Xaricdən məhsul sifariş edənlərin nəzərinə: Yeni dələduzluq növü yayılıb - FOTO

Azərbaycanda yeni dələduzluq növü yayılıb.

Ölkə.Az xəbər verir ki, xarici ölkələrdən məhsul sifariş verən şəxslərə "Azərpoçt" MMC adından mesaj göndərilir.
Mesajda deyilir:

"Azərpoçt: Paketiniz anbara gəlib, lakin ünvan məlumatı natamam olduğu üçün çatdırıla bilmir. Zəhmət olmasa, linkdəki ünvanı təsdiqləyin. Ən son logistika statusunu əldə etmək üçün linki kopyalayın və Safari-də açın".

Likə kopyaladıqda isə "Azərpoçt" MMC-nin rəsmi saytına bənzər sayt açılır. Məlumata görə, boş xanaları doldurduqdan sonra bank məlumatları tələb edilir. Bağlamanın qiymətinin isə 0.51 manat olduğu qeyd edilir.

Bütün mərhələni keçdikdən sonra isə dələduzlar kart hesabından məlumatları oğurlamağa başlayır.

Sosial şəbəkə istifadəçiləri bildiriblər ki, artıq bir neçə həftədir vətəndaşlara bənzər mesajlar göndərilir.

Qeyd edək ki, bənzər dələduzluq halları ilə bağlı dəfələrlə vətəndaşlara aidiyyəti dövlət qurumlarından xəbərdarlıq edilib və bildirilib ki, şübhəli keçidlərə daxil olmaqdan çəkinsinlər.

Xatırladaq ki, bundan əvvəl də "Azərpoçt" adından dələduzluq edilib. Belə ki, kiberdələduzlar sosial şəbəkələrdə "Azərpoçt" MMC-nin adından “Azerpost” adlı saxta səhifə yaradaraq sahibsiz qalan mal tərkibli bağlamaların 5,50 manata satışa çıxarılması ilə bağlı məlumatlar yayılıb.

Billurə Yunus