Fransa erməni cəmiyyətini sındırdı: fransızlar ələ salındı
Fransanın Xankəndidəki xunta rejiminə “humanitar yük” göndərməsi və bununla bağlı tutduğu mövqe ermənilərdə əməlli-başlı emosional, özgüvən hissi yaratdı. Fransızlar Laçın sərhədinədək gəlməyinə gəldilər. Nə olsun, o vaxtadək İrəvandan ora kimi çoxsaylı karvan gəlmişdi. Bunlar da həmin karvan quyruğunun uzanmasına vizual görüntü verməkdən başqa bir şey olmadı. Və bunu həsrətlə gözləyən, son ümid yerləri olan ermənilərin sevinci çox çəkmədi. Necə deyərlər, sən saydığını say, gör, Azərbaycan nə sayır…
Ermənilərin hiyləsinə uyub özlərini dünyanın “nəhəng”lərindən hesab edən Fransa Laçın sərhədində Azərbaycanın qətiyyəti qarşısında özlərini yağışdan çıxmış cücə günündə hiss etmiş oldular. Fransızların əlləri ətəklərində geri dönməsi isə ermənilərdə əməlli-başlı çaşqınlıq yaratdı və ümidsizlik sindromunu daha da kəskinləşdirdi.
Baxmayaraq ki, bir sıra ciddi erməni politoloqları Fransa bu addımının nəticəsiz olacağını əvvəlcədən bəyan edərək dedilər ki, Paris bu bölgədə hər hansı təsir gücünə malik deyil və onların bu hərəkəti nəticə verməyəcək, iflasa uğrayacaq. Lakin xam xəyallarda olan ermənilər hətta öz ermənilərinin ağıllı sözünü eşitmədi. Acı nəticəsi də göz qabağındadır.
Artıq erməni cəmiyyəti bütövlükdə apatiya vəziyyətindədir və nə edəcəklərini özləri də bilmir. Ermənilər özlərini qatı dumanda və qaranlıq meşədəki kimi hiss edirlər.
Ümid etdikləri fransızların bu qədər “dişsiz” olduğunu görmələri isə ermənilərdə fransızlara olan böyük rəğbət hissini nifrətlə əvəz etmiş oldu. Erməni cəmiyyəti bunu açıq şəkildə dilə gətirirlər. Hətta erməni mediası Fransanın bu hərəkətini ciddi tənqid atəşinə tuturlar.
“Hrapakar” erməni nəşri yazır ki, yük maşınları Fransadan çıxıb Qarabağa daxil olmaq üçün böyük pafos, qətiyyət və inamla yola çıxdı.
“Görünürdü ki, onların qarşısında bütün sədlər qırılacaq, qapılar, yollar açılacaq. Hesab edirdilər ki, nə Laçın yolu, nə Həkəri, nə də digər sədd onların qarşısında heç nədir... Nəhayət, çoxdan gözlənilən humanitar yük Qarabağdakı ermənilərə çatacaq və “aclıq” pəncəsindən xilas olacaqlar. Fransız karvanı gəldi və orada dayanıb Xankəndiyə daxil olmayan digər yük maşınlarının sırasına qoşuldular. Onsuz da Laçın yolunun girişində belə yük maşınlarının qıtlığı yox idi.
Oxşar karvan Azərbaycan tərəfdə, Ağdam-Xankəndi yolunda müşahidə edilməkdədir. Orada isə Qarabağdakı ermənilər girişə imkan vermirlər.
Fransa bu addımı ilə özü üçün hansı problemi həll etdi?”, - “hraparak” yazır.
Ermənilər fransızlardan nəsə umsalar da bilməlidirlər ki, onların bütün cəhdləri iflasa məhkumdur. Çünki Fransanın 30 ildən artıq müddətdə erməni işğalına verdiyi hərtərəfli dəstək, istərsə də ermənilərlə birgə Azərbaycana qarşı təxribatlar sonda puça çıxıb. Bundan sonra da belə olacaq. Elə sentyabrın 1-də Fransanın təhriki ilə Basarkeçərdə Azərbaycan ordusuna qarşı həyata keçirilən təxribatın da acı bədələni ödəyən ermənilər olacaq. Necə deyərlər, fransızlar qaş düzəldən yerdə göz çıxarır. Görəsən, ermənilər bunu nə zaman anlayacaq?! Təkcə fransızlarmı?! Xeyr! Ruslar da, iranlılar da və digərləri də… Hərənin öz marağı var. Keçi can hayında, qəssabsa piy axtarır…
Ermənilər anlamalıdır ki, yalnız bir xilaskar və bir nicatı var. O da Azərbaycandır.
Mürtəza
Ölkə.Az