arxivindəki Ermənistan müdafiə nazirliyinin yaydığı press-relizlərinə baxmaq kifayət edir. Onların hamısı Dağlıq Qarabağdakı erməni işğal qüvvələrinin yaraqlılarıdır. və demək olar ki hamısı Ermənista vətəndaşlarıdır. Qeyd edirik ki, bu məlumatlar həmsədrlərin dəftərxanasına həm Azərbaycan, həm də Ermənistan tərəfindən operativ şəkildə çatdırılır. ATƏT rəhbərliyinin informasiya cəhətdən heç bir korluğu olmamasına baxmayaraq bu mötəbər qurumun rəhbərliyi hələ də Azərbaycanın məruz qaldığı aqressiya və beynəlxalq ədalətsizliyi sözlə belə olsa ifadə edə bilməyib. İkili standartlar, siyasi oyunlar, münaqişənin həll olunmaması üçün hər şeyin edilməsi. 20 ildir fəaliyyət göstərən bir qrupun münaqişənin həlli istiqamətində heç nəyə nail ola bilməməsinə baxmayaraq fəaliyyətini davam etdirməsi isə məsələnin ən çox təəccüb doğuran tərəfidir.

Yenə bezmədən, usanmadan, utanmadan gəlirlər və gedirlər. Sanki kameralara gülümsəmək və xəbər qıtlığı çəkən siyasi gündəmi doldurmaq üçün gəlirlər. Onların nəzərləri altında yataqxanalarda və çadırlarda artıq iki nəsil qaçqın uşaqları böyüdü, problemlər isə öz həllini tapmadı ki, tapmadı. Aradan keçən dövr və münaqişənin "dinc yolla" həll edilməsini istəyən dövlətlərin missiyası isə onu göstərir ki, bu qrup elə Qarabağ probleminin həll edilməsinə yol verməmək, dissonans vəziyyətini saxlamaq üçün nəzərdə tutularaq yaradılıb.

Qafqaz Ömərov, Ölkə.az-ın analitika xidməti