Ukraynalı ekspert: “Putin qonşu dövlətləri qorxutmaq istəyir”

Bu günlərdə Rusiya Federasiyasının prezidenti Vladimir Putin “Valday” diskussiya klubunun görüşündə iştirak edib.

Uzun çıxışı zamanı bir çox məsələlərə toxunan Putin dünyada gedən proseslərə, o cümlədən, münaqişələr mövzusuna, daha dəqiq desək, Ukrayna məsələsinə də münasibətini bildirib.

Putinin fikrincə, Ukraynada baş verənlər dünyada təsir qüvvələrinin paylanmasına birbaşa təsir edən münaqişələrə ən bariz nümunə hesab olunur. Prezident onu da qeyd edib ki, bu tip münaqişələr təkcə Ukrayna ilə bitmir. Putinin bu mesajla nə demək istədiyi, kimlərə və hansı mesajı göndərdiyi dəqiq məlum olmasa da, boşuna demədiyi bəllidir. SSRİ dövlətləri arasında yeni münaqişələrin yaranması ehtimalı sadəcə ehtimaldır yoxsa yaxın gələcəyimiz?

Ölkə.Az olaraq məsələ ilə bağlı Ukraynalı politoloq, tanınmış ekspert, siyasi elmlər namizədi Yevgeniy Maqdanın rəyini aldıq:

“Putinin Valdaydakı çıxışı geniş məqsədlərə yönəlmişdi. Bir tərəfdən bu çıxış Qərbin ekspertləri, digər tərəfdən isə Rusiyanın “istehlakçıları üçün nəzərdə tutularaq söylənilib. Putinin var gücü ilə özünü dünyanın hegemon məmləkətlərindən birinin lideri kimi göstərməsinə baxmayaraq, bu bir o qədər inandırıcı alınmır. Sivil dünya ölkələri nüvə arsenalının kəmiyyətinə görə yer üzündə ikinci sayılan dövlətlə hesablaşır, onun siyasi mövqeyilə yox. Putin Rusiya ilə qonşuluqda yerləşən dövlətləri qorxutmaq istəyir. Ukraynaya gəlincə isə, o, sadəcə bilərəkdən saymazyana şəkildə bu ölkə haqqında fikirlər səsləndirir. Ukrayna onun üçün ciddi problemə çevrilib. Putinin bu çıxışını təhdidedici mesaj kimi yox, sadəcə olaraq öz simasını bir o qədər uyğun olmayan şəkildə qoruması üçün uğursuz cəhd kimi qiymətləndirərdim”, - deyə şərhçi bildirib.

Rəşid Mustafazadə

Ölkə.Az