İslamda dini kəbin varmı? - QMİ-dən Elşad Miriyə cavab

“Təkcə İslam dinində yox, bütün dinlərdə şəriət qanunu ilə ailələrin qurulmasında müəyyən bir forma mövcuddur. İslamda da bu, kəbin anlayışı kimi qəbul olunur”.

Bu sözləri Ölkə.Az-a açıqlamasında Qafqaz Müsəlmanlar İdarəsinin əməkdaşı Samid Quliyev ilahiyyatçı Elşad Mirinin Qurani-Kərimdə “dini kəbin” anlayışının olmaması barədə sözlərinə münasibət bildirərkən deyib.

S.Quliyev söyləyib ki, dinimizdə hallallıq üçün kəbin mütləqdir: “Nikah münəsibətləri dövlət qarşısında rəsmiləşdirirsə, kəbin cütlüklərin Allah qarşısında bir-birinə halal olmasını təmin edir. Bütün dinlərdə hallalıq üçün kəbin anlayışı ayrı-ayrı formalarda olsa da, var. Ümumiyyətlə, bunu müzakirə predmetinə çevirmək olmaz”. 

S.Quliyev Elşad Mirinin ilahiyyatçı olmasının şübhə doğurduğunu, onun şou xarakterli fikirlər səsləndirdiyini söyləyib.

Qeyd edək ki, E.Miri islamda “dini kəbin” anlayışı olmadığını deyib. O bildirib ki, əgər nikah şəhadətnaməsi varsa, “dini kəbin”ə ehtiyac yoxdur. Bundan əvvəl isə sünnətin olmadığını söyləmişdi. QMİ-dən isə bildirilmişdi ki, onun dedikləri yanlışdır. 

Billurə Yunus