Nazir “qızılca nəzarət altındadır” demişdi

Xəbər verdiyimiz kimi, ölkəmizdə qızılca virusunun yayılmasından sonra 3 məktəbli dünyasının dəyişib.

Ölkə.Az xəbər verir ki, 1 şagirdin vəfat etdiyi Yusif Əliyev adına 195 saylı tam orta məktəbin ibtidai sinifləri distant tədrisə keçib.

Elm və təhsil naziri Emin Əmrullayev bir neçə gündür verdiyi açıqlamalarda vəziyyətin nəzarət altında olduğunu desə də, yoluxmalarla bağlı rəqəmləri açıqlanmayıb.

Ölkə.Az qızılcaya yoluxmalarla bağlı region məktəblərindəki vəziyyəti öyrənmək üçün regional təhsil idarələrinə sorğu ünvanlayıb.

Mil-Muğan Regional Təhsil İdarəsindən (Sabirabad, Saatlı, İmişli və Beyləqan) sorğumuza cavab olaraq qızılcaya təsdiqlənmiş yoluxma halları ilə bağlı məlumat verilməsə də, dezinfeksiya işlərinin aparıldığı bildirildi. Həmçinin qeyd edildi ki, dərsə davamiyyət normal səviyyədədir.

Lənkəran – Astara Regional Təhsil İdarəsindən də (Astara, Cəlilabad, Lerik, Lənkəran, Masallı, Yardımlı) Ölkə.Az-a cavab olaraq yoluxma sayları ilə bağlı konkret açıqlama verilmədi. Qeyd olundu ki, ötən həftə yoluxmalarla bağlı ciddi problem olmayıb.

Həmçinin idarədən bildirildi ki, region üzrə olan məktəblərdə lokal bağlanma, hansısa siniflərin distant tədrisə keçməsi halı yoxdur.

Şəki-Zaqatala Regional Təhsil İdarəsindən (Balakən, Qax, Qəbələ, Oğuz, Şəki) Ölkə.Az-ın sorğusuna cavab olaraq qızılcanın məktəblilərin davamiyyətinə müəyyən qədər təsir etdiyi deyildi.

Gəncə-Daşkəsən Regional Təhsil İdarəsindən (Gəncə və Naftalan şəhərləri, Daşkəsən, goranboy, Göygöl, Samux) məktəblilərin davamiyyəti ilə bağlı monitorinqlər keçirildiyi və vəziyyətin normal olduğu, həmçinin uşaqlar məktəb binasına daxil olmazdan əvvəl onların hərarətinin ölçüldüyü deyildi.

Yalnız Qarabağ Regional Təhsil İdarəsindən (Ağcəbədi, Ağdam, Bərdə, Füzuli, Xocalı, Xocavənd, Şuşa, Tərtər) sorğumuza cavab olaraq ötən günə qədər təsdiqlənmiş yoluxma hallarının 285 olduğu bildirilib.

Bakı Şəhəri üzrə Təhsil İdarəsi də daxil olmaqla məktəblərdə təsdiqlənmiş yoluxma halları ilə bağlı Ölkə.Az-a məlumat verilməyib.

Regional təhsil idarələrindən rəqəmlərlə bağlı informasiya almaq üçün TƏBİB-ə müraciət etməyimizi tövsiyə etdilər.

TƏBİB-dən isə Ölkə.Az-a bildirildi ki, qızılca xəstəliyinin dinamikası nəzərə alınaraq statistikası açıqlanmır.

Onu da əlavə edək ki, əksər məktəblərdə virusun yayılması ilə əlaqədar dezinfeksiya işləri aparılıb. Bunu əks etdirən müvafiq məlumatlar regional təhsil idarələrinin səhifəsində də paylaşılıb.

Billurə Yunus