Kreml niyə yeni müharibəyə "hə" dedi? - ABŞ və Qərb işə başladı

Ukraynanın təkbaşına Rusiya ilə müharibədə uğur qazana bilməməsi, NATO ilə Rusiya arasında açıq qarşıdurmanı qaçılmaz edir. Moldovadakı separatçı Dnestryanı bölgədə yaranmış gərgin durumdan sonra proseslər sürətlə buna doğru gedir. 

Belə ki, Moldovanın separatçı Dnestryanı bölgəsi Rusiyadan kömək istəyib və Kreml bu çağırışa müsbət cavab verib. Rusiya Xarici İşlər Nazirliyi isə bəyan edib ki, Dnestryanı bölgənin sakinlərinin müdafiəsi onların prioritetidir. Bu da yeni münaqişə ocağı deməkdir və istənilən an alovlana bilər.

Digər məqam isə Rusiyada keçirilən prezident seçkilərindən sonra Putinin daha sərt addımlar atacağı ehtimal edilir. Bu da Qərbi çox ciddi narahat edir.  

Qərb onu da yaxşı anlayır ki, Rusiya Ukraynada müəyyən uğur əldə edəcəyi təqdirdə bunun onlar üçün çox ağır fəsadları olacaq. Odur ki, son vaxtlarda Qərb Rusiya ilə açıq hərbi qarşıdurmaya getmək istiqamətində həm ictimai rəyin formalaşdırılması, həm informasiya sahəsində öz siyasətini yürütməkdədir. 

Bu günlərdə Parisdə Avropa İttifaqına üzv ölkələrin qeyri-rəsmi sammitində də yaranmış durumun çox ciddi olduğu və Rusiya ilə açıq hərbi qarşıdurmanın olacağı da istisna edilməyib.

Fransa prezidenti Emmanuel Makron sammitdə Qərb qoşunlarının Ukraynaya göndərilməsi ehtimalını da istisna etməyib. Makron bu fikrini jurnalistlərə açıqlamasında da etiraf edib. “Bunlar kifayət qədər ciddi məsələlərdir. Bu mövzuda dediyim hər söz ölçülür, düşünülmüş və ölçülüb-biçilib”, - Makron əlavə şərh verməkdən çəkinib.

ABŞ-nin müdafiə naziri Lloyd Ostin ABŞ Konqresinin Nümayəndələr Palatasının Silahlı Qüvvələr Komitəsində dinləmələr zamanı NATO-Rusiya qarşıdurmasını istisna etməyib. “Açığı, Ukrayna uduzsa, mən əminəm ki, NATO Rusiya ilə müharibəyə gedəcək”, - ABŞ müdafiə naziri Ostin deyib.

Ostin bildirib ki, ABŞ-nin Ukraynaya dəstəyi həm ABŞ, həm də onun tərəfdaşları və müttəfiqlərinin təhlükəsizliyini təmin etmək üçün zəruridir.

ABŞ dövlət katibi Entoni Blinken "Univision"a müsahibəsində deyib ki, potensial təcavüzkar cəzasız qalarsa, bu, pis presedentlərə səbəb ola bilər. Bu baxımdna da Blinken Ukraynanın müdafiəsinin zəruriliyini vurğulayıb.

Onun sözlərinə görə, 60 milyard dollarlıq yardımın demək olar ki, hamısı faktiki olaraq ABŞ-də Ukraynaya göndəriləcək avadanlıqların istehsalı və tikintisinə sərf olunacaq.

Bu səbəbdən də Avropa İttifaqı (Aİ) ölkələrinin müdafiə nazirləri Parisdə görüşəcək, burada Şərqi Avropa dövlətlərinə, Moldovaya gözlənilən Rusiya təhlükəsi və Ukrayna da daxil olmaqla Moldovaya yardım məsələsini müzakirə edəcəklər. 

Qeyd edək ki, Estoniyanın baş naziri Kaja Kallas Avropa İttifaqını Ukraynaya kömək edərkən Moldovanı unutmamaq barədə çağırış edib.

Rusiya prezidenti Vladimir Putin isə Federal Məclisinə müraciətində isə bildirib ki, NATO qoşunlarının Ukraynaya göndərilməsinin nəticələri faciəli olacaq. 

Baş verən proseslər onu deməyə əsas verir ki, Ukrayna yaxın gələcəkdə cəbhədə dönüş əldə edə bilməyəcəyi təqdirdə, Qərb-Rusiya qarşıdurması qaçılmaz olacaq. Hətta Rusiya-Ukrayna müharibəsindəki mövcud status-kvo, daha dəqiqliklə ifadə etsək, Moskva işğal etdiyi əraziləri özündə saxlamaqla danışıqlara getməsi, Qərb üçün məğlubiyyət deməkdir. Bu Rusiyanın yenidən revanşı deməkdir ki, bunun da ciddi geosiyasi əks təsirləri istisna edilmir. Rusiyanın bu revanşı təkcə Qərb üçün deyil, bütövlükdə dünya üçün yaxşı nəticələr vəd etmir.

Mürtəza
Ölkə.Az