Ölən uşağın fotosundan istifadə edib pul yığdılar: İnanmayın! - FOTO

Sosial şəbəkələrdə elə gün olmur ki, hansısa dələduzluq növü ilə qarşılaşmayaq.

Ölkə.Az xəbər verir ki, bu üsullardan biri də "xəstəyə yardım" adı altında insanlardan pul toplamaqdır.

Bu dəfə də bir neçə ay öncə ağır xəstəlikdən vəfat edən 13 yaşlı oğlanın fotosu ilə sosial şəbəkələrdə "yardım" üçün pul toplandığı üzə çıxıb.

Bu barədə paylaşım edən AMEA-nın Folklor İnstitutunun aparıcı elmi işçisi Elyar İslamoğlu bildirib ki, elanda fotosu yerləşdirilən İmanov Şakir Kənan oğlu qohumudur və bir neçə ay öncə vəfat edib. 

"Bu elana inanmayın, pul göndərməyin! Atası fırıldaqçıların əməlindən xəbərdardır və vəfat etmiş övladının adından pul yığılmasına görə çox pis haldadır", - deyə o yazıb.

Qeyd edək ki, analoji hal daha əvvəl də yaşanıb. Ölmüş və xəstə şəxslərin fotosunu paylaşan fırıldaqçılar insalardan pul toplayıblar.

Billurə Yunus