Ağlını başına yığ! – Putinlə Paşinyanın telefon görüşü

İrəvanın son vaxtlarda xarici siyasi kursunda Rusiya təsirindən uzaqlaşma istiqaməti artıq Kremlin səbir kasasını doldurur. Ermənistanın ABŞ ilə imzaladığı strateji tərəfdaşlıq sazişi isə İrəvan-Moskva münasibətlərində gərginləşmənin pik həddinə çatdırıb. Rusiyanın xarici işlər naziri Sergey Lavrov bu günlərdə keçirdiyi mətbuat konfransında İrəvan-Moskva arasında yaranan gərginliyi müzakirə etmək üçün erməni həmkarı Ararat Mirzoyanın şimal paytaxtına dəvət oldunuğunu açıqlayıb.

Amma iki ölkə arasında gərginlik sürətlə dərinləşdiyindən Kreml Ararat Mirzoyanın Moskvaya səfərini gözləməyib. Rusiya prezidenti Vladimir Putin iki ölkə arasında yaranmış durumu telefonla Ermənistanın baş naziri Nikol Paşinyanla müzakirə etməli olub.

İrəvan Paşinyanla Putin arasında baş tutan görüş barədə verdiyi rəsmi açıqlamada tərəflərin Ermənistanın Avrasiya İqtisadi İttifaqında sədrliyinin yekunlarını, Aİİ çərçivəsində qarşıda duran tədbirləri, eləcə də Ermənistan-Rusiya ikitərəfli gündəliyinin bir sıra məsələlərini müzakirə etdiklərini bildirib. Amma o da bəllidir ki, bu, tərəflərin ictimaiyyət üçün açıqlanan hissədir və burada liderlər səviyyəsində müzakirə olunacaq elə də ciddi məsələ yoxdur. Bu adi bir prosedur qaydadır. 

Burada digər məqam isə ondan ibarətdir ki, bundan öncə İrəvanın istər KTMT, istər digər məsələlərlə bağlı səsləndirdiyi ən sərt bəyanatlar, sərgilədiyi mövqe zamanı Putinlə Paşinyan arasında telefon danışığı olmayıb. İrəvanın Moskvadan uzaqlaşma siyasəti yürütməsi, Putində Paşinyana qarşı bir antipatiya yaradıb və hətta o istədikdə belə, onunla birbaşa əlaqədən qaçmağa çalışıb. Hətta Paşinyan Moskvaya səfər edən də belə, Putin onunla görüşməkdən yayındığını çılpaq formada və ya komandasının üzvləri vasitəsilə geniş ictimaiyyətə çatdırıb. 

Bütün bunlar onu deməyə əsas verir ki, Putinlə Paşinyan arasında baş tutan telefon danışığını zəruri edən daha ciddi və tərəfləri narahat edən məsələlər var. Qeyd etdiyimiz kimi, bu da son zamanlarda İrəvanın sürətlə Moskvanın təsir orbitindən uzaqlaşaraq Qərbə doğru istiqamətlənməsi, Kremli çox ciddi şəkildə narahat edir.

Moskva İrəvanın son addımlarının Rusiyanın bölgədəki maraqlarına tamamilə zidd olduğundan buna imkan verməyəcəklərini açıq şəkildə bəyan edir. Kreml yaxşı anlayır ki, İrəvanın növbəti addımları KTMT-dən, Aİİ-dən çıxmaq, rus hərbi bazasının, rus sərhədçilərinin Ermənistan ərazisindən çıxarılması, hüquqi cəhətdən Ermənistan ərazisində Rusiyanın tabeçiliyində olan müəssisələrin Moskvanın tabeçiliyindən çıxarılması məsələsi olacaq.

Putinlə Paşinyan arasında baş tutan telefon danışığında da bu məslələr müzakirə edilib və tərəflər yaranmış vəziyyətlə bağlı bir-birinə öz mövqelərini çatdırıb.

Telefon danışığı zamanı yəqin ki, Putin ən azı diplomatik qaydalara uyğun olaraq mesajı ilə yanaşı hədəsini Paşinyanın diqqətinə çatdırıb. Çox günmanki, Putin Paşinyana "ağlını başına yığ, yoxsa aqibəti çox acı olar" deməyi də unutmayıb.

Danışığın yekunu olaraq tərəflər çox böyük ehtimalla bu məsələləri xarici işlər naziri Ararat Mirzoyanın  yaxın günlərdə rəhbərlik  edəcəyi nümayəndə heyətinin Moskvaya səfəri zamanı daha detallı şəkildə müzakirə etmək barədə razılığa gəliblər.

Proseslərin gedişi onu göstərir ki, İrəvan-Moskva münasibətləri qarşıdakı mərhələdə daha da kəskinləşən xətt üzrə inkişaf edəcək. Təbii ki, iki ölkə arasındakı mövcud böhranın dərinləşməsi Cənubi Qafqazda da özünü müxtəlif formalarda büruzə verəcək.

Mürtəza
Ölkə.Az