Barıt çəlləyi: hər an gözlənilən müharibə təhlükəsi

Qərblə Rusiya arasında yaşanan gərginlik və bu gərginliyin hər keçən gün daha da dərinləşməsi, Şərqi Avropanı barıt çəlləyinə çevirməkdədir. Tərəflərin bir-birini geri otuzdurmaq üçün daha çox qarşılıqlı təhdid diplomatiyasına və hərbi psixoloji təzyiqlərə üstünlük verməsi və bölgəyə  canlı hərbi qüvvələrin, ən müasir döyüş və müdafiə silahlarının yerləşdirilməsi, müharibə  riskini artırır. Belə ki, Qərb və NATO öz qoşunlarını təkcə alyansın şərq cinahındakı üzv ölkələrin ərazilərinə deyil, eyni zamanda Ukraynaya yerləşdirməkdədir. Rusiya da öz növbəsində qoşunlarını Ukrayna ilə sərəhəddə deyil, bütün qərb sərhədləri ilə kifayətlənməyərək Belarus ərazisinə yerləşdirməyə başlayıb. Moskva hətta Belarusda iki divizion S-400 “Triumf” zenit-raketi ilə yanaşı, 12 Su-35 döyüş təyyarəsi və bir bölmə Pantsir-S zenit-raket və silah sistemləri yerləşdirəcək. 

İstər Ukrayna böhranının danışıqlar yolu ilə həllini tapmaması və tərəflərin kompromisə getməməsi, xüsusən də Rusiyanın qonşu ölkələrin xarici siyasət kursu və özünə müttəfiq seçim məsələsinə kəskin reaksiya verməsi, bölgədəki vəziyyəti dalana dirəyir. Baxmayaraq  yanvarın 21-də Cenevrədə Rusiya ilə ABŞ arasında növbəti danışıqlar yekunlaşdı və tərəflərin yaranmış böhranın dialoq yolu ilə həllində ciddi irəliləyişə nail ola bilməməsi, bölgədə  gərginliyin hələ uzun müddət davam edəcəyindən xəbər verir. Bu isə yaxın gələcəkdə müharibə riskini qaçılmaz edir.

Hazırda  tərəflər daha informasiya, diplomatiya, hərbi psixoloji təzyiqlərdən istifadəyə üstünlük verməklə əsəb müharibəsini həyata keçirirlər. Bu yolla Qərb Rusiyaya təzyiq edib geri otuzdurmağa çalışır, bunu bacarmadıqda, onu küncə sıxışdırıb təxribata sövq etmək istəyir. Bu isə Qərbə Rusiyaya qarşı daha sərt sanksiyaların tətbiq edilməsinə imkan yaradacaq. Digər tərəfdən isə Moskvanın təxribata əl atması, Qərbə Rusiyaya qarşı açıq hərbi müdaxiləsinə əsas vermiş olacaq. Rusiya da Qərbin bu oyununa düşməmək üçün bacardıqca bu əsəb müharibəsində təxribata getməməyə, bölgədə hərbi iştirakının gücləndirməklə müqavimət göstərməyə çalışacaq. Bununla paralel olaraq uğurlu olmamasına baxmayaraq diplomatik danışıqlara üstünlük verməklə vaxt qazanmağa çalışacaq. Amma hər an hər şey ola bilər. Çünki Moskvanın hansısa mərhələdə necə  addım atacağını demək çətindir. Ən çıxılmaz vəziyyətdə Rusiya yaranmış durumdan çıxış yolu kimi nəticənin necə olmasından asılı olmayaraq  hərbi əməliyyatlara başlaya bilər. Bu, istisna edilmir. Qərb də belə bir situasiyanın yaranacağını ehtimal etdiyindən həmin ana hazırlıq görür. ABŞ və Rusiya arasındakı sonuncu Cenevrə danışıqlarının nəticələri bunu deməyə əsas verir.

Mürtəza
Ölkə.Az