Vidadi Ağagülovdan kövrəldən çıxış: Məəttəl qaldım, xalqımızı tanımaq üçün əsrlər bəs etməz... - VİDEO

Birinci Qarabağ müharibəsi veteranı, Vətən müharibəsi iştirakçısı “Maştağa” ləqəb ilə tanınan Vidadi Ağagülovun çıxışı sosial şəbəkələrdə maraqla qarşılanıb.

Ölkə.Az xəbər verir ki, o, çıxışında Azərbaycan xalqının fədakarlıından, öz millətini sevməsindən danışaraq misallar gətirib.

Həmin çıxışı təqdim edirik:

“Novxanıda Mehdi Hüseynzadə adına məktəb var. Orada bizim direktor bacımız var. Gözəl bir kombinasiya yaradıb. Baxdım, sadəcə, məəttəl qaldım. O götürüb şəhidlərin fotosunu partaya düzüb. Şagird dərsini yaxşı oxumayanda şəhidin şəklini götürür. Şagird soruşanda deyir ki, şəhid səndən küsüb. Deyir, sən Azərbaycan üçün oxumalısan, Azərbaycanı yaşatmalısan. Səhərisi günü şagird gəlir iki əlini qaldırır, özü də ağlaya-ağlaya deyir ki, qaytar mənim şəhidimin şəklini.

Azərbaycanda o qədər maraqlı insanlar var. Sırf Azərbaycanı yaşatmaq üçün yaşayırlar. Neçə ildir belə insanlarla bağlı kitab yazmaq istəyirəm. Biri bu yaxınlarda gəlib deyir ki, Vidadi müəllim, istəyirəm sizinlə görüşüm, amma təkbətək görüşək. Həmin adamla görüşdüm. Dedi ki, mənim adım heç yerdə olmasın, xahiş edirəm heç kim barəmdə heç nə bilməsin. Filan generatorları mən yığmışam, onu əsgərlərə çatdırın. Dedi, öz adınızdan çatdırın. Dedim olarmı, biz onu dövlətin adından çatdıraq? “Böyük məmnuniyyətlə” dedi. Yəni ki belə insanlar var. Baxıram dəhşətə gəlirəm. Vallah-billah, bu xalqı tanımaq üçün əsrlər bəs eləməz. 

Keçmişimizə baxırıq, kommunizm dövründə, 37-ci ildə nə qədər repressiya oldu, nə qədər ziyalılarımızı apardılar. Bunlar elə-belə deyildi, xalqın resursunu qırmaq idi. Amma buna baxmayaraq xalq mübarizəsini davam etdirdi. Bu xalqı sevmək lazımdır. Bu xalqın qərini bilmək lazımdır”, - deyə o söyləyib.