Məleykə Abbaszadə: \"İmtahan zalına bıçaq, qumbara və s. keçirmək istəyənlər olub\"

Ölkə.Az xəbər verir ki, bunu Dövlət İmtahan Mərkəzinin Direktorlar Şurasının sədri Məleykə Abbaszadə ali təhsil müəssisələrinə sənəd qəbulunun başa çatması və buraxılış imtahanlarına həsr olunmuş mətbuat konfransında deyib. O, narazılıqlarla bağlı məsələyə aydınlıq gətirib:

“Aprelin 2-sində də bizdə çox mürəkkəb imtahan olacaq. Bu imtahan əvvəlki illərin məzunları üçün hazırlanır və həmin imtahanda iştirak edən şəxslərin yaşı əsasən 18-dən yuxarıdır. Əvvəlki imtahanlarda iştirak edən məzunların yaşı isə 18-ə yaxın idi. Bu insanların atdığı adddımlara onların özləri cavabdeh olacaq. Çünki 18 yaşları var.

Mən imtahanda qayda-qanunların pozulmasını, imtahan prosesini pozmaq üçün cəhdlər göstərilməsini nəzərdə tuturam. Belə hallar həmişə olur. 

Kütləvi imtahan keçirən qurum üçün vacibdir ki, hər bir imtahan zalında normal şərait olsun. Ona görə də imtahan binasına daxil olan insanlar ilk növbədə təhlükəsizlik məsələləri olmaqla mütləq yoxlanılır. İstəmirəm ki, uzun illərlə bizim hansı faktlarla rastlaşdığımızı sadalayım. İmtahan zalına hansısa alətləri, bıçaq, qumbara keçirmək istəyənlər olub. Biz bu kriminal xronikanı heç vaxt şişirtməmişik və ictimaiyyətə təqdim etməmişik. Çünki hüquq-mühafizə orqanları imtahan prosesini müşahidə edir və belə hallar aşkarlananda həmin şəxslər o orqanlara təhvil verilir”, - deyə o bildirib.

Billurə Yunus