Politoloq: "Paris görüşündən nə isə gözləmək sadəlövhlükdür"

Bütün dünya gündəminin əsas mövzusuna çevrilən Azərbaycan və Ermənistan prezidentləri arasında baş tutacaq görüşə saatlar qalıb. Görüş Fransa prezidenti Fransua Ollandın rəhbərliyi ilə Parisin Yelisey sarayında baş tutacaq.

Görüşdə ikitərəfli sülh sazişinin imzalanması müzakirə olunacaq əsas mövzulardan hesab edilir. Belə ki, Avropa İttifaqının Azərbaycandakı nümayəndəliyinin rəhbəri, səfir Malena Mardaya görə, nəzərdə tutulan görüşü Dağlıq Qarabağ probleminin həllində müsbət addım hesab etmək olar.

ATƏT-in Minsk Qrupunun amerikalı həmsədri Ceyms Uorlikə də eyni fikirdədir. Həmsədrin fikrinə görə, prezidentlərin Paris görüşü Dağlıq Qarabağ münaqişəsinin sülh yolu həllinə apara və tərəflərin mövqeyini yaxınlaşdıra bilər.

Azərbaycanlı millət vəkilləri və politoloqlar isə tam fərqli düşünür.

Ölkə.az-a danışan politoloq Fərhad Mehdiyevə görə, bu dəfəki görüş də daha əvvəl olan görüşlərdən heç nə ilə fərqlənməyəcək.

"Parisdəki görüş də daha əvvəl olan görüşlərdən heç nə ilə fərqlənməyəcək. Bu, sadəcə olaraq dialoqun davam etdirilməsidir. Minsk qruppasını da razı salan hal odur ki, onlar sanki iş görürlər kimi görünür. Yoxsa regionda heç bir strateji dəyişmə olmadığına görə, danışıqlarda da hər hansı dəyişikliyin olacağını gözləmək sadəlövlükdür. Ən yaxşı ehtimal bizim iki girovumuzu buraxacaqlar, ancaq girovların buraxılması belə yüksək ehtimal deyil".

Qeyd edək ki, millət vəkili Asim Mollazadə və Yevda Abramov da politoloqla eyni fikirdədirlər.

//www.olke.az/siyaset-1/ermenistan-sulh-istiqametinde-hansisa-bir-addim-atmaga-hazir-deyil-6846

Fatimə İbrahimova
Ölkə.az