Politoloq: ""Total"ın prezidenti həmişə Qərbin sanksiyalarının əleyhinə olub""
Fransanın “Total” neft şirkətinin prezidenti Kristof de Marjerinin ölümü ətrafında qalmaqal səngimir. Belə ki, Rusiya mətbuatında yayılan məlumatlarda şirkətinin prezidentinin ölümünün sui-qəst olduğu barədə yazılar dərc olunmaqdadır.
Məsələ ilə əlaqədar Ölkə.az politoloq Ərəstun Oruclunun fikirlərini öyrənib. Politoloqa görə, baş verən hadisədə hər hansısa bir qətl faktı yoxdur.
Ərəstun Oruclu: "Mən bu hadisə ilə bağlı xarici mətbuatı çox ciddi izləmişəm. Kristof de Marjerinin ölümü yalnız Rusiyada qətl kimi təqdim olunur. Məsələ burasındadır ki, bu formal baxımdan təyyarə qəzasıdır və təyyarə qəzasının səbəbləri də bəllidir. Rusiya kanallarının özündə həmin qar təmizləyən maşının sürücüsünün də istintaqa verdiyi ifadələr göstərildi. O, bildirir ki, həqiqətən də uçuş zolağına düşüb. Bundan başqa Rusiya mətbuatında belə bir məlumat da getdi ki, həmin anda dispetçer pultunun arxasında təcrübə keçən stajçı olub. Əgər Rusiyanın əsas hava limanında hardan ki, xarici dövlətlərin, Rusiyanın rəsmiləri uçuşlar həyata keçirirlər, o zaman orada bu cür səhlənkarlığa yol verilirsə, hansı sui-qəsddən danışmaq olar?...
Marjeri "Total" prezidenti olaraq Qərbin Rusiyaya qarşı sanksiyalarına qarşı həmişə çox tənqidi yanaşıbdır. Rusiya ilə əməkdaşlığın tərəfdarı olubdur və buna görə, mənə belə gəlir ki, təyyarə qəzasına uğraması ətrafında bu cür xəbərlərlə məhz bir təbliğat şousu qurulur. Heç bir Qərb, Fransa mətbuatında bunun sui-qəst olması iddia olunmur. Rusiya mətbuatında bu ideanın üzə çıxması təsadüfi deyil. İlk olaraq məsulliyəti öz üzərilərindən atmağa çalışırlar. Hadisədə səhlənkarlıq faktları isə göz qarşısındadır. Təbii ki, Rusiya siyasətində daimi amillərdən olan xarici düşmən axtarışı da burada özünü büruzə verir. Belə olanda isə bir məqam ortaya çıxır. Əgər hansısa xarici bir düşmən Rusiyanın əsas hava limanında Rusiyanın əsas dostlarından birini qəzaya uğradıb, qətlə yetirmək iqtidarındadırsa, onda Rusiya hansı güclə dünyaya meydan oxuya bilər?"
- Bəs ümumilikdə, baş verən hadisə "Total"ın Azərbaycandakı fəaliyyətinə təsir göstərə bilərmi?
- Mən güman etmirəm ki, hansısa bir fundamental təsiri olacaq, çünki kompaniyanın öz strategiyası var ki, o da işləyir. Ola bilər ki, yeni prezidentin Rusiyaya olan münasibəti dəyişsin, ola da bilər dəyişməsin. Əslində orada bir nəfər məsələni həll etmir, hər şey idarə heyətinin verdiyi birgə qərardan asılıdır. "Total" Şahdənizdə payçıdır və güman edirəm ki, elə belə də qalacaq. Düşünmürəm ki, bunların Azərbaycana hər hansı bir təsiri olacaq.
Xatırladaq ki, Moskvanın “Vnukovo” aeroportunda kiçik mühərrikli təyyarənin qəzaya uğraması nəticəsində Fransanın “Total” neft şirkətinin prezidenti Kristof de Marjeri vəfat etmişdi. Hadisəyə səbəb isə “Falkon” tipli təyyarənin uçuş zolağında qartəmizləyən maşınla toqquşması idi.
Qeyd edək ki, "Total" Fransanın ən böyük, dünyanın isə ən böyük neft şirkətlərindən biridir. Total Azərbaycanda da bir sıra fəaliyyətləri həyata keçirir. Bunlardan biri də Dövlət Neft Şirkəti ilə Fransanın «Total» şirkəti arasında Xəzər dənizinin Azərbaycan sektorunda «Abşeron» dəniz yatağı blokunun kəşfiyyatı, işlənməsi və hasilatının pay bölgüsü haqqında sazişidir. Sənədə əsasən, kəşfiyyat dövründə nəzərdə tutulmuş bütün xərclər "Total" neft şirkəti tərəfindən ödəniləcək.
Fatimə İbrahimova
Ölkə.az
