Paşinyan Araikə “artsax”ın gələcəyini anladıb: Xankəndidə şok effekti yaşanıb…

Baş nazir Nikol Paşinyanın Araik Arutyunyana Ermənistanın “artsax” üçün təhlükəsizlik qarantı rolunu oynamaq imkanlarını artıq tamamilə itirdiyini bildirməsi erməni separatçı-terrorçuların son ümidlərini də qırmaqdadır…

"Ölkə.az" musavat.com-a istinadla bildirir ki, rəsmi İrəvanın “artsax” mövzusundan kənara çəkildiyi bir situasiyada, rus sülhməramlıların onların təhlükəsizliyini uzun müddət təmin edə biləcəyinə qətiyyən əmin olmayan erməni separatçılar öz şəxsi gələcəkləri barədə düşünməyə məcbur qalıblar…
Ermənistan cəmiyyətində və siyasi elitasında Cənubi Qafqazda mövcud olan yeni geopolitik situasiyaya yönəlik konkret mövqe yoxdur. Əksinə, hazırda Ermənistanda siyasi-ictimai mövqe ziddiyyətləri yaşanır və bu, hər ötən gün daha da dərinləşir. Və bu səbəbdən də, rəsmi İrəvanın sülh prosesinə münasibətdə hədəfləri ardıcıl xarakter daşımır.

Məsələ ondadır ki, Ermənistan siyasi elitasında realizmə daha yaxın olan siyasətçilər geopolitik situasiyanın Azərbaycan tərəfindən tam şəkildə nəzarət altına alındığına artıq şübhə etmirlər. Hətta onlardan bəziləri bu məsələ ilə bağlı öz mövqelərini açıq mətnlə Ermənistan cəmiyyətinə çatdırılmasına da xüsusi cəhdlər göstərirlər. Belə erməni siyasətçilərin əsas məqsədi ilk növbədə Ermənistanın mövcudluq şanslarını qorumaqdan ibarətdir.

Ermənistanın keçmiş prezidenti Levon Ter-Petrosyan rəsmi İrəvanın Azərbaycanın ərazi bütövlüyünü tanıyaraq, sülh sazişi imzalamaqdan başqa çıxış yolunun qalmadığını bildirmişdi. O, vurğulamışdı ki, “Dağlıq Qarabağ məsələsi” artıq mövcud deyil. Ermənistan bu mövzu ilə bağlı mövqe bildirmək hüququnu itirib. Əgər, vaxtında sülh sazişi imzalamanmasa, yaxın altı ay ərzində Ermənistan dövlətçiliyi də mövcudluğunu sona çatdıra bilər.

Bütün açıqlamalarında Paşinyan hakimiyyətini xəyanətdə suçlayan digər keçmiş prezident, hərbi cinayətkar Robert Köçəryan da özündən əvvəlki dövlət başçısının fikirlərini fərqli məzmunda təkrarlamışdı. R.Köçəryan vurğulamışdı ki, “artsax” artıq itirilib, Ermənistan öz təhlükəsizliyini belə, təmin edə bilmir. ABŞ, Rusiya və Fransa isə Azərbaycan-Türkiyə İttifaqına təsir mexanizmlərinə malik deyil.

Praqa görüşünün nəticələri və MDB dövlət başçılarının son sammitində baş verənlər də Paşinyan hakimiyyətinin Ermənistanın xarici himayədarlarına bəslədiyi ümidlərin əhəmiyyətsiz olduğunu təsdiqlədi. Prezident İlham Əliyev Ermənistan baş naziri Nikol Paşinyana açıq şəkildə xəbərdarlıq etdi ki, Zəngəzur dəhlizi açılmazsa və erməni silahlı birləşmələri Azərbaycan ərazilərindən çıxarılmazsa, rəsmi Bakının səbri tükənəcək, adekvat addımlar atacaq. Ardıncasa, prezident Emmanuel Makronun Azərbaycan əleyhinə ermənipərəst açıqlamalarını səbəb göstərərək, Fransanı sülh prosesində hər hansı formatda vasitəçilik etməsinin bundan sonra mümkün olmadığını vurğuladı.

Təbii ki, bütün bunlar Paşinyan hakimiyyəti üçün açıq mesajlardır. Rəsmi İrəvan Ermənistanı xilas etmək istəyirsə, bu mesajlardan mütləq doğru nəticələr çıxartmalıdır. Əks halda, erməni toplumu çox tezliklə sərhədlərin delimitasiyası və demakrkasiyası kimi mövzuları deyil, məhz Ermənistanın gələcək taleyini müzakirə etmək məcburiyyətində qalacaq.

Maraqlıdır ki, Azərbaycanın Xankəndi və ətraf bölgəsində olan erməni separatçı-terrorçuların rəhbəri Araik Arutyunyanın da Ermənistandan məyus və həyəcanlı qayıtdığı bildirilir. Belə ki, erməni mətbuatının iddiasına görə, baş nazir N.Paşinyan “baş separatçı-terrorçu”ya artıq ondan heç bir şeyin asılı olmadığını açıq şəkildə deyib. A.Arutyunyansa, N.Paşinyanın “artsax” məsələsinin sona çatması barədə dediklərini Xankəndidə digər erməni separatçı-terrorçulara çatdırıb.

Erməni mətbuatının məlumatına görə, baş nazir N.Paşinyanın A.Arutyunyana Ermənistanın “artsax” üçün təhlükəsizlik qarantı rolunu oynamaq imkanlarını tamamilə itirdiyini bildirməsi, erməni separatçı-terrorçular arasında şok effekti yaradıb. İndi A.Arutyunyan və onun yaxın ətrafı daha çox öz şəxsi gələcəkləri barədə düşünmək məcburiyyətində qalıblar. Çünki, Ermənistanın “artsax” mövzusundan kənara çəkildiyi bir situasiyada Rusiya sülhməramlı qüvvələrinin onların təhlükəsizliyini uzun müddət təmin edə biləcəyinə artıq qətiyyən əmin deyillər.

Belə anlaşılır ki, nə Rusiyaya, nə Fransaya, nə də ABŞ-a, o cümlədən, ermənilərin “amerikalı nənə”si Nensi Pelosiyə olan ümidlər artıq özünü doğrultmur. İndi rəsmi İrəvan məhz yalnız mövcud reallıqlarla barışmaqla, Ermənistanın xilas edilə biləcəyinə ümid bəsləməlidir. Hətta Ermənistan prezidenti Vaan Xaçaturyan da geopolitik proseslərin rəsmi İrəvana sərfəli məzmun daşımadığını açıq şəkildə etiraf edib.

Ermənistan prezidenti bildirib ki, sülh prosesi üzrə veriləcək qərarlardan uzaqgedən nəticələr gözləmək sadəlövhlükdən başqa bir şey deyil. Onun fikrincə, “Dağlıq Qarabağ məsələsi” ilə bağlı qərarlar Ermənistanın istəklərini qətiyyən təmin etməyəcək. Çünki Cənubi Qafqazda geopolitik və regional vəziyyət ciddi çəkildə dəyişib: "Həqiqətən, çətin dövrlərdir. İndi hər şey həlledici mərhələyə qədəm qoyub. Bu, Ermənistanın mövcudluğuna və Qarabağ məsələsinin həllinə aiddir. Bizdən düzgün qərarlar qəbul etməyimiz üçün realizm tələb olunur".

Ancaq Ermənistan siyasi elitasının doğru qərarlar qəbul edə biləcəyi də hazırda ciddi şübhələr doğurur. Çünki, bir tərəfdən erməni radikal-revanşıstlər hələ də hərbi-siyasi müqavimət tələblərində israrlı mövqe tutmağa çalışırlar. Onlar erməni diasporunun da dəstəyi ilə bütün dünya ermənilərinin Ermənistan və “artsax” uğrunda birləşməsinin vacib olduğunu vurğulayırlar.

Ona görə də, Ermənistanın gələcək taleyinin böyük ehtimalla məhz erməni toplumu daxilində dərinləşməkdə davam edən mövqe ziddiyyətlərindən asılı olacaq. Əgər, Cənubi Qafqazdakı geopolitik reallıqlarla barışıb, doğru qərarlar verə bilsələr, Ermənistanın öz mövcudluğunu qorumaq şansı qalacaq. Əks halda, yəni revanşizmdə israrlı olarlarsa, “Ermənistansız region” variantı reallığa çevrilə bilər.